ମୁମ୍ବାଇ,୨୬। ୩: ତାଲାବନ୍ଦ ସମୟରେ ଲୋକଙ୍କୁ ଯେଭଳି ପର୍ଯ୍ୟାପ୍ତ ପରିମାଣର ଖାଦ୍ୟଶସ୍ୟ ଉପଲବ୍ଧ ହୁଏ ସେ ପ୍ରସଙ୍ଗକୁ କେନ୍ଦ୍ର ସରକାର ଧ୍ୟାନରେ ରଖିଛନ୍ତି। ରାଶନ ଦୋକାନଗୁଡିକରେ ଲୋକଙ୍କୁ ୨ କିଲୋ ଅଧିକ ସବ୍ସିଡି ଖାଦ୍ୟଶସ୍ୟ ପ୍ରଦାନ ରହିଥିବା ପ୍ରସ୍ତାବକୁ କେନ୍ଦ୍ର କ୍ୟାବିନେଟ ମଞ୍ଜୁରୀ ପ୍ରଦାନ କରିଛି। ଏହା ଫଳରେ ଲୋକଙ୍କୁ ମାସିକ ୭ କିଲୋ ସବ୍ସିଡି ଦରରେ ଖାଦ୍ୟ ସାମଗ୍ରୀ ଉପଲବ୍ଧ ହେବ। ଏହାଦ୍ୱାରା ଦେଶର ୮୦ କୋଟି ଜନସାଧାରଣ ଲାଭବାନ ହେବେ ବୋଲି କୁହାଯାଇଛି। ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଅଧ୍ୟକ୍ଷତାରେ ବସିଥିବା ଅର୍ଥନୈତିକ ବ୍ୟାପାର ସଂକ୍ରାନ୍ତ କ୍ୟାବିନେଟ କମିଟି ଏହି ପ୍ରସ୍ତାବ ଉପରେ ନିଷ୍ପତ୍ତି ଗ୍ରହଣ କରିଛି। ପବ୍ଲିକ ଡିଷ୍ଟ୍ରବ୍ୟୁଶନ ସିଷ୍ଟମ ଦ୍ୱାରା ଲୋକମାନଙ୍କୁ ଏହି ସୁବିଧା ପ୍ରଦାନ କରାଯିବ ବୋଲି ସୂଚନା ଏବଂ ପ୍ରସାରଣ ମନ୍ତ୍ରୀ ପ୍ରକାଶ ଜାଭଡେକର ସୂଚନା ଦେଇଛନ୍ତି। ୨୭ ଟଙ୍କାର କିଲୋ ପ୍ରତି ଗହମକୁ ରିହାତି ଦରରେ କିଲୋ ପିଛା ୨ ଟଙ୍କା ଏବଂ ଚାଉଳ କିଲୋ ପିଛା ୩ ଟଙ୍କାରେ ପ୍ରଦାନ କରାଯାଉଥିବା ସେ କହିଛନ୍ତି। ଅଗ୍ରୀମ ଭାବେ ଖାଦ୍ୟ ସାମଗ୍ରୀ କେନ୍ଦ୍ରଠାରୁ ନେବା ଲାଗି ରାଜ୍ୟଗୁଡିକୁ ନିର୍ଦ୍ଦେଶ ରହିଛି।
ଆର୍ଆର୍ବିକୁ ମିଳିବ ୧୩୪୦ କୋଟି
ସାରା ଦେଶରେ ରହିଥିବା ଆଞ୍ଚଳିକ ଗ୍ରାମୀଣ ବ୍ୟାଙ୍କ(ଆର୍ଆର୍ବି)ଗୁଡିକୁ ସରକାର ଅଧିକ ପୁଞ୍ଜି ପ୍ରଦାନ କରିବେ। ସିସିଇଏ ବୁଧବାର ଆର୍ଆର୍ବିଗୁଡିକୁ ୧୩୪୦ ପୁନଃପୁଞ୍ଜିପ୍ରଦାନକୁ ମଞ୍ଜୁରୀ ପ୍ରଦାନ କରିଛନ୍ତି। ଆର୍ଆର୍ବିଗୁଡିକର ସ୍ଥିତିକୁ ଉନ୍ନତ କରିବା ଦିଗରେ ଏଭଳି ପଦକ୍ଷେପ ନେବାକୁ ସରକାର ସୂଚନା ଦେଇଛନ୍ତି। ଏହି ପୁଞ୍ଜି ମଧ୍ୟରୁ ସରକାର ୬୭୦ କୋଟି ଟଙ୍କା ବ୍ୟବସ୍ଥା କରିଥିବା ବେଳେ ବ୍ୟାଙ୍କଗୁଡିକ ପକ୍ଷରୁ ୬୭୦ କୋଟି ବ୍ୟବସ୍ଥା କରାଯାଇଛି।
ପୋଷାକ କ୍ଷେତ୍ରକୁ ଟିକସ ରିହାତି
ଆପାରେଲ ରପ୍ତାନିକାରୀ ଏବଂ ମେଡ୍ ଅପ୍ ରପ୍ତାନିକାରୀଙ୍କୁ ପ୍ରୋତ୍ସାହନ ପ୍ରଦାନ କରିବା ଲାଗି କେନ୍ଦ୍ର କ୍ୟାବିନେଟ ପକ୍ଷରୁ ଟିକସ ରିହାତି ଅବଧି ବୃଦ୍ଧି ସମ୍ପର୍କରେ ଘୋଷଣା କରାଯାଇଛି। କେନ୍ଦ୍ର କ୍ୟାପିନେଟ ଏହାକୁ ବୁଧବାର ମଞ୍ଜୁରୀ ପ୍ରଦାନ କରିଛି। ଏପ୍ରିଲ ୧ ପରଠାରୁ ଏ କ୍ଷେତ୍ରରେ ଟିକସ କୋହଳ ବ୍ୟବସ୍ଥା କରାଯାଇଥିବା ସୂଚନା ରହିଛି।
