ଦେବଗଡ଼଼,୧୩ା୧(ଡି.ଏନ.ଏ.): ଦେବଗଡ ଇନ୍ଦିରାଗାନ୍ଧୀ ଷ୍ଟାଡିୟମଠାରେ ଚାଲିଥିବା ସର୍ବଭାରତୀୟ ପ୍ରଧାନପାଟ କପ ଫୁଟବଲ ଟୁର୍ନାମେଣ୍ଟ ରବିବାର ଉଦ୍ଯାପିତ ହୋଇଯାଇଛି ା ଫାଇନାଲ ମ୍ୟାଚ ଅନୁଗୋଳ ଜିଲା ନାଲକୋ ଜିଆର୍ଏଫ୍ସି ଏବଂ କଲା(ଦେବଗଡ଼) ବନଦୁର୍ଗା ଫୁଟବଲ ଆସୋସିଏଶନ ମଧ୍ୟରେ ହୋଇଥିଲା। ବନଦୁର୍ଗା ଫୁଟବଲ ଅସୋସିଏସନକୁ ୨-୦ ଗୋଲରେ ପରାସ୍ତ କରି ନାଲକୋର ଜେଆର୍ଏଫ୍ସି ଚାମ୍ପିୟନ ହୋଇଥିଲା। ବନଦୁର୍ଗା ଫୁଟବଲ ଆସୋସିଏଶନ ରନର୍ସ ଅର୍ପ ହୋଇଥିଲା। ଫାଇନାଲ ମ୍ୟାଚକୁ ରେଫରି ଭାବେ ଅରୁଣ କୁମାର ଭୋଇ, ନୀଳ ନାୟକ, ଅଶ୍ୱିନୀ କୁମାର ବେରିହା, ଦେବରାଜ ନାଗ ପରିଚାଳନା କରିଥିଲେ। ହେମନ୍ତ କୁମାର ମହାପାତ୍ର ମ୍ୟାଚ କମିଶନର ଦାୟିତ୍ୱ ତୁଲାଇଥିଲେ। ପଦ୍ମଲୋଚନ ଗୁରୁ, ବେଣୁଧର ଗଡ଼ନାୟକ ମ୍ୟାଚର ଧାରାବିବରଣୀ ପ୍ରଦାନ କରିଥିଲେ।
ଆୟୋଜକ ପ୍ରଧାନପାଟ କ୍ଲବ ସଭାପତି ସୁବାସ ଚନ୍ଦ୍ର ଭୋଇଙ୍କ ଅଧ୍ୟକ୍ଷତାରେ ଅନୁଷ୍ଠିତ ପୁରସ୍କାର ବିତରଣ ଉତ୍ସବରେ ମୁଖ୍ୟଅତିଥି ଭାବେ ଡ.ଉଇଲିୟମ ହେନେଜ , ସମ୍ମାନିତ ଅତିଥି ଭାବେ ସମ୍ବଲପୁର ଜିଲା କେନ୍ଦ୍ର ସମବାୟ ବ୍ୟାଙ୍କ ସଭାପତି ଅମରେନ୍ଦ୍ର ଗଙ୍ଗଦେବ, ଇଂ. ଚତ୍ତରଞ୍ଜନ ପ୍ରଧାନ, ଇଂ. ବିଷ୍ଣୁ ପ୍ରସାଦ ଅମାତ୍ୟ, ବ୍ୟବସାୟୀ ସଞ୍ଜୀବ କୁମାର ଅଗ୍ରୱାଲା, ଜିଲା କ୍ରୀଡ଼ା ସଂଘ ସମ୍ପାଦକ ଧିରେନ୍ଦ୍ର ନାୟକ ଯୋଗଦେଇ ଚାମ୍ପିୟନ ନାଲକୋର ଜେଆର୍ଏଫ୍ସିକୁ ଚାମ୍ପିୟନ ଟ୍ରଫି ସହ ନଗଦ ୨୫ହଜାର ଟଙ୍କା ଓ ରନର୍ସ ଅପ୍ କଲା(ଦେବଗଡ଼ର) ବନଦୁର୍ଗା ଫୁଟବଲ ଆସୋସିଏଶନକୁ ରନର୍ସ ଅପ୍ ଟ୍ରଫି ସହ ନଗଦ ୨୦ ହଜାର ଟଙ୍କା ପୁରସ୍କାର ପ୍ରଦାନ କରିଥିଲେ। ନାଲକୋ ଦଳର ପ୍ରଶାନ ସୋରେନଙ୍କୁ ମ୍ୟାନ ଅଫ ଦି ମ୍ୟାଚ, ନାଲକୋ ଦଳର ମାନସା ହେମ୍ରମଙ୍କୁ ମ୍ୟାନ ଅଫ ଦି ଟୁର୍ନାମେଣ୍ଟ ଓ ଶ୍ରେଷ୍ଠ ଗୋଲକିପର, ଶ୍ରେଷ୍ଠ ସ୍କୋରର ଭାବେ ଅକ୍ଲେଶ ଟପ୍ପୋଙ୍କୁ ପୁରସ୍କାର ପ୍ରଦାନ କରିଥିଲେ। ସେହିପରି ଶ୍ରେଷ୍ଠ ଶୃଙ୍ଖଳିତ ଦଳ ଭାବେ ଦେବଗଡ଼ ଫୁଟବଲ କ୍ଲବକୁ ପୁରସ୍କାର ପ୍ରଦାନ କରାଯାଇଥିଲା ା ପୁରସ୍କାର ବିତରଣ ଉତ୍ସବରେ ପ୍ରଧାନପାଟ କ୍ଲବର ସମ୍ପାଦକ ବିକାଶ କୁମାର ପ୍ରଧାନ, କୋଷାଧ୍ୟକ୍ଷ ରାଘବ ମହାରଣା ମଞ୍ଚାସୀନ ଥିଲେ ା
