ଲାସ ଭେଗାସ, ୮।୬: ବ୍ରାଜିଲର ମହିଳା ମିକ୍ସଡ ମାର୍ଶାଲ ଆଟର୍ସ ଫାଇଟର ଆମଣ୍ଡା ନନ୍ସ ପ୍ରଥମ ୟୁଏଫସି(ଅଲ୍ଟିମେଟ ଫାଇଟିଂ ଚାମ୍ପିୟନଶିପ୍) ଫାଇଟର ଭାବେ ଫିଦରଓ୍ବେଟ୍ ଚାମ୍ପିୟନଶିପ୍ ବେଲ୍ଟ ବଜାୟ ରଖିଛନ୍ତି। ଶନିବାର ରାତିରେ ଅନୁଷ୍ଠିତ ୟୁଏଫ୍ସି ୨୫୦ ଲଢ଼େଇରେ ପ୍ରତିଦ୍ୱନ୍ଦ୍ୱୀ କାନାଡ଼ାର ଫେଲିସିଆ ସ୍ପେନ୍ସରଙ୍କୁ ହରାଇ ସେ ନିର୍ବିବାଦରେ ଟାଇଟଲ ହାସଲ କରିଛନ୍ତି। ସେହିପରି ପୂର୍ବତନ ବାଣ୍ଟମଓ୍ବେଟ୍ ଚାମ୍ପିୟନ କୋଡି ଗାର୍ବ୍ରାଣ୍ଡ ଦ୍ୱିତୀୟ ରାଉଣ୍ଡ ବେଲ୍ ବାଜିବା ପୂର୍ବରୁ ପ୍ରତିପକ୍ଷ ରାଫାଲ ଆସୁନକାଓଙ୍କୁ ନକ୍ଆଉଟ କରିଛନ୍ତି। ଲାସ ଭେଗାସର ୟୁଏଫସି କର୍ପୋରେଟ କ୍ୟାମ୍ପସରେ ଥିବା ଦର୍ଶକ ବିହୀନ ଜିମ୍ରେ ଏହି ଦୁଇ ପ୍ରତିଦ୍ୱନ୍ଦ୍ୱିତା ହୋଇଥିଲା।
କରୋନା ଭାଇରସ ସଂକ୍ରମଣ ଜନିତ ପ୍ରଭାବ ଯୋଗୁ ୟୁଏଫସି ଆପେକ୍ସ ଜିମ୍ରେ ପ୍ରତିଯୋଗିତା ଆରମ୍ଭ ପରେ ୟୁଏଫସି ୨୫୦ ହେଉଛି ଦ୍ୱିତୀୟ ଇଭେଣ୍ଟ। ମିକ୍ସଡ ମାର୍ଶାଲ ଆଟର୍ସ ଇତିହାସରେ ଜଣେ ସର୍ବଶ୍ରେଷ୍ଠ ମହିଳା ଫାଇଟରଭାବେ ପରିଚିତ ହେଉଥିବା ନନ୍ସ ବାଣ୍ଟମଓ୍ବେଟ ଏବଂ ଫିଦରଓ୍ବେଟ ଡିଭିଜନରେ ୟୁଏଫସି ଚାମ୍ପିୟନ ଅଛନ୍ତି। ଗତ ଡିସେମ୍ବରରେ ଅନୁଷ୍ଠିତ ବାଣ୍ଟମଓ୍ବେଟ ଫାଇଟରେ ନେଦରଲାଣ୍ଡ୍ସର ଜର୍ମେନ ଡି ରାନ୍ଦାମିଙ୍କୁ ସହଜରେ ହରାଇଥିବା ନନ୍ସ ଏଠାରେ ସ୍ପେନ୍ସରଙ୍କ ନିକଟରୁ କିଛିଟା ଚ୍ୟାଲେଞ୍ଜର ସମ୍ମୁଖୀନ ହୋଇଥିଲେ। ତେବେ ବାରମ୍ବାର ଆଘାତ କରି ସେ ସ୍ପେନ୍ସରଙ୍କ ମୁହଁକୁ ରକ୍ତାକ୍ତ କରି ଦେବାପରେ ବିଜୟୀ ଘୋଷିତ ହୋଇଥିଲେ। ନନ୍ସ ୨୦୧୮ ଡିସେମ୍ବରରେ ସାଇବର୍ଗ ନାମରେ ପରିଚିତ ଆମେରିକା/ବ୍ରାଜିଲିଆନ ଫାଇଟର କ୍ରିସ ଜଷ୍ଟିନୋଙ୍କୁ ହରାଇ ପ୍ରଥମଥରପାଇଁ ଫିଦରଓ୍ବେଟ ବେଲ୍ଟ ହାସଲ କରିଥିଲେ। ଏବେ ସେ ତାହାକୁ ବଜାୟ ରଖିବାରେ ସକ୍ଷମ ହୋଇଛନ୍ତି। ସେହିପରି ୨୦୧୬ରୁ ଏପଯ୍ୟନ୍ତ ସେ ୫ ଥର ବାଣ୍ଟମଓ୍ବେଟ ବେଲ୍ଟ ବଜାୟ ରଖିଛନ୍ତି।
ସେହିପରି ଆମେରିକାର ପ୍ରଫେଶନାଲ ମିକ୍ସଡ ମାର୍ଶାଲ ଆର୍ଟ ଫାଇଟର ଗାର୍ବ୍ରାଣ୍ଡ କ୍ରମାଗତ ୩ଟି ଫାଇଟ୍ ହାରିବା ପରେ ଏଥର ଲଢ଼େଇରେ ଅବତୀର୍ଣ୍ଣ ହୋଇଥିଲେ। ଏଠାରେ ଆରମ୍ଭରୁ ପ୍ରଭାବୀ ପ୍ରଦର୍ଶନ କରି ସେ ବ୍ରାଜିଲର ଆସୁନକାଓଙ୍କୁ ଦ୍ୱିତୀୟ ରାଉଣ୍ଡ ଶେଷରେ ଧରାଶାୟୀ କରିଥିଲେ। ଏକ ରାଇଟ୍ କ୍ରସ ମାଧ୍ୟମରେ ମୁହଁକୁ ପରଫେକ୍ଟ ଶୁଟ୍ କରି ସେ ଲଢ଼େଇର ଅନ୍ତ ଘଟାଇଥିଲେ। ୨୦୧୬ ଡିସେମ୍ବର ପରେ ଗାର୍ବ୍ରାଣ୍ଡଙ୍କର ଏହାଥିଲା ପ୍ରଥମ ବିଜୟ। ସେତେବେଳେ ସେ ୧୩୫-ପାଉଣ୍ଡ ଟାଇଟଲ ଲଢ଼େଇରେ ଆମେରିକାର ଡୋମିନିକ୍ କ୍ରୁଜ୍ଙ୍କୁ ପରାସ୍ତ କରିଥିଲେ।
