ଭୁବନେଶ୍ୱର,୨୮।୨(ବ୍ୟୁରୋ): ସହରକୁ ପରିଷ୍କାର, ସ୍ବଚ୍ଛତା ରଖ, ଦୋକାନ ସାମ୍ନାରେ ଡଷ୍ଟବିନ୍ ରଖ। ଲୋକଙ୍କୁ ସେଥିରେ ବ୍ୟବହୃତ ସାମଗ୍ରୀ ପକାଇବା ପାଇଁ କୁହ ନଚେତ୍ ଭୁବନେଶ୍ୱର ମହାନଗର ନିଗମ (ବିଏମସି) ଫାଇନ୍ କାଟିବ। ଆବଶ୍ୟକ ପଡ଼ିଲେ ଦୋକାନକୁ ଭଙ୍ଗାଯିବ ବୋଲି ବିଏମ୍ସି କମିଶନର ପ୍ରେମଚନ୍ଦ୍ର ଚୌଧାରୀ କହିଛନ୍ତି। କମିଶନର ଚୌଧାରୀ ଗୁରୁବାର କଳ୍ପନା ଛକରୁ ରବି ଟକିଜ୍ ଛକ ଯାଏ ଅଚାନକ୍ କରିଥିବା ଷ୍ଟ୍ରିଟ୍ ଅପରେଶନରେ ଏହା କହିବା ସହ ନିୟମ ପାଳନ କରୁ ନ ଥିବା ଓ ପରିବେଶକୁ ପ୍ରଦୂଷଣ କରୁଥିବା ୨୦ରୁ ଊର୍ଦ୍ଧ୍ୱ ଅସ୍ଥାୟୀ ଦୋକାନକୁ ଭାଙ୍ଗିଛନ୍ତି ଓ ପାଖାପାଖି ୪୦ ହଜାର ଟଙ୍କାର ଫାଇନ୍ ଆଦାୟ କରିଥିବା ବିଏମ୍ସି ଡେପୁଟି କମିଶନର ଶୁଭେନ୍ଦୁ ସାହୁ ସୂଚନା ଦଇଛନ୍ତି।
ଦେକାନୀମାନେ ସହରକୁ କେତେ ମାତ୍ରାରେ ପ୍ରଦୂଷିତ କରୁଛନ୍ତି ତାକୁ ତଦାରଖ କରିବା ପାଇଁ ବିଏମ୍ସି ପକ୍ଷରୁ ଏକ ସ୍ବତନ୍ତ୍ର କାର୍ଯ୍ୟକ୍ରମ ଆରମ୍ଭ କରାଯାଇଥିବାବେଳେ ଏହା ସପ୍ତାହରେ ଦୁଇଦିନ କରାଯିବ। ଏହି ଦୁଇ ଦିନରେ ପରିମଳ ଦାୟିତ୍ୱରେ ଥିବା ଡେପୁଟି କମିଶନର ଶୁଭେନ୍ଦୁ ସାହୁ ଅଥବା କମିଶନର ଚୌଧାରୀ ସହରର ବିଭିନ୍ନ ସ୍ଥାନ ବୁଲିବା ସହ ଦୋକାନୀମାନଙ୍କ କାର୍ଯ୍ୟକଳାପ ପ୍ରତି ଧ୍ୟାନ ଦେବେ ବୋଲି ଜଣାପଡ଼ିଛି। ଏହି ମର୍ମରେ କମିଶନର ଚୌଧାରୀ ଗୁରୁବାର ଦେକାନୀମାନଙ୍କୁ ତାଗିଦ୍ କରିଥିବା ବିଏମ୍ସି ପକ୍ଷରୁ ପ୍ରକାଶ ପାଇଛି।
ଉଲ୍ଲେଖଯୋଗ୍ୟ, ଏହି ଯାଞ୍ଚ ପ୍ରକ୍ରିୟାରେ ବେଆଇନ ଭାବେ ରାସ୍ତା ଅବରୋଧ କରିଥିବା ବ୍ୟବସାୟୀଙ୍କୁ ତୁରନ୍ତ ହଟାଇବା ସହ ରାସ୍ତାକଡ଼ରେ ପଡ଼ିଥିବା ଆବର୍ଜନାକୁ ସଫେଇ କରାଯିବ। କିଛିଦିନ ତଳେ ମୁଁ ସଫେଇବାଲା କାର୍ଯ୍ୟକ୍ରମ ଜରିଆରେ କମିଶନର ଲୋକଙ୍କୁ ସ୍ବଚ୍ଛତା ଆପଣାଇବା ପାଇଁ ସଚେତନ କରିଥିଲେ। ଏପରିକି ପୁରୁଣା ଭୁବନେଶ୍ୱର ଅଞ୍ଚଳରେ ଜଣେ ଲୋକ ବାହାରେ ଘରର ନିର୍ମାଣଧୀନ ବର୍ଜ୍ୟ ପକାଇଥିବାରୁ ତାକୁ ରାସ୍ତାରୁ ଉଠାଇ ତାଙ୍କ ଘର ଭିତରକୁ ଫୋପାଡି ଦେଇଥିଲେ। ଏବେ ସହରକୁ ସ୍ବଚ୍ଛ ରଖିବା ପାଇଁ ସମସ୍ତ ପଦକ୍ଷେପ ଗ୍ରହଣ କରାଯିବ ବୋଲି ବିଏମ୍ସି ପକ୍ଷରୁ ପ୍ରକାଶ ପାଇଛି।
୨ ପୃଥକ୍ ସ୍ଥାନରୁ ଜବରଦଖଲ ହଟାଇଲା ମିଳିତ ଉଚ୍ଛେଦ ଟିମ୍
ଗୁରୁବାର ବିଏମ୍ସି, ବିଡିଏ ଓ କମିଶନରେଟ ପୋଲିସ୍ର ମିଳିତ ଉଚ୍ଛେଦ ଟିମ୍ ପକ୍ଷରୁ ଦୁଇଟି ପୃଥକ ସ୍ଥାନରେ ଜବରଦଖଲ ଉଚ୍ଛେଦ କରାଯାଇଛି। ପ୍ରଥମ ଉଚ୍ଛେଦରେ ନୟାପଲ୍ଲୀସ୍ଥିତ ପାଇକ ନଗର ଅଞ୍ଚଳର ପ୍ଲଟ ନଂ ୧୮୪ରେ ଥିବା ଜବରଦଖଲକୁ ହଟାଯାଇଛି। ଉଚ୍ଛେଦରେ ୨ ଦୋକାନ ଓ ୮ ସ୍ଥାନରେ ଘରର ଆଗକୁ ବାହାରିଥିବା ଟିଣ ଅଂଶକୁ ଭଙ୍ଗାଯାଇଛି। ସେହିପରି ଦ୍ୱିତୀୟ ଉଚ୍ଛେଦ ୟୁନିଟ୍-୧ ମାର୍କେଟରେ କରାଯାଇଛି। ଉଚ୍ଛେଦରେ ୧୯ କ୍ୟାବିନ୍, ୮୫ ବାଉଁଶ ବନ୍ଧା ଦୋକାନ, ୫୭ ଦେକାନର ଆଗକୁ ବଢ଼ିଥିବା ଅଂଶ, ୭ ଟିଫିନ୍ ଷ୍ଟଲ ସହ ୭ ବାଉଁଶ ବନ୍ଧା ହୋଟେଲକୁ ଭଙ୍ଗାଯାଇଛି। ଏଥିରେ ଗୋଟିଏ ଲେଖାଏ ଜେସିବିର ବ୍ୟବହାର ହୋଇଥିବାବେଳେ ସମସ୍ତ ଉଚ୍ଛେଦ ଦଳର କର୍ମଚାରୀ ଉପସ୍ଥିତ ଥିଲେ।
