ଜୁନାଗଡ଼,୧୪।୬(ଡି.ଏନ୍.ଏ.): କଳାହାଣ୍ଡି ଜିଲା ଜୁନାଗଡ଼ ବ୍ଲକ ଅନ୍ତର୍ଗତ ମହିଚଳା ସଙ୍ଗରୋଧ କେନ୍ଦ୍ରରେ ରହୁଥିବା ପ୍ରବାସୀମାନେ ଯିବାକୁ ଅନିଚ୍ଛୁକ ହେଉଛନ୍ତି। ମହିଚଳା ସରପଞ୍ଚ ଅଜୟ ବେହେରାଙ୍କ ଭଲପାଇବା ଏଭଳି ଭାବରେ ପ୍ରବାସୀଙ୍କୁ ବାନ୍ଧି ରଖିଛି ଯେ ସଙ୍ଗରୋଧ କେନ୍ଦ୍ର ଛାଡିବାକୁ ସେମାନେ ଅନିଚ୍ଛା ପ୍ରକାଶ କରିଛନ୍ତି।
ପ୍ରକାଶ ଯେ, ରାଜ୍ୟ ବାହାରୁ ଆସୁଥିବା ପ୍ରବାସୀମାନଙ୍କୁ ବିଭିନ୍ନ ପଞ୍ଚାୟତ ସ୍ତରରେ ସଙ୍ଗରୋଧ କେନ୍ଦ୍ରରେ ରଖାଯାଉଥିବା ବେଳେ ସରପଞ୍ଚଙ୍କୁ ଜିଲାପାଳ ଦାୟିତ୍ୱ ଦେବା ସହିତ ପ୍ରବାସୀ ମାନଙ୍କ ସମସ୍ତ ଦାୟିତ୍ୱ ନ୍ୟସ୍ତ କରାଯାଇଛି। ଏହି ପରିପ୍ରେକ୍ଷୀରେ ଜୁନାଗଡ଼ ବ୍ଲକ ଅନ୍ତର୍ଗତ ମହିଚଳା ସଙ୍ଗରୋଧ କେନ୍ଦ୍ରରେ ପ୍ରଥମ ଓ ଦ୍ୱିତୀୟ ପର୍ଯ୍ୟାୟରେ ୮୦ ଜଣ ପ୍ରବାସୀ ରହୁଥିଲେ । ସରପଞ୍ଚ ଅଜୟ କୁମାର ବେହେରା ପ୍ରବାସୀଙ୍କୁ ସମସ୍ତ ସୁବିଧା ସୁଯୋଗ ଯୋଗାଇ ଦେଉଛନ୍ତି । ବିଶେଷ କରି ଏହି କେନ୍ଦ୍ରରେ ଅନେକ ଗର୍ଭବତୀ ପ୍ରବାସୀ ମହିଳା ଥିବା ବେଳେ ନିଜ ଖର୍ଚ୍ଚରେ ସେମାନଙ୍କୁ ସେବା ଯୋଗାଇ ଦେଉଛନ୍ତି । ଅନେକ ଗର୍ଭବତୀ ଓ ପ୍ରସୂତୀଙ୍କୁ ଚିକିତ୍ସା ପାଇଁ ଡାକ୍ତରଖାନା ନେଉଛନ୍ତି । ପ୍ରତିଦିନ ସକାଳେ ଯୋଗ ଓ ବ୍ୟାୟାମ କରାଉଥିବା ବେଳେ ସାରେ ବିଭିନ୍ନ ମନୋରଞ୍ଜନ ଧର୍ମୀ କାର୍ଯ୍ୟକ୍ରମ କରୁଛନ୍ତି। ବର୍ତ୍ତମାନ ୮୦ ଜଣ ପ୍ରବାସୀଙ୍କୁ ଘରକୁ ଯିବାପାଇଁ କହିବାରୁ ସେମାନେ ସଙ୍ଗରୋଧ କେନ୍ଦ୍ର ଛାଡିଯିବାକୁ ଅନିଚ୍ଛା ପ୍ରକାଶ କରିଛନ୍ତି। ପରେ ଯିବା ସମୟରେ ଅନେକ ପ୍ରବାସୀ ମହିଳା ଓ ପୁରୁଷ ମନେ କାନ୍ଦିକାନ୍ଦି ଘରକୁ ଯଉଥିବା ଦୃଶ୍ୟ ଦେଖିବାକୁ ମିଳିଛି।
