ମୁମ୍ବାଇ: ବଲିଉଡ୍ ଅଭିନେତା ସୁଶାନ୍ତ ସିଂହ ରାଜପୁତଙ୍କ ମୃତ୍ୟୁପରେ ଏବେ ତାଙ୍କ ସମ୍ପର୍କିତ ନୂଆ ନୂଆ ତଥ୍ୟ ସାମ୍ନାକୁ ଆସୁଛି। ସମସ୍ତେ ତାଙ୍କ ମୃତ୍ୟୁ ପଛରେ କାରଣକୁ ନେଇ ନିଜର ମତ ଓ ଅନୁମାନ ପ୍ରକାଶ କରୁଛନ୍ତି। ଇତିମଧ୍ୟରେ ଯଦି ଦେଶରେ କରୋନା ଲକ୍ଡାଉନ ହୋଇ ନ ଥାନ୍ତା ତା’ହେଲେ ସୁଶାନ୍ତ ଆଜି ଫିଲ୍ମ ଶୁଟିଂରେ ବ୍ୟସ୍ତ ରହିଥାନ୍ତେ। ଆଉ ତାଙ୍କ ଜୀବନ ବଞ୍ଚିଯାଇଥାନ୍ତା। କିଛି ଏଭଳି ମତ ରଖିଛନ୍ତି ଜଣାଶୁଣା ସ୍କ୍ରିନ୍ ରାଇଟର ତଥା ବଲିଉଡ୍ ନିର୍ଦ୍ଦେଶକ ରୁମୀ ଜାଫେରୀ। ଅଭିନେତା ସୁଶାନ୍ତ ଓ ଅଭିନେତ୍ରୀ ରିୟା ଚକ୍ରବର୍ତ୍ତିଙ୍କୁ ନେଇ ସେ ଏକ ଫିଲ୍ମ ତିଆରି କରିବାକୁ ଯାଉଥିଲେ। ଯାହାର ଶୁଟିଂ ମୁମ୍ବାଇରୁ ଆରମ୍ଭ ହୋଇ ଲଣ୍ଡନ ଓ ପଞ୍ଜାବରେ ଶେଷ ହୋଇଥାନ୍ତା। ଏହି ଫିଲ୍ମ ରୋମାଣ୍ଟିକ, କମେଡି ଓ ଏକ ଡାନ୍ସ ଉପରେ ଆଧାରିତ ଥିଲା ବୋଲି ରୁମୀ କହିଛନ୍ତି। ଯେଉଁଥିରେ ମୁଖ୍ୟ ଚରିତ୍ରରେ ସୁଶାନ୍ତଙ୍କ ସହ ରିୟା ନଜର ଆସିଥାନ୍ତେ। ଏହି ଫିଲ୍ମର ସ୍କ୍ରିପ୍ଟ ସୁଶାନ୍ତଙ୍କୁ ମିଳିଯାଇଥିଲେ ମଧ୍ୟ ସେ ରୁମୀଙ୍କ ସହ ବସି ଆଲୋଚନା କରିବାକୁ ଚାହୁଁଥିଲେ। ତେବେ ଯେମିତି ଯେମିତି ଲକ୍ଡାଉନ ବଢ଼ିଥିଲା ସେମିତି ଆମ ଭିତରେ ଦୂରତା ବଢ଼ିଯାଇଥିଲା ବୋଲି ନିର୍ଦ୍ଦେଶକ ରୁମୀ କହିଛନ୍ତି। ଅପରପକ୍ଷେ ରବିବାର ସୁଶାନ୍ତ ନିଜ ଘରେ ଆତ୍ମହତ୍ୟା କରିବା ପରେ ସେ ଆଉ ଏହି ଫିଲ୍ମ ତିଆରି କରିବେ ନାହିଁ ବୋଲି କହିଛନ୍ତି। କାରଣ ଏହି ଫିଲ୍ମର କାହାଣୀ ସୁଶାନ୍ତଙ୍କୁ ଧ୍ୟାନରେ ରଖି ଲେଖାଯାଇଥିଲା।
