ଭବାନୀପାଟଣା, ୭ା୧୨ (ଡି.ଏନ.ଏ.)-
ସବୁ ଛୁଆ କେନ୍ଥେଇ ପ୍ରାଥମିକ ଶିକ୍ଷା ପାଇପାରବେ ସେଥିରଲାଗି ସରକାର ଅନେକ ଯୋଜନା କାଯ୍କାରୀ କରୁଛନ୍। ସେନ୍ତା ସ୍କୁଲ ଛାତ୍ରୀଛାତ୍ରକଁର ଲାଗି ବେଲାକେ ପୁଷ୍ଟିକର ଖାଏଦ୍ର ବେବସ୍ତା, ୟୁନିଫର୍ମ, ମାହାଲିଆ ବହିପତର, ସୁଁଦର ସ୍କୁଲ କୁଠା, ଶୌଚାଳୟ, ପିଇଲା ପାଏନ୍, ଖେଲପଡ଼ିଆ ଆଦିର ବେବସ୍ତା କରିଛନ୍। ଇ ସବୁର ଦେଖ୍ରେଖ ମରାମତି ଭାର ପଁଚେତ ହାତେ ସରକାର ସମରପି ଦେଇଛନ୍। ହେଲେ ଅନେକ ଜାଗାରେ ଇ ସବୁ ବେବସ୍ତାରେ ଖେଲ୍ଢ଼େପ ଦେଖ୍ବାକେ ମିଲୁଛେ। ଏନ୍ତା ଗୁଟେ ଉଦାହରନ୍ ଦେଖ୍ବାକେ ମିଲିଛେ କଳାହାଣ୍ଡି ଜିଲା ଲାଞ୍ଜିଗଡ଼ ବ୍ଲକ ତ୍ରିଲୋଚନପୁର ପଁଚେତ୍ ଅଧୀନ କ୍ଷେମୁଣ୍ଡିପଦର ସରକାରୀ ପ୍ରାଥମିକ ବିଦ୍ୟାଳୟରେ।
ସୂଚନା ଅନ୍ସାରେ ସ୍କୁଲଟା ୨୦୦୭ ସାଲେ ଥାପିତ ହେଇଥିଲା। ଏହେଦେ ସ୍କୁଲରେ ୧ମରୁ ୫ମ ଶ୍ରେଣୀ ତକ୍ ୩୫ ଝନ୍ ଛାତ୍ରୀଛାତ୍ର ପାଠ୍ ପଢ଼ୁଥିଲାବେଲେ ୨ ଝନ୍ ଶିକ୍ଷକ ରହିଛନ୍। ହେଲେ ସ୍କୁଲରେ ଛାତ୍ରୀଛାତ୍ରକଁର ସମସିଆକେ ନେଇ ବିଭାଗୀୟ ଅଧ୍କାରୀକୁଁ ବାରବାର କହେଲେ ବି କେହି ନାଇଁ ଶୁନବାର ବଲି ଗଁାବାସି ଅଭିଯୋଗ କରିଛନ୍। ସ୍କୁଲରେ ଶୌଚାଳୟ ଅଭାବୁ ଛାତ୍ରୀଛାତ୍ର ଝାଡ଼ାଝପଟ ଲାଗି ନିୟମଗିରୀ ପାହାଡ଼ ତଲେ ଥିବାର ଝରନାକେ ଯାଉଛନ୍। ଇ ଅଂଚଲରେ ଘଁଚ୍ ଜଂଗଲ ଥିଲାବେଲେ ସବୁବେଲେ ବାଘ୍ଭାଲୁ ଲେଖେଁ ଜଂଗଲି ଜୀବ୍ଜଁତୁକର ଭଏ ରହିଛେ। ସେନ୍ତା ରଁଧାଘର ଅଭାବୁ ସ୍କୁଲ ବାରନ୍ଡାରେ ଛୁଆକର ଲାଗି ରଁଧାବଢ଼ା ହେଉଛେ। ପିଇଲା ପାଏନ୍ ସୁବିଧା ନାଇଁଥିବାର ଲାଗି ଛାତ୍ରୀଛାତ୍ର ବେଲାକେ ଖାଇ ସାଏଲା ଉତାରୁ ନିଜର ଥାଲିଗିନା ଧୁଇବାର ଲାଗି ଝରନାକେ ଯାଉଛନ୍। ଇ ଦିଗେ ଜିଲା ଶିକ୍ଷା ବିଭାଗ ଆର ଜିଲା ପରଶାସନ ଦୁରୁଷ୍ଟି ଦେଇ ସମସିଆର ସମାଧାନ କରବାକେ ଗଁାବାସୀ ଦାବି କରିଛନ୍।
