ଲାଠୋର, ୬ା୧(ଡି.ଏନ୍.ଏ.)- ରାଏଜ୍ ସରକାର ଦାଦନ ସମସିଆ ସଂଗେ ଯୁଝବାର ଲାଗି ଅନେକ୍ ଯୋଜନା କାଯ୍କାରୀ କରୁଛନ୍। ହେଲେ ଅନେକ ଜାଗାରେ ହକ୍ଦାର ହିତାଧିକାରୀ ସରକାରୀ ଯୋଜନାର ଲାଭ୍ ନାଇଁ ପାଏବାର। ଯେନ୍ଥିରଲାଗି ଗରିବ୍ ଦୁଖି ଉପେ ଶୂଇନ୍ ହେଇ କୁଟୁମବସିଆ ବାହାର ରାଏଜ୍କେ ଦାଦନ ଖଟିଯାଉଛନ୍। ଇଆଡ଼େ ରାଏଜ୍ ସରକାର ଦାଦନ ସମସିଆର ସମାଧାନ ସଂଗେ ଶ୍ରମିକମାନକର ସୁବିଧା ଲାଗି ନୂତନ ବଛର୍ରୁ ଶ୍ରମ ବିଭାଗକେ ୫-ଟି ଆର ‘ମୋ ସରକାର’ରେ ସାମିଲ କରିଛନ୍।
ସୂଚନା ଅନ୍ସାରେ ପଶ୍ଚିମ ଓଡ଼ିଶାର ବଲାଙ୍ଗୀର, କଳାହାଣ୍ଡି, ନୂଆପଡ଼ା, ବୌଦ୍ଧ, ସୁବର୍ଣ୍ଣପୁର ଜିଲାରୁ ଫିବଛର ବେଆଇନ୍ ହଜାର ହଜାର ଦାଦନ ଶ୍ରମିକ ଦଲାଲ୍ମାନକର ଜରିଆରେ ଚାଲାନ ହେଉଛନ୍। ଏନ୍ତା କି ଦଲାଲ ଜରିଆରେ ଚାଲାନ ହେଉଥିବାର ଦାଦନ ଶ୍ରମିକମାନକର ସୂଚନା ବି ଥାନୀଅ ପରଶାସନ ପାସେ ନାଇଁ ରହିବାର। ଏହେଦେ ଧାନ ଅମଲ ସରି ଆଏଲାବେଲେ ଶ୍ରମିକମାନକୁ ଆଗରୁ ବଏନା ଦେଇଥିବାର ଦାଦନ ସରଦାରମାନେ ଭିନେ ଭିନେ ରେଲ ଷ୍ଟେଶନରୁ ଚାଲନ କରୁଛନ୍। ବଲାଙ୍ଗୀର ଜିଲା ହରିଶଙ୍କର ରୋଡ଼ ରେଲ ଷ୍ଟେଶନରୁ ଫିଦିନ ଶହ ଶହ ଦାଦନ ଶ୍ରମିକ ଦେଶର ଭିନେ ଭିନେ ରାଏଜ୍କେ ଚାଲାନ ହେଉଛନ୍। ହେଲେ ଇ ଘଟନା ଥାନୀଅ ଶ୍ରମ ବିଭାଗ ଆର ପୁଲିସ ନଜରକେ ନାଇଁ ଆଏବାର। ଇ କଥାଟା ବୁଧିଜୀବୀକୁଁ ଆଶିରିଯ୍ କରିଛେ। ଇଆଡ଼େ ବେଲପଡ଼ା, ଖପ୍ରାଖୋଲ ବ୍ଲକର ୨୦ଟା ପଁଚେତ୍କେ ରାଏଜ୍ ସରକାର ଦାଦନ ପରବନ ଅଂଚଲ ହିସାବ୍ଥି ରହିଖିଛନ୍। ଥାନୀଅ ଶ୍ରମିକମାନେ କେନ୍ଥେଇ ବାହାର ରାଏଜ୍କେ ଦାଦନ ଯାଇ ହଇରାନ ହରକତ ନାଇଁ ହେବେ ସେଥିରଲାଗି ରାଏଜ୍ ସରକାର ଆର ଟାଟା ଟ୍ରଷ୍ଟର ମିଲିତରେ ୧୩୪ କୋଟି ଟଁକା ଖରଚ୍ ଅଟକଲଥି ଯୋଜନା ତିଆର କରାଯାଇଛେ ସତ୍। ହେଲେ ଇଥିର ପରଭାବ ଅଂଚଲରେ ଦେଖ୍ବାକେ ନାଇଁ ମିଲବାର। ସେନ୍ତା ବଲାଙ୍ଗୀର ଜିଲାର ଟିଟିଲାଗଡ଼, ମୁରିବାହାଲ, ବଙ୍ଗୋମୁଣ୍ଡା, ତୁରେକେଲା, ଖପ୍ରାଖୋଲ ଆର ବେଲପଡ଼ା ବ୍ଲକର ଶ୍ରମିକମାନକୁ ଏମ୍ଜିଏନ୍ଆର୍ଇଜିଏସ୍ ଯୋଜନାରେ ୨ଶହ ଦିନର କାମ୍ ଯୁଗେଇ ଦେବାର ଯୋଜନା ତିଆର ହେଇଛେ ସତ୍। ହେଲେ ଅଂଚଲରୁ ଦାଦନ ଶ୍ରମିକ ଚାଲାନ ବଁଦ୍ କରବାରେ ପରଶାସନ ଫେଲମାରିଛେ। ଏନ୍ତାଥି ଦାଦନ ସରଦାରମାନେ ଶ୍ରମିକମାନକୁ ଟଁକା ଲୋଭ୍ ଦେଖେଇ ଚାଲାନ କରୁଛନ୍। ନିୟମ ହିସାବେ ଲାଇସେନ୍ସ ପାଇଥିବାର ଏଜେଣ୍ଟ ଶ୍ରମିକମାନକୁ ନେଇପାରବେ। ଇଥିରଲାଗି ଅନେକ ନିୟମ ରହିଛେ। ହେଲେ ସରକାରୀ ଅଧ୍କାରୀ, କରମ୍ଚାରୀକର ଖାମ୍ଖିଆଲି ମନଭାବ ଲାଗି ଶ୍ରମିକମାନେ ସରକାରୀ ସୁବିଧା ସୁଯୋଗ ନାଇଁପାଏବାର। ଇତାର ଫାଏଦା ଉଠେଇ ଦଲାଲମାନେ ଫିଦିନ ଶହ ଶହ ଶ୍ରମିକକୁଁ ଲୁଚାଛପାରେ ଉନିଅଁା ରାଏଜ୍କେ ଚାଲାନ କରୁଛନ୍। ଇଆଡ଼େ ଦାଦନ ଚାଲନ୍ ଉପରେ ଲଗାମ୍ କସବାକେ ଖାସ୍କରି ଖପ୍ରାଖୋଲ, ବେଲପଡ଼ା ବ୍ଲକରେ ଶ୍ରମ ନିରୀକ୍ଷକ କାଯ୍ କରୁଛନ୍। ହେଲେ ସେମାନକର ପାସେ ବି କେନ୍ ଗଁାରୁ କେତେ ଶ୍ରମିକ ବାହାର ରାଏଜେ ଦାଦନ ଖଟୁଛନ୍ ତାର ହିସାବକିତାବ ନଁାଇଁନ। ଇ ବାବ୍ଦେ ଜିଲା ଶ୍ରମ ଅଧ୍କାରୀ ସୁରେଶ ବେହେରାକୁଁ ପଚ୍ରାଲାରୁ ଯେତେ ଜଲ୍ଦି ହେବା ଇ ଦିଗେ ପଦକ୍ଷେପ ନିଆଯିବା ବଲି ସେ କହିଛନ୍।
