ରୂପ୍ସା, ୧୪।୧୨(ଡି.ଏନ.ଏ.)-ଦକ୍ଷିଣ-ପୂର୍ବ ରେଳପଥର ଖଡ଼ଗପୁର ଡିଭିଜନ ଅନ୍ତର୍ଗତ ବାଲେଶ୍ୱର ଜିଲା ରୂପ୍ସା ରେଳ ଜଙ୍କଶନଠାରେ ଥିବା ରେଲୱେ ଜାଗାରୁ ଶନିବାର ଜବରଦଖଲ ଉଚ୍ଛେଦ କରାଯାଇଛି। ଷ୍ଟେଶନ ସମ୍ମୁଖ ଏବଂ ଉତ୍ତର-କେବିନଠାରେ ଥିବା ୩୦ଜଣ ବ୍ୟବସାୟୀଙ୍କ ଦୋକାନ କେବିନ ଓ ଅସ୍ଥାୟୀ ଗୃହକୁ ଜେସିବି ଯୋଗେ ଭାଙ୍ଗି ଦିଆଯାଇଛି। ଫଳରେ ଜଳଖିଆ, ଚା’, ପାନ, ତେଲଭାଜି, ଟେଲରିଂ, ସେଲୁନ, ଲଣ୍ଡ୍ରି ଓ ସାଇକେଲ ମରାମତି ଆଦି ଦୋକାନରେ ବ୍ୟବସାୟ କରି ଗୁଜୁରାଣ ମେଣ୍ଟାଉଥିବା ୩୦ଜଣ ଦୋକାନୀଙ୍କ ଜୀବିକା ଠପ୍ ହୋଇଯାଇଥିବା ବ୍ୟବସାୟୀ ସଂଘ ପକ୍ଷରୁ ଅଭିଯୋଗ କରାଯାଇଛି। ଦୁର୍ଦ୍ଦିନରେ ଥିବା ଏହି ବ୍ୟବସାୟୀଙ୍କ ପରିବାରର ପେଟପାଟଣା ପାଇଁ ସରକାରଙ୍କ ତରଫରୁ ବନ୍ଦୋବସ୍ତ କରାଯିବାକୁ ସାଧାରଣରେ ଦାବି ହୋଇଛି।
ଦୀର୍ଘଦିନ ଧରି ଏହି ରେଳବାଇ ଜାଗାରେ ସେମାନେ ବ୍ୟବସାୟ ଚଳାଇ ଆସୁଥିଲେ। ରେଳ ମନ୍ତ୍ରଣାଳୟ ପକ୍ଷରୁ ମିଳିଥିବା ସୂଚନା ମୁତାବକ ଖୁବ୍ଶୀଘ୍ର ଷ୍ଟେଶନରେ ପୂର୍ବପଟ ଦେଇ ନୂତନ ଭାବେ ତୃତୀୟ ରେଳଧାରଣା ସମ୍ପ୍ରସାରଣ କାର୍ଯ୍ୟ ଆରମ୍ଭ ହେବ। ଏହାକୁ ଦୃଷ୍ଟିରେ ରଖି ରେଳପଥ ଜେନେରାଲ ମ୍ୟାନେଜର ସଞ୍ଜୟ ମହାନ୍ତିଙ୍କ ନିର୍ଦ୍ଦେଶକ୍ରମେ ଆରପିଏଫ ଆଇଆଇସି ଜେଏନ୍ ମହାପାତ୍ର, ଏସ୍ଆଇ ଭଗବାନ ସିଂହ, ରୂପ୍ସା ଥାନା ଏଏସ୍ଆଇ ନରହରି ମହାଳିକ, ଷ୍ଟେଶନ ମ୍ୟାନେଜର ଶ୍ରୀପତି ରାଉତଙ୍କ ସମେତ ଆରପିଏଫ ଓ ରୂପ୍ସା ଥାନା ପୋଲିସ ଫୋର୍ସ ଉପସ୍ଥିତିରେ ଜବରଦଖଲ ଉଚ୍ଛେଦ କରାଯାଇଥିଲା। ଏନେଇ ପୂର୍ବରୁ ବିଭାଗ ପକ୍ଷରୁ ସମସ୍ତ ବ୍ୟବସାୟୀଙ୍କୁ ନୋଟିସ୍ ଜାରି କରାଯାଇଥିଲା।
