ଭଟଲି,୧୬।୧୨ (ଡି.ଏନ୍.ଏ.)- ଗୋଆ ମାପୁସା ପେଡମ୍ ସାଗ୍ ଇନ୍ଡୋର ଷ୍ଟାଡିୟମ୍ରେ ଡିସେମ୍ବର ପହେଲା ହପ୍ତାରେ ୩ ଦିନ୍ ଧରି ହେଇଥିବାର ଏସ୍ସିକେଏଫ୍ଆଇ ସର୍ବଭାରତୀୟ କରାଟେ ଚାମ୍ପିୟନଶିପ୍ରେ ବରଗଡ଼ ଜିଲାର ସ୍ବାଗତିକା ମହାନ୍ତି ବ୍ରୋଞ୍ଜ ପଦକ ଜିତି ଜିଲାର ଟେକ୍ ରଖିଛନ୍। ଇଥିର ଲାଗି ଭିନ୍ ଭିନ୍ ଆଡୁ ତାକର୍ ନିକେ ଶୁଭେଛା ବାରତା ପୁହୁଁଚୁଛେ। ସ୍ବାଗତିକାକଁର ପର୍ଦରଶନରେ ତାକର ଗୁରୁ ସମ୍ବଲପୁରର ଦୀପକ ଦାଶ ବି ବହୁତ ଖୁସି ହେଇଛନ୍।
ସୂଚନା ଅନ୍ସାରେ ବରଗଡ଼ ଜିଲା ଭଟଲିର ନମିତା ମହାନ୍ତି ଆରୁ ସୁରଜିତ ମହାନ୍ତିକଁର ଗୁଟେବଲି ଝି’ ସ୍ବାଗତିକା ମହାନ୍ତି। ଛୁଆଦିନୁ ତାକର ଖେଳକୁଦ୍ ଉପରେ ଝେଁାକ୍ ରହିଥିଲାବେଲେ ସେ ଭଲ ପାଠ୍ ବି ପଢ଼ୁଛନ୍। ସେ ଥାନୀଅ ସରସ୍ବତୀ ଶିଶୁ ବିଦ୍ୟା ମନ୍ଦିରରେ ପଢ଼ଲାବେଲେ ବି ଭିନେ ଭିନେ ଖେଲକୁଦ୍ଥି ଭାଂଗ ନେଇ ଅନେକ ପୁରସ୍କାର ପାଇଥିଲେ। ଆଏଜ୍କାଲି ଟୁକେଲ ଜନମ୍ ହେଲେ ଅନେକ ପରିବାର ଦୁଖି ହେଇଯାଉଛନ୍। ହେଲେ ସ୍ବାଗତିକାର ଲେଖେଁ ଝି’ଟେ ପାଇ ତାକର ମା’ବାପ୍ ବହୁତ୍ ଗରବ୍ ଅନୁଭବ କରୁଛନ୍। ସେନ୍ତା ଯେନ୍ମାନେ ଟୁକେଲମାନକୁ ଆଡ଼ ନଜରଥି ଦେଖୁଛନ୍ ସେମାନକର ଲାଗି ଆମର ଝି’ ଉଦାହରନ୍ ହେବାର କଥା ବଲି ସେମାନେ କହିଛନ୍। ଚଲତି ଡିସେମ୍ବର ୬, ୭ ଆର ୮ ତାରିଖ୍ ୩ ଦିନ୍ ଧରି ଗୋଆର ମାପୁସା ପେଡମ୍ ସାଗ୍ ଇନ୍ଡୋର ଷ୍ଟାଡିୟମ୍ରେ ତିନ୍ ନମ୍ବର ଏସ୍ସିକେଏଫ୍ଆଇ ସର୍ବଭାରତୀୟ କରାଟେ ଚାମ୍ପିୟନଶିପ ଅନୁଷ୍ଠିତ ହେଇଥିଲା। ପର୍ତିଯୋଗିତାରେ ୮ଶହ ପରତିଯୋଗୀ ଭାଗ ନେଇଥିଲେ। ଇ ପରତିଯୋଗିତାଥି ସମ୍ବଲପୁରର ସ୍ବୟମ୍ଭୁ ମାରର୍ଶାଲ ଆଟର୍ସ ଏକାଡେମୀ ତରଫୁ ସ୍ବାଗତିକା ଭାଗ ନେଇ ବ୍ରୋଞ୍ଜ ପଦକ ଜତିଛନ୍। ସ୍ବାଗତିକା ଏହେଦେ ସମ୍ବଲପୁରର ଗୁଟେ କଲେଜଥି ଯୁକ୍ତ ଦୁଇ ବିଜ୍ଞାନ ପାଠ୍ ପଢ଼ୁଛନ୍। ଇ ସଫଲତା ଲାଗି ତାକର ପୁରନା ସ୍କୁଲର ଗୁରୁମା ଗୁରୁଜୀ, ସାଂଗସାଥିମାନେ ଶୁଭେଛା ଜନେଇଛନ୍।
