ଚେନ୍ନାଇ, ୧୫।୬(ପି.ଟି.)- ଶାରଜା ଅନ୍ଲାଇନ୍ ଚେସ୍ ଚାମ୍ପିୟନଶିପ୍ରେ ଭାରତୀୟ ଗ୍ରାଣ୍ଡମାଷ୍ଟର ପି. ହରିକ୍ରିଷ୍ଣା ରନର୍ସଅପ୍ ହୋଇଛନ୍ତି। ଅନ୍ତିମ ରାଉଣ୍ଡରେ ପୋଲାଣ୍ଡ ଗ୍ରାଣ୍ଡମାଷ୍ଟର ରାଦୋସ୍ଲା ଓଜାସେକ୍ଙ୍କଠାରୁ ହାରିଥିବା ହରିକ୍ରିଷ୍ଣା ୬.୫ ପଏଣ୍ଟ ପାଇ ପ୍ରତିଯୋଗିତା ଶେଷ କରିଛନ୍ତି। ପୂର୍ବତନ ବିଶ୍ୱ ର଼୍ୟାପିଡ୍ ଚାମ୍ପିୟନ ତଥା ଟପ୍ ସିଡ୍ ଆଜରବୈଜାନର ଶାଖ୍ରିୟାର ମାମେଦ୍ୟାରୋଭ୧୦ ରାଉଣ୍ଡରୁ ୭.୫ ପଏଣ୍ଟ ହାସଲ କରି ଚାମ୍ପିୟନ ହୋଇଛନ୍ତି। ଡବଲ ରାଉଣ୍ଡ ରବିନ ଭିତ୍ତିକ ମୁକାବିଲାରେ ସେ ଅପରାଜେୟ ରହିଥିଲେ। ପୁରସ୍କାର ଆକାରରେ ମାମେଦ୍ୟାରୋଭ ୩,୦୦୦ ଆମେରିକୀୟ ଡଲାର ଏବଂ ହରିକ୍ରିଷ୍ଣା ୨,୨୫୦ ଆମେରିକୀୟ ଡଲାର ପାଇଛନ୍ତି। ୬ ପଏଣ୍ଟ ସହିତ ଓଜାସେକ୍ ତୃତୀୟ ସ୍ଥାନ ଅଧିକାର କରିଛନ୍ତି। ଦ୍ୱିତୀୟ ଦିବସରେ ମାମେଦ୍ୟାରୋଭଙ୍କ ବିପକ୍ଷରେ ବିଜୟ ହାସଲ କରିବାର ସୁବର୍ଣ୍ଣ ସୁଯୋଗ ହାତଛଡ଼ା କରିଥିଲେ ସ୍ଥାନୀୟ ଖେଳାଳି ସାଲେମ ସାଲେହ। ହରିକ୍ରିଷ୍ଣା ଦ୍ୱିତୀୟ ରାଉଣ୍ଡରେ ତାଙ୍କଠାରୁ ପରାଜିତ ହୋଇଥିଲେ। ୮ମ ରାଉଣ୍ଡରେ ଦୁଇ ଟିପ୍ସିଡ୍ ଖେଳାଳିଙ୍କ ମଧ୍ୟରେ ଦ୍ୱିତୀୟ ପର୍ଯ୍ୟାୟ ମୁକାବିଲା ଡ୍ର ରହିଥିଲା। ଫଳରେ ଟାଇଟଲ ଦୌଡ଼ରେ ହରିକ୍ରିଷ୍ଣା ରହିଥିଲେ। ୯ମ ରାଉଣ୍ଡରେ ସାଲେହଙ୍କୁ ହରାଇଥିବା ଏହି ଭାରତୀୟ ତାରକା ଶେଷ ରାଉଣ୍ଡରେ ହାରିଯିବାରୁ ସୁଯୋଗ ହାତଛଡ଼ା ହୋଇଥିଲା।
