ବିଞ୍ଝାରପୁର,୫ା୧୨(ଡି.ଏନ୍.ଏ): ବିଞ୍ଝାରପୁର ଥାନା ଅନ୍ତର୍ଗତ କଲ୍ୟାଣପୁର ପଞ୍ଚାୟତ ରୁଦ୍ରପୁର ଗ୍ରାମରେ ସୋମବାର ସନ୍ଧ୍ୟାରେ ରାଜନୈତିକ ବିବାଦରୁ ସଂଘଠିତ ଗୋଷ୍ଠୀ ସଂର୍ଘଷ ଘଟଣାରେ ପୋଲିସର କାର୍ଯ୍ୟଧାରାକୁ ନେଇ ପ୍ରଶ୍ନ ଉଠାଇଛି ଭାଜପା। ଏହି କ୍ରମରେ ବୁଧବାର ପୁର୍ବାହ୍ନରେ ଥାନା ସମ୍ମୁଖରେ ଭାଜପା ଜିଲା ମହିଳା ସଭାନେତ୍ରୀ ବବିତା ମଲ୍ଲିକ, କଲ୍ୟାଣପୁର ପଞ୍ଚାୟତର ସଦ୍ୟ ନିଲମ୍ବିତ ସରପଞ୍ଚ ସୁନିତା ନାୟକଙ୍କ ନେତୃତ୍ୱରେ ଶତାଧିକ ମହିଳା କର୍ମୀଙ୍କ ସମେତ ଭାଜପାର ଛାମୁଆ କର୍ମୀ ଧାରଣାରେ ବସିବା ସହ ପୋଲିସର କାର୍ଯ୍ୟଧାରାକୁ ନିନ୍ଦା କରିଥିଲେ। ପୂର୍ବରୁ ଥାନାରେ ଉପସ୍ଥିତ ଥିବା ଯାଜପୁର ଏସଡିପିଓ ରବିନ୍ଦ୍ର କୁମାର ଜେନା, ମଙ୍ଗଳପୁର ଥାନା ଅଧିକାରୀ ଅସିତ ରଞ୍ଜନ ମହାନ୍ତି ଧାରଣାସ୍ଥଳକୁ ଯାଇ ଧାରଣାକାରୀ ବୁଝାଉଥିବାବେଳେ ବିଞ୍ଝାରପୁର ଥାନାଧିକାରୀଙ୍କ ବିରୋଧରେ ଧାରଣାକାରୀମାନେ ଅଭିଯୋଗ ଆଣିଥିଲେ। ରୁଦ୍ରପୁର ଗୋଷ୍ଠୀ ସଂର୍ଘଷ ଘଟଣାରେ ପୋଲିସ ପ୍ରକୃତ ଅଭିଯୁକ୍ତଙ୍କୁ ଗିରଫ ନ କରି ଅକ୍ରୋଶମୂଳକ ଭାବେ କଲ୍ୟାଣପୁର ଗ୍ରାପର ପୂର୍ବତନ ସରପଞ୍ଜ ମୁକ୍ତିକାନ୍ତ ସାମଲଙ୍କୁ ଗିରଫ କରିଥିବା ଅଭିଯୋଗ କରିଥିଲେ। ପରେ ବିଞ୍ଝାରପୁର ଥାନା ଅଧିକାରୀ ଶିବଚରଣ ବେହେରା ଧାରଣାସ୍ଥଳକୁ ଯାଇ ରୁଦ୍ରପୁର ଗୋଷ୍ଠୀ ସଂର୍ଘଷ ସମ୍ପର୍କରେ ସମସ୍ତ ଅଭିଯୋଗର ତଥ୍ୟ ଦେବା ସହ ଏହି ଘଟଣାରେ ଗିରଫ ହୋଇଥିବା କଲ୍ୟାଣପୁର ଗ୍ରାପର ପୂର୍ବତନ ସରପଞ୍ଚ ମୁକ୍ତିକାନ୍ତ ସାମଲଙ୍କ ନାମରେ ଥାନାରେ ୭ଟି ମାମଲା ଥିବା ପ୍ରକାଶ କରିଥିଲେ। ଏସଡିପିଓ ଜେନା ସମସ୍ତ ଘଟଣାର ନିରପେକ୍ଷ ତଦନ୍ତ କରାଯାଇ କାର୍ଯ୍ୟାନୁଷ୍ଠାନ ଗ୍ରହଣ କରାଯିବା ପ୍ରତିଶ୍ରୁତି ଦେବାରୁ ଧାରଣାସ୍ଥଳରୁ ଧାରଣାକାରୀମାନେ ଉଠିଥିଲେ। ଏହି ଅବସରରେ ସଭାନେତ୍ରୀ ବବିତା ମଲ୍ଲିକଙ୍କ ନେତୃତ୍ୱରେ ଧାରଣାକାରୀମାନେ ଘଟଣା ସମ୍ପର୍କରେ ପୋଲିସ ମହାନିଦ୍ଦେର୍ଶକ ଓଡ଼ିଶାଙ୍କ ଉଦ୍ଦେଶ୍ୟରେ ଏକ ସ୍ମାରକପତ୍ର ପଦାନ କରିଥିଲେ। ଏହି ଧାରଣାରେ ଅନ୍ୟମାନଙ୍କ ମଧ୍ୟରେ ସୁନିତା ନାୟକ, ନିରଞ୍ଜନ ବେଉରିଆ, କିଶୋର ଚନ୍ଦ୍ର ମିଶ୍ର, ବସନ୍ତ ସାମଲ, ଅରୁଣଜିତ ରାଉତରାୟ,ଦୀନବନ୍ଧୁ ଦାସଙ୍କ ସମେତ ଶତାଧିକ ମହିଳାକର୍ମୀ ଉପସ୍ଥିତ ରହିଥିଲେ।
