ଲକ୍ଷ୍ନୌ: ସାରା ଦେଶରେ ଲକ୍ଡାଉନ ଜାରି ଥିବା ଯୋଗୁ ଲୋକେ ଘର ଭିତରେ ନିଜକୁ ବନ୍ଦ କରି ରଖିଛନ୍ତି। ଫଳରେ ବାହାରେ ବୁଲୁଥିବା ପ୍ରାଣୀ ଖାଦ୍ୟ ପାଇପାରୁ ନାହାନ୍ତି। ଏପରି ସ୍ଥିତିରେ ଉତ୍ତରପ୍ରଦେଶରେ ସୋମବାର ଏକ ଘଟଣା ଚର୍ଚ୍ଚାର ବିଷୟ ପାଲଟିଛି। କରୋନା ମୁକାବିଲାରେ ନ୍ୟସ୍ତ କେତେଜଣ ପୋଲିସ କର୍ମଚାରୀ ଖାଉଥିବାବେଳେ ସେଠାରେ ଏକ ମାଙ୍କଡ଼ ପହଞ୍ଚି ସେମାନଙ୍କୁ ଖାଇବା ମାଗିବାକୁ ହାତ ବଢ଼ାଇଥିଲା। ପୋଲିସ କର୍ମୀମାନେ ମାନବିକତା ଦେଖାଇ ମାଙ୍କଡକୁ ଫଳ ଦେବାରୁ ସାଧାରଣରେ ପ୍ରଂଶସା କରାଯାଇଛି।
ଜାଲୋନ ଜିଲା ଉରଇ ଅଞ୍ଚଳରେ ଡ୍ୟୁଟି କରୁଥିବା ସମୟରେ ଖାଇବା ପାଇଁ ପାଖରେ ରଖିଥିବା କିଛି ଫଳ ବାହାର କରିଥିଲେ। ଏହା ଦେଖି ସେଠାରେ ଥିବା ଏକ ଭୋକିଲା ମାଙ୍କଡ଼ ଫଳ ନେବାକୁ ହାତ ବଢ଼ାଇଥିଲା। ପୋଲିସ କର୍ମୀମାନେ ମାଙ୍କଡ଼କୁ ଫଳ ଦେବା ପରେ ସେ ଏହାକୁ ଖାଇବାରେ ଲାଗିଥିଲା। ହେଲେ ପେଟ ନ ପୂରିବାରୁ ମାଙ୍କଡ଼ଟି ସେଠାରୁ ଯାଇ ନ ଥିଲା। ଫଳରେ ପୋଲିସ କର୍ମୀ ଅଧିକ ଫଳ ଖାଇବାକୁ ଦେଇଥିଲେ। ପେଟ ପୂରିବା ପରେ ମାଙ୍କଡ଼ଟି ସେଠାରୁ ଚାଲିଯାଇଥିଲା। ସେଠାରେ ଦାୟିତ୍ୱରେ ଥିବା ଜଣେ ଏଏସ୍ଆଇଙ୍କ କହିବା ମୁତାବକ, ସେମାନେ ସେଠାରେ କିଛି ଫଳ ଖାଉଥିବା ବେଳେ ମାଙ୍କଡଟି ସେଠାରେ ପହଞ୍ଚି ସେମାନଙ୍କୁ ଅନାଇ ରହିଥିଲା। ପରେ ଆହୁରି ନିକଟକୁ ଆସି ସେମାନଙ୍କ ଆଡ଼କୁ ହାତ ବଢ଼ାଇଥିଲା। ପେଟପୂରା ଖାଇସାରିବା ପରେ ସେଠାରୁ ସେ ଚାଲିଯାଇଥିଲା। ସତରେ ଏଭଳି ସ୍ଥିତିରେ କେତେ ଅସୁବିଧାର ସମ୍ମୁଖୀନ ହେଉ ନ ଥିବେ ଏହି ପ୍ରାଣୀମାନେ।
