କାଠମାଣ୍ଡୁ, ୨୯।୮: ନେପାଳରେ ଭୟଙ୍କର ବନ୍ୟା ଏବଂ ଫ୍ଲାସ ଫ୍ଲଡ ଯୋଗୁ ବିପୁଳ କ୍ଷୟକ୍ଷତି ମଧ୍ୟରେ ଏବେ ଆଉ ଏକ ବଡ଼ ବିପଦର ଆଶଙ୍କା ଦେଖାଦେଇଛି। ଚାଇନା ନେପାଳକୁ ସତର୍କ କରିଛି ଯେ ଲେଣ୍ଡେ ନଦୀ ପ୍ରଣାଳୀର ଉପରମୁଣ୍ଡରେ ସୃଷ୍ଟି ହୋଇଥିବା ଏକ ହ୍ରଦ ଯେକୌଣସି ସମୟରେ ଭାଙ୍ଗିପାରେ।
ରଏଟର୍ସର ରିପୋର୍ଟ ଅନୁସାରେ, ଚାଇନା ଆକଳନ ଅନୁଯାୟୀ ହ୍ରଦର ପାଣିର ରଙ୍ଗ ଲଗାତାର ଗାଢ଼ ହେଉଛି। ଏହାକୁ ବିପଦର ଏକ ସଙ୍କେତ ବୋଲି ଧରାଯାଉଛି। ଯଦି ହ୍ରଦଟି ଭାଙ୍ଗିଯାଏ, ତେବେ ନଦୀରେ ପାଣିର ପ୍ରବାହ ହଠାତ୍ ଏବଂ ଦ୍ରୁତ ଗତିରେ ବଢ଼ିପାରେ। ଚାଇନା ପ୍ରାଥମିକ ଆକଳନ ଅନୁଯାୟୀ, ଏଭଳି ସ୍ଥିତିରେ ପାଣିର ସର୍ବାଧିକ ପ୍ରବାହ ପ୍ରତି ସେକେଣ୍ଡରେ ୫୦୦ ଘନମିଟର ପର୍ଯ୍ୟନ୍ତ ପହଞ୍ଚିପାରେ।
ଚାଇନା ହ୍ରଦ ସମ୍ପର୍କିତ ବିପଦର ସୂଚନା ନେପାଳର ବିଦେଶ ମନ୍ତ୍ରଣାଳୟକୁ ଦେଇଛି। ଚଳିତ ସପ୍ତାହରେ ନେପାଳ ଓ ତିବ୍ବତରେ ହୋଇଥିବା ଭୟଙ୍କର ଫ୍ଲାସ ଫ୍ଲଡ ପରେ ଏହି ହ୍ରଦ ସୃଷ୍ଟି ହୋଇଥିବା କୁହାଯାଉଛି। ଗ୍ଲେସିୟର ଭାଙ୍ଗିବା ପରେ ବହୁ ପରିମାଣର ମାଟି ଓ ମଲବା ତଳକୁ ଆସିଥିଲା। ଏହି ମଲବା ଯୋଗୁ ନଦୀର ଜଳପଥ ବନ୍ଦ ହୋଇ ଏକ ପ୍ରାକୃତିକ ବନ୍ଧ ସୃଷ୍ଟି ହୋଇଥିଲା। ବନ୍ଧ ପଛରେ ପାଣି ଜମା ହୋଇ ନୂଆ ହ୍ରଦ ତିଆରି ହୋଇଛି।
ଏହି ହ୍ରଦ ଚାଇନା ପଟର ଚୋଚେନ ନଦୀ ଏବଂ ନେପାଳ ପଟର ପୁରେପୁ ନଦୀର ସଙ୍ଗମସ୍ଥଳ ନିକଟରେ ସୃଷ୍ଟି ହୋଇଥିବା ଜଣାପଡ଼ିଛି।
ଚାଇନା ଜଳ ସମ୍ପଦ ମନ୍ତ୍ରଣାଳୟ ଅନୁଯାୟୀ, ହ୍ରଦରେ ପାଣିର ସ୍ତର ଲଗାତାର ବଢ଼ୁଥିଲା। ଶୁକ୍ରବାର ସୁଦ୍ଧା ହ୍ରଦରେ ପ୍ରାୟ ୨୫ ଲକ୍ଷ ଘନମିଟର ପାଣି ଜମା ହୋଇସାରିଥିଲା। ବିପଦକୁ ଦୃଷ୍ଟିରେ ରଖି ଚାଇନା ନିମ୍ନାଞ୍ଚଳରେ ରହୁଥିବା ଲୋକଙ୍କୁ ସତର୍କ ରହିବାକୁ ପରାମର୍ଶ ଦେଇଛି। ଏହା ସହିତ ଡ୍ରୋନ ଏବଂ ସାଟେଲାଇଟ ମାଧ୍ୟମରେ ହ୍ରଦ ଓ ଏହାର ଆଖପାଖ ଅଞ୍ଚଳ ଉପରେ ନଜର ରଖାଯାଉଛି। ପ୍ରାକୃତିକ ବନ୍ଧ ଭାଙ୍ଗିଲେ ବନ୍ୟାର ପ୍ରଭାବ କେତେ ଭୟଙ୍କର ହୋଇପାରେ, ତାହା ଆକଳନ କରିବା ପାଇଁ ଚାଇନା ପକ୍ଷରୁ ଏକ ବନ୍ୟା ମଡେଲ ପ୍ରସ୍ତୁତ କରାଯାଇଛି।
ପ୍ରାଥମିକ ଆକଳନ ଅନୁଯାୟୀ, ହ୍ରଦ ଭାଙ୍ଗିଗଲେ ନଦୀ ପ୍ରଣାଳୀରେ ପାଣିର ପ୍ରବାହ ପ୍ରତି ସେକେଣ୍ଡରେ ସର୍ବାଧିକ ୫୦୦ ଘନମିଟର ପର୍ଯ୍ୟନ୍ତ ବଢ଼ିପାରେ। ତେବେ ଚାଇନା କହିବା ଅନୁଯାୟୀ, ପ୍ରାକୃତିକ ବନ୍ଧର କିଛି ଅଂଶ ଭାଙ୍ଗିଲେ ମଧ୍ୟ ପାଣି ନଦୀର ଦୁଇ କୂଳ ମଧ୍ୟରେ ରହିପାରେ।
ଏହାର ଅର୍ଥ ହେଉଛି, ପାଣିର ସ୍ତର ହଠାତ୍ ବଢ଼ିପାରେ, କିନ୍ତୁ ବ୍ୟାପକ ଅଞ୍ଚଳରେ ନଦୀର ପାଣି ବାହାରି ଯିବାର ସମ୍ଭାବନା ତୁଳନାତ୍ମକ ଭାବେ କମ ବୋଲି ଚାଇନାର ପ୍ରାଥମିକ ଆକଳନରୁ ଜଣାପଡ଼ିଛି।
