ଭୁବନେଶ୍ୱର,୧୭ା୪(ବ୍ୟୁରୋ): ଭୁବନେଶ୍ୱରରେ ବସବାସ କରୁଥିବା ଲୋକଙ୍କ ନିୟମିତ ସ୍ବାସ୍ଥ୍ୟ ପରୀକ୍ଷା କରାଯିବ। ଇଚ୍ଛୁକ ବ୍ୟକ୍ତିଙ୍କର ନମୁନା ସଂଗ୍ରହ କରାଯିବ। ସ୍ବାସ୍ଥ୍ୟ ପରୀକ୍ଷା ଓ ନମୁନା ପରୀକ୍ଷଣ ପାଇଁ ଭୁବନେଶ୍ୱର ଜନସାଧାରଣଙ୍କ ପକ୍ଷରୁ ବହୁ ଅନୁରୋଧ ଆସିବା ପରେ ଗୁରୁବାର ଭୁବନେଶ୍ୱର ମହାନଗର ନିଗମ (ବିଏମ୍ସି) ପକ୍ଷରୁ ଏହି ନିଷ୍ପତ୍ତି ନିଆଯାଇଛି। ନିୟୋଜିତ ଡାକ୍ତରୀ ଦଳର ସଂଖ୍ୟା ବଢ଼ାଇ ଦିଆଯାଇଛି। ଜୋନ୍ ସ୍ତରରେ ଏହି କାର୍ଯ୍ୟ ପ୍ରତି ବିଶେଷ ଭାବେ ଗୁରୁତ୍ୱ ଦିଆଯିବ। କୋଭିଡ୍-୧୯କୁ ଜୋନ୍ସ୍ତରରେ ନିୟନ୍ତ୍ରଣ କରିବା ପାଇଁ ଦାୟିତ୍ୱ ନେଇଥିବା ବରିଷ୍ଠ ଆଇଏଏସ୍ ଅଧିକାରୀମାନେ ଏହାର ତଦାରଖ କରିବେ ବୋଲି ବିଏମ୍ସି କମିଶନର ପ୍ରେମଚନ୍ଦ୍ର ଚୌଧାରୀ କହିଛନ୍ତି।
ଭୁବନେଶ୍ୱରରେ ଏବେ ରାଜ୍ୟର ସର୍ବାଧିକ କରୋନା ପଜିଟିଭ୍ ଚିହ୍ନଟ ହୋଇଛନ୍ତି। ସରକାର ୬ ବରିଷ୍ଠ ଆଇଏଏସଙ୍କ ଉପରେ ଦାୟିତ୍ୱ ନ୍ୟସ୍ତ କରିଛନ୍ତି। ସେମାନେ ତ୍ୱରିତ ପଦକ୍ଷେପ ନେବେ। ଅଧିକାରୀମାନେ ଭୁବନେଶ୍ୱରରେ ଥିବା ବସ୍ତିଅଞ୍ଚଳକୁ ଫୋକସ୍ରେ ରଖିଛନ୍ତି। ତେଣୁ ବସ୍ତି ଅଞ୍ଚଳରେ ଏବେ ପ୍ରତି ଦିନ ଘରକୁ ଘର ବୁଲି ସ୍ବାସ୍ଥ୍ୟ ପରୀକ୍ଷା କରଯିବ ବୋଲି କମିଶନର ଚୌଧାରୀ କହିଛନ୍ତି। ଉଲ୍ଲେଖଚଯୋଗ୍ୟ, ବୁଧବାର ଦାୟିତ୍ୱ ଗ୍ରହଣ କରିବା ପରେ ରାଜଧାନୀରେ କରୋନା ସଂକ୍ରମଣକୁ କିପରି ରୋକାଯାଇ ପାରିବ ସେନେଇ ୬ ବରିଷ୍ଠ ଆଇଏଏସ୍ ଅଧିକାରୀ ତତ୍ପରତାା ପ୍ରକାଶ କରିଛନ୍ତି।
ଦୃଢ଼ ହେବ କଣ୍ଟେନ୍ମେଣ୍ଟ କଟକଣା
ଭୁବନେଶ୍ୱରରେ ଏବେ କିଛି ଅଞ୍ଚଳରେ ସଂକ୍ରମିିତଙ୍କଠାରୁ ପାଖ ପଡ଼ୋଶୀ ସଂକ୍ରମିତ ହୋଇ ଥିବାର ପରିଲକ୍ଷିତ ହୋଇଛି। ଗୋଷ୍ଠୀ ସଂକ୍ରମଣ ହେବା ପୂର୍ବରୁ ଏଥିରେ ରୋକ୍ ଲଗାଇବା ପାଇଁ ଆଇଏଏସ ଅଧିକାରୀମାନେ ନିଷ୍ପତ୍ତି ନେଇଛନ୍ତି। ଭୁବନେଶ୍ୱରରେ ଯେକୌଣସି ଅଞ୍ଚଳ ଏବେ ବି କଣ୍ଟେନ୍ମେଣ୍ଟ ଅଞ୍ଚଳ ଭାବେ ପରିଗଣିତ ହେଉଛି, ସେଥିରେ କଟକଣା ବଢ଼ାଯିବ। ଡ୍ରୋନ୍ ଦ୍ୱାରା ଲୋକଙ୍କ ଗମନାଗମନ ପ୍ରତି ଦୃଷ୍ଟି ଦିଆଯିବ। କେହି ବି ନିୟମ ଖିଲାପ କରୁଥିବାର ନଜରକୁ ଆସିଲେ ତାଙ୍କ ପ୍ରତି ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ। ସେହିପରି ହୋମ୍ କ୍ୱାରାଣ୍ଟାଇନ୍ରେ ରହୁଥିବା ବ୍ୟକ୍ତିମାନେ ଯଦି ନିୟମ ଖିଲାପ କରୁଥିବାର ନଜରକୁ ଆସନ୍ତି ତାଙ୍କ ପ୍ରତି ମଧ୍ୟ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ନିଷ୍ପତ୍ତି ହୋଇଛି।
ଆଜିଠୁ କାର୍ଡ ନ ଥିବା ବ୍ୟକ୍ତିଙ୍କୁ ମିଳିବ ରାଶନ
ଯାହାର ରାଶନକାର୍ଡ ନାହିଁ ସେମାନଙ୍କୁ ରାଶନ ସାମଗ୍ରୀ ବଣ୍ଟନ କରାଯିବ। ଭୁବନେଶ୍ୱରରେ ବସବାସ କରୁଥିବା ଅନ୍ୟ ରାଜ୍ୟ ତଥା ଜିଲାର ଶ୍ରମିକଙ୍କ ପାଇଁ ଏବେ କୌଣସି କାମ ନଥିବାରୁ ସେମାନେ ନାହିଁ ନଥିବା ସମସ୍ୟାର ସମ୍ମୁଖୀନ ହେଉଛନ୍ତି। ଏହାକୁ ଲକ୍ଷ୍ୟରଖି ଅତ୍ୟାବଶ୍ୟକ ସାମଗ୍ରୀ ଯୋଗାଣ ଉପରେ ଗୁରୁତ୍ୱାରୋପ କରି ବରିଷ୍ଠ ଆଇଏଏସ୍ ଅଧିକାରୀମାନେ ଏହି ନିଷ୍ପତ୍ତି ନେଇଥିବା ଜଣାପଡ଼ିଛି।
