ଜୁନାଗଡ଼,୧୮।୫(ଡି.ଏନ୍.ଏ.): ଚେନ୍ନାଇରେ ଫସି ରହିଥିବା କଳାହାଣ୍ଡି ଜିଲା କେସିଙ୍ଗା ବ୍ଲକର ୩୧ ଜଣ ଓ ଜୁନାଗଡ଼ ବ୍ଲକର ଜଣେ ପ୍ରବାସୀ ସୋମବାର ଏକ ବସ୍ ଭଡା କରି ଫେରୁଥିଲେ। ବସ୍ ଚାଳକ ରୁଟ୍ ପରମିଟ ସମୟ ସୀମା କମ୍ ଥିବା ଦର୍ଶାଇ କଳାହାଣ୍ଡି ଓ ନବରଙ୍ଗପୁର ଜିଲା ସୀମାନ୍ତ ଆମପାଣିଠାରେ ସେମାନଙ୍କୁ ଓହ୍ଲାଇ ଚାଲିଯାଇଥିଲା। ସେମାନେ ଚାଲିଚାଲି ନିଜ ଗନ୍ତବ୍ୟ ସ୍ଥଳକୁ ଫେରୁଥିଲେ। ପ୍ରାୟ ୫୦କିମି ଚାଲିବା ପରେ ସେମାନେ ସୋମବାର ମଧ୍ୟାହ୍ନରେ ଜୁନାଗଡ ହାତୀ ବ୍ରିଜ ନିକଟରେ ପହଞ୍ଚିଥିଲେ। ଖବର ପାଇ ଜୁନାଗଡ ବ୍ଲକ ପ୍ରଶାସନ ପକ୍ଷରୁ ସେମାନଙ୍କୁ ଖାଦ୍ୟ ପ୍ରଦାନ କରାଯାଇଥିଲା। ପରେ କେସିଙ୍ଗା ବ୍ଲକର ୩୧ ପ୍ରବାସୀଙ୍କୁ ଜୁନାଗଡ ସଂସ୍କୃତ ଭବନଠାରେ ହୋଇଥିବା ଅସ୍ଥାୟୀ ସ୍ବାସ୍ଥ୍ୟକେନ୍ଦ୍ର ଓ ଜୁନାଗଡ ବ୍ଲକର ଜଣେ ପ୍ରବାସୀଙ୍କୁ ଚାରଭାଟି ପଞ୍ଚାୟତ ବ୍ରାହ୍ମଣୀଗୁଡା ଅସ୍ଥାୟୀ ସ୍ବାସ୍ଥ୍ୟକେନ୍ଦ୍ରରେ ରଖାଯାଇଥିଲା। ଜୁନାଗଡ ବିଡିଓ ଦୁଲାରାମ ମାରାଣ୍ଡିଙ୍କ ତତ୍ତ୍ୱାବଧାନରେ ଯନ୍ତ୍ରୀ ସଞ୍ଜୟ କୁମାର ମଲ୍ଲିକ,ପୂର୍ବତନ ଏନ୍ଏସି ଅଧ୍ୟକ୍ଷ ମହେଶ କୁମାର ସାହୁ, ଜିଆରଏସ୍ ସଞ୍ଜୀବ ପଟ୍ଟନାୟକ, କଲିଙ୍ଗା ସାହୁ ପ୍ରମୁଖ ଉପସ୍ଥିତ ଥିଲେ।
