ସଙ୍ଗରୋଧ କେନ୍ଦ୍ରରୁ ଲୁଚି ପଳାଇଲେ ଯୁବକ
3:32 pmApril 6, 2020April 6, 2020 / 54

ବଡଗାଁ, ୬।୪ (ଡି.ଏନ.ଏ.)-ସୁନ୍ଦରଗଡ ଜିଲା ବଡଗାଁ ବ୍ଲକ ଅନ୍ତର୍ଗତ ବରଙ୍ଗାକଛାର ଗ୍ରାମର ସ୍କୁଲରେ ଖୋଲାଯାଇଥିବା ସଙ୍ଗରୋଧ କେନ୍ଦ୍ରରୁ ରବିବାର ସନ୍ଧ୍ୟାରେ ଜଣେ ଯୁବକ ପାଚେରୀ ଡେଇଁ ପଳାଇଛନ୍ତି। ଏହି ଘଟଣା ଜଣାପଡିବା ପରେ ସ୍ଥାନୀୟ ଜନପ୍ରତିନିଧିମାନେ ତାଙ୍କୁ ପୁଣି କେନ୍ଦ୍ରକୁ ଆଣିଥିଲେ । ହେଲେ ସେ ହୋ ହାଲ୍ଲା କରିବାରୁ ଡାକ୍ତରୀ ଦଳ ଆସି ସଂପୃକ୍ତ ଯୁବକଙ୍କୁ ରାତିରେ ତାଙ୍କ ଘରେ ଛାଡିଛନ୍ତି। ପଟୁଆବେଡାର ଏହି ଯୁବକ ଜଣକ ଚେନ୍ନାଇରୁ ଫେରିବା ପରେ ତାଙ୍କୁ ସଙ୍ଗରୋଧ କେନ୍ଦ୍ରରେ ରଖାଯାଇଥିଲା । ସନ୍ଧ୍ୟାରେ ତାଙ୍କର କେତେଜଣ ସାଙ୍ଗ ଆସି ତାଙ୍କୁ ସାଥିରେ ନେଇ ଯାଇଥିଲେ। ତେବେ ଏ ସମ୍ପର୍କରେ ସ୍ଥାନୀୟ ସରପଞ୍ଚଙ୍କୁ ପଚାରିବାରୁ ସୋମବାର ସକାଳେ ତାଙ୍କୁ ଛାଡିବାର ଥିଲା । କିନ୍ତୁ ସେ କେନ୍ଦ୍ରରୁ ଲୁଚି ପଳାଇଥିଲେ । ପୁଣି କେନ୍ଦ୍ରକୁ ଅଣାଗଲା ପରେ ପାଟିତୁଣ୍ଡ କରିବାରୁ ଡାକ୍ତରୀ ଦଳ ରାତିରେ ତାଙ୍କ ଘରେ ନେଇ ଛାଡିଛନ୍ତି ବୋଲି କହିଛନ୍ତି।