ବାରିପଦା ଅଫିସ,୮ା୧- ସବୁବେଳେ ଅବହେଳିତ ହୋଇ ପଡ଼ି ରହିଥିବା ଦେବୋତ୍ତର ବିଭାଗକୁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଗସ୍ତର ଦିନକ ପୂର୍ବରୁ ସଜବାଜ କରିଛି ଜିଲା ପ୍ରଶାସନ। ଦେବୋତ୍ତର ବିଭାଗ ଅଧୀନରେ ଥିବା ଜିଲାର ୧୦ଟି ମନ୍ଦିର ଓ ୧୦ଟି ମଠରେ ପୂଜା କାର୍ଯ୍ୟ ତଥା ମନ୍ଦିରର ଅନ୍ୟାନ୍ୟ କାର୍ଯ୍ୟ କରୁଥିବା ସେବାୟତମାନଙ୍କୁ ୨୦୧୯-୨୦୧୦ ବର୍ଷରୁ ଆଗାମୀ ୩ ବର୍ଷ ପାଇଁ ବୀମାଭୁକ୍ତ କରିଛି ବିଭାଗ। ବୀମା ବାବଦକୁ ଥିବା ସମସ୍ତ ପାଉଣା ୩ ବର୍ଷ ପର୍ଯ୍ୟନ୍ତ ଦେବୋତ୍ତର ବିଭାଗ ଦେବାକୁ ନିଷ୍ପତ୍ତି ହୋଇଥିବା ବେଳେ ଏହା ପରେ ସେବାୟତମାନେ ନିଜ ନିଜ ପାଉଣା ଦେବେ। ୭୦ ବର୍ଷରୁ ତଳକୁ ଓ ୫୦ ବର୍ଷରୁ ତଳକୁ ମାପଦଣ୍ଡରେ ନିଆଯାଇ ସେବାୟତମାନଙ୍କୁ ବୀମା ପରିସର ଭୁକ୍ତ କରାଯାଇଛି। ସେହିପରି ସର୍ବସାଧାରଣଙ୍କୁ ଦେବୋତ୍ତର ବିଭାଗର ସମସ୍ତ ମଠ ମନ୍ଦିର, ବିଶେଷ କରି ବାରିପଦା ଜଗନ୍ନାଥ ମନ୍ଦିର ସମ୍ପର୍କରେ ସୂଚନା ପ୍ରଦାନ କରିବା ପାଇଁ ସ୍ବତନ୍ତ୍ର ଏକ ୱେବ ସାଇଟ(ଶ୍ରୀଶ୍ରୀହରିବଳଦେବ.ଇନ) ମଧ୍ୟ ଉନ୍ମୋଚନ କରାଯାଇଛି। ଏହି ୱେବ ସାଇଟ ଜରିଆରେ ଲୋକେ ମଠ ଓ ମନ୍ଦିରଗୁଡିକ ସମ୍ପର୍କରେ ଜାଣିପାରିବା ସହିତ ଅନ ଲାଇନରେ ପୂଜା ପାଇଁ ମଧ୍ୟ ଆବେଦନ କରିପାରିବେ। ଅନଲାଇନ ଯୋଗେ ଆବେଦନ ପରେ ପୂଜା କରାଯାଇ ସମ୍ପୃକ୍ତ ବ୍ୟକ୍ତିଙ୍କୁ ପାର୍ସଲ ଯୋଗେ ପ୍ରସାଦ ମଧ୍ୟ ପଠାଯିବାର ବ୍ୟବସ୍ଥା ରହିଛି। କୌଣସି ବ୍ୟକ୍ତି ଚାହିଁଲେ ମଠ ଓ ମନ୍ଦିରକୁ ଦାନ ମଧ୍ୟ ଦେଇ ପାରିବେ। ଜିଲାପାଳଙ୍କ କାର୍ଯ୍ୟାଳୟ ସ୍ଥିତ ଫେସିଲେସନ ସେଣ୍ଟରରେ ଜିଲାପାଳ ବିନୀତ ଭରଦ୍ୱାଜ ଏହି କାର୍ଯ୍ୟକ୍ରମର ଶୁଭାରମ୍ଭ କରିବା ସହିତ ୱେବ ସାଇଟକୁ ଉନ୍ମୋଚନ କରିଥିଲେ। ଦେବୋତ୍ତର ବିଭାଗ ସହକାରୀ ନିର୍ବାହୀ ଅଧିକାରୀ ବିଶ୍ୱରଞ୍ଜନ ମହାନ୍ତିଙ୍କ ପରିଚାଳନାରେ ଅନୁଷ୍ଠିତ କାର୍ଯ୍ୟକ୍ରମରେ ଅତିରିକ୍ତ ଜିଲାପାଳ ସ୍ବଧା ଦେବ ସିଂ, ବାରିପଦା ଉପଜିଲାପାଳ ତଥା ଦେବୋତ୍ତର ଅଧିକାରୀ ଦିବ୍ୟଜ୍ୟୋତି ପରିଡା ଓ ଆଇଏଏସ ପ୍ରୋବେସନର ଭୁବନେଶ ପାଟିଲ ପ୍ରମୁଖ ଉପସ୍ଥିତ ଥିଲେ। ଉଲ୍ଲେଖଯୋଗ୍ୟ ଯେ, ବାରିପଦାକୁ ଦ୍ୱିତୀୟ ଶ୍ରୀକ୍ଷେତ୍ର ମାନ୍ୟତା ସହିତ ସେବାୟତମାନଙ୍କୁ ବିଭିନ୍ନ ସୁବିଧା ପ୍ରଦାନ ଓ ମନ୍ଦିର ରକ୍ଷଣାବେକ୍ଷଣ ନେଇ ବାରିପଦା ଜଗନ୍ନାଥ ମନ୍ଦିରର ସେବାୟତମାନେ ଦୁଇ ଥର ଭୁବନେଶ୍ୱର ଅଭିମୁଖେ ପଦଯାତ୍ରାରେ ବାହାରିଥିଲେ। ପଦଯାତ୍ରା ପରେ ସେମାନଙ୍କୁ ଖୋଦ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ସାକ୍ଷାତ କରି ସମସ୍ତ ଦାବି ପୂରଣ କରିବା ନେଇ ପ୍ରତିଶ୍ରୁତି ଦେଇଥିଲେ। ମାତ୍ର ଅଦ୍ୟାବଧି କୌଣସି ଦାବି ପୂରଣ ହୋଇ ନାହିଁ। ଅନ୍ୟ ପକ୍ଷେ ରାଜ୍ୟ ସରକାର ବିଭିନ୍ନ ମଠ ମନ୍ଦିର ପାଇଁ ସ୍ବତନ୍ତ୍ର ପ୍ୟାକେଜ ଘେଷଣା କରି ଚାଲୁଛନ୍ତି। ହେଲେ ବାରିପଦା ମନ୍ଦିରକୁ ଅନୁଦାନ ଦେଉ ନାହାନ୍ତି। ତେବେ ମୁଖ୍ୟମନ୍ତ୍ରୀଙ୍କ ଗସ୍ତ ସମୟରେ ସେବାୟତମାନେ ବିରୋଧ କରିବା ନେଇ ଗୁଇନ୍ଦା ବିଭାଗ ନିକଟରେ ଖବର ରହିଥିଲା। ଏହା ପରେ ସେବାୟତମାନଙ୍କ ଉଦ୍ଦେଶ୍ୟରେ ଦୀର୍ଘ ୭୦ ବର୍ଷ ହେବ କୌଣସି ପଦକ୍ଷେପ ନେଇ ନ ଥିବା ଦେବୋତ୍ତର ବିଭାଗର ହଠାତ ଏହି କାର୍ଯ୍ୟକ୍ରମ ଅନୁଷ୍ଠିତ କରିଥିବା ଚର୍ଚ୍ଚା ହେଉଛି। ଏନେଇ ଜିଲା ପ୍ରଶାସନର ମତ ଲୋଡି ଥିଲେ ମଧ୍ୟ ମତାମତ ମିଳିପାରି ନାହିଁ।
