ଉଦ୍ଧମ ସିଂ ନଗର,୨୭।୩: କରୋନା ଭାଇରସ ସଂକ୍ରମଣକୁ ଦେଖି ଏବେ ସାରା ଦେଶରେ ଜାରି ରହିଛି ଲକ୍ଡାଉନ୍। ଆଉ ଏହି ସମୟରେ ବିନା ଅନୁମତିରେ ଉତ୍ତରାଖଣ୍ଡ ଉଦ୍ଧମ ସିଂ ନଗରର ଜଣେ ବର ବରଯାତ୍ରୀ ସହ ବାହା ହେବାକୁ ଯାଉଥିବା ବେଳେ ପୋଲିସ ଦ୍ୱାରା ଅଟକ ରହିଥିବା ଜଣାପଡିଛି। ୭ ବରଯାତ୍ରୀଙ୍କ ସହ ବର ଗୁରୁବାର ରାତିରେ ଖତିମା ପୋଲିସ ଷ୍ଟେଶନରେ ରାତି କାଟିଛନ୍ତି। ଏହି ଘଟଣାକୁ ନେଇ ପୋଲିସ କହିଛି, ଉଦ୍ଧମ ସିଂ ନଗରରେ ଏକ ବରଯାତ୍ରୀ ବାହାରିବା ଖବର ପାଇବା ପରେ ଆମେ ପହଞ୍ଚି ବର ଓ ବରଯାତ୍ରୀଙ୍କୁ ଅଟକାଇଥିଲୁ। କାରଣ ଏବେ ଏହି ଅଞ୍ଚଳର ପ୍ରାୟ ୮ଜଣ ଲୋକ କ୍ୱାରାଣ୍ଟାଇନରେ ଥିବା ବେଳେ ଏହା ସମ୍ବେଦନଶୀଳ ଅଞ୍ଚଳଭାବେ ଗଣାଯାଉଛି। ଏମାନେ ଧାରା ୧୮୮ ଭଙ୍ଗ କରିଥିବା ଅଭିଯୋଗରେ ଅଟକ ଥିବା ବେଳେ ନିୟମ ଅନୁଯାୟୀ ସେମାନଙ୍କୁ ଦଣ୍ଡ ଦିଆଯିବ। ଏବେ ସାରା ଦେଶରେ ଲକ୍ଡାଉନ୍ ଚାଲିଥିବା ବେଳେ ଏଭଳି ବିବାହ ନିୟମ ବିରୁଦ୍ଧ ବୋଲି ପୋଲିସ କହିଛି।
