ଲାଞ୍ଜିଗଡ,୨୭ା୪(ଡି.ଏନ୍.ଏ): କଳାହାଣ୍ଡି ଜିଲା ଲାଞ୍ଜିଗଡ ବ୍ଲକ ରାଜୀବ ଗାନ୍ଧୀ ସେବାକେନ୍ଦ୍ରରେ ସମନ୍ବିତ ଉନ୍ନୟନ ସଂସ୍ଥା ଆନୁକୂଲ୍ୟରେ ଲଘୁ ବନଜାତ ଦ୍ରବ୍ୟ ସଂଗ୍ରହ ଓ ତାହାର କ୍ରୟ ସମନ୍ଧରେ ଏକ ପ୍ରଶିକ୍ଷଣ ଶିବିର ସୋମବାର ଅନୁଷ୍ଠିତ ହୋଇଯାଇଛି। ଶିବିରକୁ ପ୍ରକଳ୍ପ ପ୍ରଶାସକ ବିରଞ୍ଚି ନାରାୟଣ ଦରୱାନ ମୁଖ୍ୟ ଅତିଥିଭାବେ ଯୋଗଦେଇ ବ୍ଲକର ବିଭିନ୍ନ ଅଞ୍ଚଳରେ ବନଜାତ ଦ୍ରବ୍ୟର ଚାହିଦା ଓ ଏଥିରେ ସଂଗ୍ରହକାରୀ କିଭଳି ଲାଭବାନ ହେବେ ଓ ଏହାର କ୍ରୟ ସମନ୍ଧରେ ଓଏଲଏମ୍ ତରଫରୁ ବିଭିନ୍ନ ପଞ୍ଚାୟତରୁ ଆସିଥିବା ଏମବିକେ ମାନଙ୍କୁ ବୁଝାଇଥିଲେ। ଲଘୁ ବନଜାତ ଦ୍ରବ୍ୟକୁ କିଭଳି ଭାବେ ଉତ୍ତମ ଗୁଣବତ୍ତା ସହିତ ଗଛିତ କରିହେବ ସେ ସମ୍ପର୍କରେ ଟିଡିସିସି ବ୍ରାଞ୍ଚ ମ୍ୟାନେଜର ନବଘନ ପ୍ରଧାନ ପ୍ରଶିକ୍ଷଣ ଦେଇଥିଲେ। ତେନ୍ତୁଳି, ଶାଳମଞ୍ଜି, ମହୁଲ, ହରିଡା, ଚାଆଁର ଓ ବାହାଡା ଇତ୍ୟାଦି କିପରି ଭାବେ ଏଫ୍ଏକକ୍ୟୁରେ ସଂଗ୍ରହ କରାଯିବ ସେ ବିଷୟରେ ତାଲିମାର୍ଥୀ ଏମବିକେମାନଙ୍କୁ ଅବଗତ କରାଯାଇଥିଲା। ଲଘୁ ବନଜାତ ଦ୍ରବ୍ୟ ସଂଗ୍ରହ କରି ଜୀବିକା ଅର୍ଜନ କରୁଥିବା ପରିବାରମାନଙ୍କ ବୃହତର ସ୍ବାର୍ଥ ଦୃଷ୍ଟିରୁ ଏହି କାର୍ଯ୍ୟକ୍ରମ କରାଯାଇଥିଲା। ଏହି ଶିବିରରେ ଅଂଶଗ୍ରହଣ କରିଥିବା ଏମବିକେମାନଙ୍କୁ ଉତ୍ତମ ଗୁଣବତ୍ତା ସମନ୍ଧରେ ବିକ୍ରେତାମାନଙ୍କୁ ଅବଗତ କରାଯାଇଥିଲା। ଲାଞ୍ଜିଗଡ ବ୍ଲକର ପ୍ରତ୍ୟେକ ପଞ୍ଚାୟତରେ ଗୋଟିଏ ଏସଏସଜି ଗ୍ରୁପ ଚୟନ କରାଯିବ ଓ ସେମାନେ ଏହି ଲଘୁ ବନଜାତ ଦ୍ରବ୍ୟ ସଂଗ୍ରହକାରୀଙ୍କଠାରୁ କିଣି ଟିଡିସିସିକୁ ବିକ୍ରି କରିବ ବୋଲି ପ୍ରକଳ୍ପ ପ୍ରଶାସକ ବିରଞ୍ଚି ଦରୱାନ ପ୍ରକାଶ କରିଥିଲେ। ଏହି ତାଲିମ ଶିବିରରେ ଲାଞ୍ଜିଗଡ ବିଡିଓ ଜିତେନ୍ଦ୍ର କୁମାର ମିଶ୍ର, ପ୍ରକଳ୍ପ ପରିଚାଳକ ଆଇଟିଡିଏ ଅବିନାଶ ମହାନ୍ତି, ଓପିଲିପି ପ୍ରକଳ୍ପ ପରିଚାଳକ ଲୋମ୍ବଧର ପ୍ରଧାନ, ଓଏଲଏମର ବ୍ଲକ ପରିଚାଳକ ଜଳନ୍ଦର ତାଣ୍ଡି ଉପସ୍ଥିତ ରହି କାର୍ଯ୍ୟକ୍ରମ ପରିଚାଳନାରେ ସହଯୋଗ କରିଥିଲେ। ସାମାଜିକ ଦୁରତା ରକ୍ଷାକରି ଏହି କାର୍ଯ୍ୟକ୍ରମ ଅନୁଷ୍ଠିତ ହୋଇଥିଲା।
