ଚୌଦ୍ୱାର,୧ା୪(ଡି.ଏନ୍.ଏ): ଭୟାବହ କରୋନାକୁ ପ୍ରତିହତ କରିବା ପାଇଁ ସମଗ୍ର ଦେଶରେ ଲାଗୁ ହୋଇଛି ୨୧ ଦିନିଆ ଲକ୍ଡାଉନ। ଏହାକୁ ସମର୍ଥନ କରି ଜନସାଧାରଣ ନିଜ ନିଜ ଘରେ ରହୁଥିବାବେଳେ ସର୍ବସାଧାରଣ ସ୍ଥାନଗୁଡ଼ିକ ଶୂନଶାନ ହୋଇପଡ଼ିଛି। ଏଭଳି ସ୍ଥିତିରେ ପ୍ରାପ୍ତ ବୟସ୍କମାନେ ନିଜକୁ ପରିସ୍ଥିତି ସହ ଖାପ୍ଖୁଆଇ ଚଳାଇ ନେଉଥିବାବେଳେ ଘରେଥିବା ପିଲାମାନଙ୍କ ପ୍ରତି ସମସ୍ୟା ସୃଷ୍ଟି କରିଛି। ପିଲାମାନଙ୍କ ସବୁପ୍ରକାର ଖେଳ ବନ୍ଦ ରହିବା ହେତୁ ସେମାନେ ମାନସିକ ସ୍ତରରେ ଅସ୍ଥିର ହେବା, ଚିଡ଼ିଚିଡ଼ି ହେବା, ଖାଇବା କମାଇବା ଆଦି ଲକ୍ଷଣ ଦେଖାଯାଉଛି। ପିଲାମାନଙ୍କ ମନକୁ ପ୍ରଫୁଲ୍ଲ କରିବାକୁ ଚୌଦ୍ୱାର ଅଞ୍ଚଳରେ ଥିବା ଶିଶୁ ଅନୁଷ୍ଠାନ ଶିଶୁ ସଦନରେ ଯୋଗ କରାଯିବା ସହ ବିଭିନ୍ନ ପ୍ରକାର ଖେଳ ଶିଖାଯାଉଥିବାର ଦେଖିବାକୁ ମିଳୁଛି। ୧୦୦ରୁ ଊର୍ଦ୍ଧ୍ୱ ପିଲା ଏହି ଅନୁଷ୍ଠାନରେ ଥିବାବେଳେ ସମସ୍ତଙ୍କୁ ସଚେତନ କରିବା ସହ ବିଭିନ୍ନ ଖେଳ ଶିଖାଉଛନ୍ତି ଅନୁଷ୍ଠାନର ମୁଖ୍ୟ ତଥା ହିନ୍ଦ୍ ସେବକ ସଂଘର ରାଷ୍ଟ୍ରୀୟ ଅଧ୍ୟକ୍ଷ ଦାମୋଦର ସାହୁ। ଶିଶୁ ସଦନରେ ପିଲାମାନଙ୍କୁ ଧାର୍ଯ୍ୟ ଦୂରତା ରକ୍ଷାକରି ପୃଥକ୍ ଭାବେ ରଖା ଯାଇଥିବାବେଳେ ପିଲାମାନଙ୍କ ପାଇଁ ପୃଥକ୍ ଭାବେ ଖାଇବା ବ୍ୟବସ୍ଥା କରାଯାଇଛି। ଶିଶୁ ସଦନର ନର୍ସ ଓ ଫାର୍ମାସିଷ୍ଟ ନିୟମିତ ଭାବେ ପିଲାମାନଙ୍କର ସ୍ବାସ୍ଥ୍ୟ ପରୀକ୍ଷା କରୁଛନ୍ତି। ପିଲାମାନଙ୍କୁ ମାନସିକ ସ୍ତରରେ ସୁସ୍ଥ ରଖିବା ପାଇଁ ପିଲାଙ୍କ ଦାୟିତ୍ୱରେ ଥିବ ଗୃହମାତାମାନେ ବ୍ୟକ୍ତିଗତ ଭାବେ ଚିତ୍ରାଙ୍କନ, ହସ୍ତ କଳା, ଗଳ୍ପ ଓ କବିତା ଲିଖନ, ସଂଗୀତ ପରିବେଷଣ, ଯୋଗ ଆଦି ବହୁବିଧ କାର୍ଯ୍ୟରେ ପିଲାମାନଙ୍କୁ ନିୟୋଜିତ ରଖୁଛନ୍ତି। ଟାଙ୍ଗୀ ଉନ୍ନୀତ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରର ଡାକ୍ତର ନିୟମିତ ଶିଶୁ ସଦନ ପରିଦର୍ଶନ କରି ପିଲାମାନଙ୍କ ସ୍ବାସ୍ଥ୍ୟପରୀକ୍ଷା କରିବା ସହ କରୋନା ସମ୍ପର୍କରେ ସଚେତନ କରୁଛନ୍ତି। ଛୋଟ ପିଲାମାନଙ୍କୁ ବିଶେଷ ଧ୍ୟାନ ରଖାଯାଉଥିବା ଅନୁଷ୍ଠାନ ମୁଖ୍ୟ କହିଛନ୍ତି। ଅନୁଷ୍ଠାନର ଉପଦେଷ୍ଟା କମିଟି ଚେୟାରମ୍ୟାନ୍ ମେଜର ଜେନେରାଲ ବସନ୍ତ କୁମାର ମହାପାତ୍ର ନିୟମିତ ଭାବେ ପିଲାମାନଙ୍କ ସ୍ଥିତି ସମ୍ପର୍କରେ ବୁଝିବା ସହ ସେମାନଙ୍କ ଖାଦ୍ୟପେୟ ଓ ମନୋରଞ୍ଜନ ପାଇଁ ପରାମର୍ଶ ଦେଉଥିବାବେଳେ କର୍ମଚାରୀମାନେ ସହାୟତା କରୁଛନ୍ତି।
