ଝାରସୁଗୁଡ଼ା ଅଫିସ,୨୬।୩: କରୋନା ମୁକାବିଲା ପାଇଁ ସମଗ୍ର ଦେଶରେ ଲକ୍ଡାଉନ୍ ସମେତ ବିଭିନ୍ନ କଟକଣା କରାଯାଇଛି। ଏହି ପରିସ୍ଥିତିରେ ମଧ୍ୟ ଲୋକେ ଘରୁ ବାହାରକୁ ବାହାରୁଛନ୍ତି। ତେବେ ଘରୁ ମୋଟରସାଇକେଲ ନେଇ ବାହାରକୁ ଆସୁଥିବା ତିନି ଶହରୁ ଊର୍ଦ୍ଧ୍ୱ ବ୍ୟକ୍ତିଙ୍କଠାରୁ ଜରିମାନା ଆଦାୟ କରିଛି ଝାରସୁଗୁଡ଼ା ପୋଲିସ। ସେହିପରି ବୁଧବାର ଓ ଗୁରୁବାର ଦୁଇଦିନରେ ବିନା କାରଣରେ ବାହାରେ ବୁଲୁଥିବା ଓ ଦୋକାନ ଖୋଲିଥିବା ଅଭିଯୋଗରେ ମୋଟ ୨୯ ଜଣଙ୍କୁ ଗିରଫ କରାଯାଇଛି। ଏନେଇ ଝାରସୁଗୁଡ଼ା ଥାନା ଅଧିକାରିଣୀ ସାବିତ୍ରୀ ବଳ ସୂଚନା ଦେଇଛନ୍ତି।
ଗୁରୁବାର ସକାଳୁ ଝାରସୁଗୁଡ଼ା ପୋଲିସ ସହରରେ ଲକ୍ଡାଉନ୍ କଟକଣା ପାଳନ କରିବା ଓ ଲୋକେ ବାହାରକୁ ନ ଆସିବା କ୍ଷେତ୍ରରେ କାର୍ଯ୍ୟ କରିବା ପାଇଁ ସହରର କିଷାନ ଛକ, ବସଷ୍ଟାଣ୍ଡ ଛକ, ଥାନା ଛକ ଦେଇ ସହରକୁ ପ୍ରବେଶ କରୁଥିବା ଯାନବାହନ ଯାଞ୍ଚ କରିଥିଲା। ଏହି ଯାଞ୍ଚ ବେଳେ କୌଣସି କାରଣ ନଥାଇ ସହରରେ ବୁଲାବୁଲି କରୁଥିବା ଓ ମୋଟରଯାନ ଆଇନ ଉଲ୍ଲଙ୍ଘନ କରୁଥିବା ପ୍ରାୟ ୧୨୦ଜଣ ଗାଡ଼ିଚାଳକଙ୍କଠାରୁ ଜରିମାନା ଆଦାୟ କରିଛି। ସେହିପରି ଲକ୍ଡାଉନ୍ ଘୋଷଣା ସତ୍ତ୍ୱେ ବିନା କାରଣରେ ସହରରେ ବୁଲାବୁଲି କରୁଥିବା ଓ ନିୟମ ନ ମାନି ଦୋକାନ ଖୋଲିଥିବା ଅଭିଯୋଗରେ ବୁଧବାର ୬ଟି ମାମଲା ରୁଜୁ କରି ୨୨ଜଣ ଓ ଗୁରୁବାର ୬ଟି ମାମଲା ରୁଜୁ କରି ୭ଜଣଙ୍କୁ ଗିରଫ କରାଯାଇଥିବା ଥାନାଧିକାରୀ ସାବିତ୍ରୀ ବଳ ସୂଚନା ଦେଇଛନ୍ତି।
