ଅନୁଗୋଳ ଅଫିସ, ୨।୬- ଅନୁଗୋଳ ପୌରାଞ୍ଚଳର ୧୬ନଂ. ଓ୍ବାର୍ଡରେ ଥିବା ଗୀତାଗ୍ରାମ ରାସ୍ତାରେ ଭାସୁଛି ପୋଲିସ ଟ୍ରେନିଂ କଲେଜ (ପିଟିସି) ନର୍ଦ୍ଦମା ପାଣି। ପଚାଶଢ଼ା ପାଣି ସହ ଶୌଚାଳୟ ଜଳ ରାସ୍ତାରେ ଜମିଥିବାରୁ ଅଞ୍ଚଳ ଦୁର୍ଗନ୍ଧରେ ଫାଟି ପଡ଼ୁଛି। ଫଳରେ ଯାତାୟାତ ବେଳେ ଗ୍ରାମବାସୀଙ୍କୁ ନାକରେ ରୁମାଲ ଦେଇ ଯିବାକୁ ପଡ଼ୁଛି। ଦୀର୍ଘଦିନ ହେଲା ଏପରି ସ୍ଥିତି ସୃଷ୍ଟି ହୋଇଥିଲେ ବି ପିଟିସି କର୍ତ୍ତୃପକ୍ଷ କୌଣସି ପ୍ରତିକାର କରୁନାହାନ୍ତି। ଗ୍ରାମବାସୀ ଅଭିଯୋଗ କଲେ ‘ପାଣିର ଧର୍ମ ନିମ୍ନଗାମୀ’ କହି କର୍ତ୍ତୃପକ୍ଷ ବିତଣ୍ଡା ଯୁକ୍ତି କରୁଥିବା ଗ୍ରାମବାସୀ କହିଛନ୍ତି। ଏ ନେଇ ପୌରପାଳିକାଠାରୁ ଜିଲାପାଳଙ୍କ ଅଫିସ ଯାଏ ସବୁଠି ଅଭିଯୋଗ କରାଯାଇଥିଲେ ମଧ୍ୟ କିଛି ସୁଫଳ ମିଳୁ ନ ଥିବା ଗ୍ରାମବାସୀ ପ୍ରକାଶ କରିଛନ୍ତି।
ଗ୍ରାମବାସୀଙ୍କ ଅଭିଯୋଗ ଅନୁଯାୟୀ, ପିଟିସିରେ ଥିବା ହଷ୍ଟେଲର ଗାଧୁଆ ପାଣି ସହ ରୋଷେଇ ଘର ପାଣି ରାସ୍ତାକୁ ଛଡ଼ାଯାଉଛି। ଏପରି କି ହଷ୍ଟେଲ ଶୌଚାଳୟ ପାଇପ୍ ଫାଟି ଯାଇଥିବାରୁ ଉକ୍ତ ପାଣି ମଧ୍ୟ ରାସ୍ତା ଉପରକୁ ଚାଲି ଆସୁଛି। ପ୍ରବଳ ଗନ୍ଧ ହେଉଥିଲେ ବି ଗଁା ରାସ୍ତା ହୋଇଥିବାରୁ ଲୋକେ ଯାତାୟାତ କରିବାକୁ ବାଧ୍ୟ ହେଉଛନ୍ତି। ଏପରି ଅସ୍ବାସ୍ଥ୍ୟକର ପରିବେଶ ଯୋଗୁ ଗଁାରେ ସ୍ବାସ୍ଥ୍ୟ ସମସ୍ୟା ଦେଖାଦେବାର ଆଶଙ୍କା କରାଯାଉଛି। ଏ ନେଇ ଅଞ୍ଚଳବାସୀ ପିଟିସି, ପୌର କର୍ତ୍ତୃପକ୍ଷ ଓ ଜିଲାପାଳଙ୍କ କାର୍ଯ୍ୟାଳୟରେ ବାରମ୍ବାର ଅଭିଯୋଗ କରିଛନ୍ତି। କିନ୍ତୁ ଘଟଣାର ସମାଧାନ କରାଯାଉ ନାହିଁ। ତେଣୁ ପିଟିସି ଅଧ୍ୟକ୍ଷ ତଥା ଉତ୍ତର କେନ୍ଦ୍ରାଞ୍ଚଳ ଡିଆଇଜି ନରସିଂହ ଭୋଳଙ୍କୁ ଭେଟି ଅଭିଯୋଗ କରିବେ ବୋଲି ଅଞ୍ଚଳର ବୀରଭାନୁ ସିଂହ, କିଶୋର ଚନ୍ଦ୍ର ସାହୁ, ତପନ କୁମାର ଦେହୁରୀ, ମନୋଜ ପଣ୍ଡା, କିଶୋର ଶତପଥୀ, ସତ୍ୟବ୍ରତ ପ୍ରଧାନ, ସସ୍ମିତା ବଳ ପ୍ରମୁଖ ପ୍ରକାଶ କରିଛନ୍ତି। ଘଟଣା ସମ୍ପର୍କରେ ପିଟିସି ଅଧ୍ୟକ୍ଷ ଡିଆଇଜି ଭୋଳ କହିଛନ୍ତି, ଗ୍ରାମବାସୀଙ୍କ ସମସ୍ୟା ବିଷୟରେ ଜାଣିନାହିଁ। ଯଦି ଏପରି କିଛି ହୋଇଥାଏ ତା’ହେଲେ ସମାଧାନ ବ୍ୟବସ୍ଥା କରାଯିବ।
