ଲକ୍ଷ୍ନୌ,୨୭।୪: ଲକ୍ଡାଉନ ସମୟରେ ଉତ୍ତରପ୍ରଦେଶରେ ଫସିଥିବା ଅନ୍ୟ ରାଜ୍ୟର ଶ୍ରମିକଙ୍କ ପାଇଁ ଯୋଗୀ ସରକାର ସୋମବାର ବଡ଼ ଘୋଷଣା କରିଛନ୍ତି। ପ୍ରବାସୀ ଶ୍ରମିକଙ୍କୁ ଏକ ହଜାର ଟଙ୍କା ଓ ୧୫ ଦିନର ମାଗଣା ରାସନ ଯୋଗାଇଦେବା ପାଇଁ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ଘୋଷଣା କରିଛନ୍ତି। ତେବେ ପ୍ରାୟ ୧୦ଲକ୍ଷ ପ୍ରବାସୀ ଶ୍ରମିକ ଏହାର ଲାଭ ଉଠାଇପାରିବେ। ଏଥିପାଇଁ ପ୍ରଥମେ ଆଶ୍ରୟ ସ୍ଥଳରେ ସେମାନଙ୍କୁ ପଞ୍ଜୀକରଣ କରିବା ପାଇଁ ଯୋଗୀ ନିର୍ଦ୍ଦେଶ ଦେଇଛନ୍ତି। ଯାହାଦ୍ୱାରା ଉକ୍ତ ଶ୍ରମିକଙ୍କ ଖାତାକୁ ସିଧାସଳଖ ଟଙ୍କା ଟ୍ରାନ୍ସଫର କରାଯାଇପାରିବ। ସୂଚନାଯୋଗ୍ୟ ପୂର୍ବରୁ ଉତ୍ତରପ୍ରଦେଶର ପ୍ରତି ଜିଲାରେ ପ୍ରାୟ ୧୫ ହଜାରରୁ ଊର୍ଦ୍ଧ୍ୱ ପ୍ରବାସୀ ଶ୍ରମିକଙ୍କୁ ଯୋଗୀ ରହିବାର ବ୍ୟବସ୍ଥା କରାଇଥିବା ଜଣାପଡ଼ିଛି। ଅପରପକ୍ଷେ ଲକ୍ଡାଉନ ଯୋଗୁ ଅନ୍ୟ ରାଜ୍ୟରେ ଫସି ରହିଥିବା ଶ୍ରମିକଙ୍କୁ ଖୁବ୍ଶୀଘ୍ର ଘରକୁ ଆଣିବାର ବ୍ୟବସ୍ଥା କରୁଛନ୍ତି ଯୋଗୀ ସରକାର। ରାଜ୍ୟକୁ ଫେରିବା ପରେ ସେମାନଙ୍କୁ ଯାଞ୍ଚ କରାଯାଇ କ୍ୱାରାଣ୍ଟାଇନ୍ରେ ରଖାଯିବାର ସମସ୍ତ ବ୍ୟବସ୍ଥା କରିବାକୁ ମୁଖ୍ୟ ଅତିରିକ୍ତ ସଚିବ ରାଜସ୍ବ ରେଣୁକା ଶାସନାଙ୍କୁ ଯୋଗୀ ନିର୍ଦ୍ଦେଶ ଦେଇଛନ୍ତି। ସେହିପରି ଜିଲାପାଳଙ୍କୁ ଆଶ୍ରୟସ୍ଥଳରେ ସମସ୍ତ ପ୍ରକାରର ବ୍ୟବସ୍ଥା ସହ ଖାଦ୍ୟପେୟ ଯୋଗାଇଦେବାକୁ ନିର୍ଦ୍ଦେଶ ଦିଆଯାଇଥିବା ସୂଚନା ରହିଛି।
