ମନମୁଣ୍ଡା, ୨୨।୨ (ଡି.ଏନ୍.ଏ.)-
ବୌଦ୍ଧ ଜିଲା କଣ୍ଟାମାଳ ବ୍ଲକ ବିଲାସପୁର ପଁଚେତ୍ ବଡ଼ରାହାଯୋରର ଖତୁ ଭୋଇ ଦିନାକେତେ ତଲେ କିଡ଼୍ନୀ ରୋଗ୍ରେ ଆରପାରକେ ଚାଲିଯାଇଛନ୍। ଏନ୍ତାଥି ପରିବାରଟା ଘରର ଝନେ ବଲି ରୁଜ୍ଗାରିଆ ଲୋକ୍କେ ହରେଇ ଭାଂଗି ପଡ଼ିଛନ୍।
ସୂଚନା ଅନ୍ସାରେ ବଡ଼ରାହାଯୋର ଗଁାର ବିଧବା ଅଷ୍ଟମୀ ଭୋଇ(୩୩)। ପରିବାର କହେଲେ ବୁଢ଼ୀ ଶାଶ୍ ଶ୍ରାବଣୀ(୭୧), ଦୁଇ ଝି’ ଝିଲି(୧୪), ଡଲି(୧୧) ଆର ଦୁଇ ପୁଓ ପ୍ରେମ(୮), ରଞ୍ଜନ(୫)କୁଁ ନେଇ ସଁସାର। ଅନେକ୍ ଦିନ୍ ହେଲା ଅଷ୍ଟମୀକଁର ଆପ୍ନେ ଖତୁ ଭୋଇ(୩୮) କିଡ଼୍ନୀ ରୋଗ୍ରେ ପଡ଼ିଥିଲେ। ଦିନାକେତେ ତଲେ ସେ ବୁର୍ଲା ବଡ଼ ଡାକ୍ତରଖାନାରେ ଚିକିଛା ଲାଗି ଭରତି ହେଇଥିଲେ। ହେଲେ ଚିକିଛାଧିନ ଅବସ୍ତାରେ ଗଲା ଫେବୃୟାରୀ ୧୨ ତାରିଖ୍ ତାକର ମୁର୍ତୁ ହେଇଛେ। ଇଆଡ଼େ ପରିବାରଟା ନିହାତି ଗରିବ୍, ଖତୁ କୁଲିମଜୁରି କରି କୁଟୁମ୍ ପୁଷୁଥିଲେ। ହେଲେ ସେ କିଡ଼୍ନୀ ରୋଗ୍ରେ ପଡ଼ଲା ଉତାରୁ ଆର କାମ୍ବୁତା କରି ନାଇଁ ପାରୁଥାଇ। ଏନ୍ତାଥି ଅଷ୍ଟମୀ ନିଜେ କୁଲିମଜୁରି କରି ପରିବାର ଚଲାବାର ସଂଗେ ଆପ୍ନେର ଚିକିଛା କରଉଥିଲେ। ଖତୁକଁର ଚିକିଛା ଲାଗି ଟଁକା ଅଭାବ୍ ପଡ଼ଲାରୁ ଅଷ୍ଟମୀ ଘରର ଜିନିଷପତର, ପ୍ରଧାନମନ୍ତ୍ରୀ ଆବାସ ଯୋଜନାର ଦୁତୀଅ କିସ୍ତି ଟଁକା ଖରଚ୍ କଲେ। ଶେଷେ ଆହୁରି ଟଁକା ଦରକାର ପଡ଼ଲାରୁ ଅଷ୍ଟମୀ ଶାଶ୍ର ଭତା କାର୍ଡକେ ୫ ହଜାର ଟଁକାରେ ଆର ରାଶନକାର୍ଡକେ ୪ ହଜାର ଟଁକାରେ ବଁଧକ୍ ପକେଇ ସରବ୍ସୁଅଁାତ୍ ହେଇଯାଇଛନ୍। ଖତୁକଁର ଚିକିଛା ସମିଆରେ ପରିବାରଟା ଚଲବାର ଲାଗି ବଡ଼ା ଗୁଲ୍ଗୁଲା ହେଉଥିଲେ। ଏନ୍ତାଥି ଗଁାର କେତେ ସହୁରୁଦ୍ ଲୋକ୍ ପରିବାରକେ ଟଁକା ପଏସା ସାହାଯ୍ ଦେଇଥିଲେ। ସେନ୍ତା ଖତୁକଁର ଶବ୍ ବୁର୍ଲାରୁ ଆନ୍ଲା ଉତାରୁ ଶବ ବାହକ ଗାଡ଼ିଭଡ଼ା ବି ଗଁାର ଲୋକ୍ ଚଁାଦାଭେଦା କରି ଦେଇଥିଲେ। ଇଆଡ଼େ ପରିବାରର ଝନେ ବଲି ରୁଜ୍ଗାରିଆ ଲୋକ୍ ଚାଲିଗଲା ଉତାରୁ ପରିବାରଟା ଭାଂଗି ପଡ଼ିଛନ୍। ପ୍ରଧାନମନ୍ତ୍ରୀ ଆବାସ ଘର ଦରଖଁଡ଼ିଆ ହେଇ ପଡ଼ିଛେ, ରାଶନକାର୍ଡ, ଶାଶ୍ର ଭତାକାର୍ଡ ବଁଧା ପଡ଼ିଛେ। ଅଷ୍ଟମୀ ବୁଢ଼ୀ ଶାଶ୍ ଆର ନିଜର ୪ ଛୁଆପୁତାକୁ କେନ୍ଥେଇ ପାଲ୍ପୋଷ କରବେ ସେ ଚିନ୍ତାରେ ଭାଂଗି ପଡ଼ିଛନ୍। ଇ ଘଟନା ବାବ୍ଦେ ବୌଦ୍ଧ ଜିଲାପାଳ ଲଲାଟେନ୍ଦୁ ମିଶ୍ରକଁର ଦୁରୁଷ୍ଟି ଆକରଷନ୍ କଲାରୁ ସେ ଜିଲା ଶିଶୁ ସୁରକ୍ଷା ୟୁନିଟ୍ର ଅଧ୍କାରୀମାନକୁ ରିପୋର୍ଟ ଠୁଲାବାକେ ନିରଦେଶ ଦେବାର ସଂଗେ ରେଡ୍କ୍ରସରୁ ପୀଡ଼ିତ ପରିବାରକେ ୧୦ ହଜାର ଟଁକା ସାହାଯ୍ ଦେଇଥିଲେ। ଜିଲା ଶିଶୁ ସୁରକ୍ଷା ଅଧ୍କାରୀକଁର ରିପୋର୍ଟ ଅନ୍ସାରେ ପୀଡ଼ିତ ପରିବାରକେ ହରିଶ୍ଚନ୍ଦ୍ର ଯୋଜନାର ଟଁକା, ଅଙ୍ଗନଓ୍ବାଡି ତରଫୁ ଛୁଆମାନକୁ ପୁଷ୍ଟିକର ଖାଏଦ୍, ପ୍ରଧାନମନ୍ତ୍ରୀ ଆବାସ ଯୋଜନାର ବାକି ଟଁକା, ରାସନ ସାମାନ ଆର ଅଷ୍ଟମୀକୁଁ ବିଧବା ଭତା ଦେବାର ବେବସ୍ତା କରାଯିବା। ଖତୁକଁର ଶୁଧିକାଯ୍ ସଏଲା ଉତାରୁ ଫେନ୍ ପରଶାସନ ତରଫୁ ଟଁକା ପଏସା ସାହାଯ୍ ଯୁଗେଇ ଦିଆଯିବା ବଲି ଜିଲାପାଳ କହିଛନ୍। ଇ ଦିଗେ ପଦକ୍ଷେପ ନେବାକେ ଜିଲାପାଳ ଉପଜିଲାପାଳକୁଁ ବି ନିରଦେଶ ଦେଇଥିବାର ଜନାଯାଇଛେ।
