ବିନିକା, ୨୬।୧୨ (ଡି.ଏନ୍.ଏ.)-ସୁବର୍ଣ୍ଣପୁର ଜିଲା ବିନିକା ବ୍ଲକ ଭଣ୍ଡାର ପଁଚେତ୍ ଅଧୀନ ପାପୀ ଉପ ସ୍ବାସ୍ଥ୍ୟକେନ୍ଦ୍ର ତଥା ଏଏନ୍ଏମ୍ ସେଣ୍ଟର ତିଆର ହେଲାଦିନୁ ଅବେବସ୍ତା ଘେରରେ ରହିଛେ। ଦେଖ୍ଭାଲ ଅଭାବୁ କେନ୍ଦ୍ରଟା ଲଟାବୁଟା ଢାପି ହେଇ ଭୁତକୁଠି ପାଲଟିଗଲାନ। କେନ୍ଦ୍ରରେ ନିୟୋଜିତ ଏଏନ୍ଏମ୍କଁର ମନ୍ଇଛା କାମ୍ ଲାଗି ଲୋକ୍ ସ୍ବାସ୍ଥ୍ୟସେବା, ସ୍ବାସ୍ଥ୍ୟ ଜନିତ ଉଚିତ୍ ପରାମଶରୁ ବଁଚିତ୍ ହେଉଥିବାର ଅଭିଯୋଗ ହେଉଛେ।
ଗଁାବାସୀକର ଅଭିଯୋଗ ଅନ୍ସାରେ ଏଏନ୍ଏମ୍ ସେଣ୍ଟର ଖୁଲ୍ଲା ଦିନୁ ଫିମାସ ଟୀକାକରନ୍ ଦିନ୍ମାନକେ ଖୁଲା ରହୁଛେ। ବାକି ଦିନ୍ମାନକେ ଗେଟ୍ରେ ତାଲା ଝୁଲୁଛେ। ଝନେ ଏଏନ୍ଏମ୍ ନିଜର କେନ୍ଦ୍ର ଅଧୀନରେ ଥିବାର ସବୁ ଆଶା କରମୀମାନକର ସଂଗେ ଗଁାର ସ୍ବାସ୍ଥ୍ୟ ବିଷେରେ ଆର ଅଙ୍ଗନଓ୍ବାଡି କରମୀମାନକର ସଂଗେ ପରିମଲ ବାବ୍ଦେ ସାପ୍ତାହିକ ସମୀକ୍ଷା କରବାର କଥା। ଇତାର ବାହାରେ ଗଁାର ସ୍ବାସ୍ଥ୍ୟ ଆର ପରିମଲ ବେବସ୍ତାର ତଦାରଖ କରବାର କଥା। ହେଲେ ପାପୀ ଗଁାରେ ଇ ସବୁ ଦେଖ୍ବାକେ ନାଇଁ ମିଲବାର। ଇଆଡ଼େ ପାପୀ ଉପ ସ୍ବାସ୍ଥ୍ୟକେନ୍ଦ୍ରରେ ଏଏନ୍ଏମ୍କଁର ରହିବାର ଲାଗି ସବୁପରକାର ବେବସ୍ତା ରହିଛେ। ହେଲେ କରମୀ ଝନ୍କ କେନ୍ଦ୍ରରେ ନାଇଁ ରହିବାର। କେନ୍ଦ୍ରରେ କେହି ନାଇଁ ରହିବାର ଲାଗି ଚାରହିକୁତି ଲଟାବୁଟା ହେଇ ଗୁଟେ ଅସ୍କୁରା ପରିବେଶ ସୁରୁଷ୍ଟି ହେଇଛେ। କେନ୍ଦ୍ରର ନାମ ଫଲକରୁ ଲେଖା ଯାକ ବି ମେଟି ଗଲାନ। ସ୍ବାସ୍ଥ୍ୟ ବିଭାଗର ଖାମ୍ଖିଆଲି ମନ୍ଭାବ ଲାଗି ପାପୀ ଉପ ସ୍ବାସ୍ଥ୍ୟକେନ୍ଦ୍ରଟା ଦିନୁଦିନ୍କେ ଭୁତକୁଠି ପାଲଟିଯାଉଛେ ବଲି ଗଁାବାସୀ ଅଭିଯୋଗ କରିଛନ୍। ଇ ବାବ୍ଦେ ପାପୀ ଗଁାର ସୁଧୀର ପାତ୍ର ଆର ବିଶିକେସନ ଧରୁଆ କହିଛନ୍ ଯେ, କେନ୍ଦ୍ରଟା ଖୁଲ୍ଲା ଦିନୁ ଖାଲି ଟୀକାକରନ୍ ଦିନ୍ମାନ୍କେ ଖୁଲା ରହୁଛେ, ବାକି ଦିନ୍ମାନକେ ବଁଦ୍ ରହୁଛେ। କେନ୍ଦ୍ରରେ ଏଏନ୍ଏମ୍କଁର ରହିବାର ସୁବିଧା ଅଛେ, ହେଲେ ସେ ଇଠାନେ ନାଇଁ ରହିବାର। ଯେନ୍ଥିରଲାଗି ଅଂଚଲରେ ସ୍ବାସ୍ଥ୍ୟସେବା ପରଭାବିତ ହେଉଛେ। ଇ ବାବ୍ଦେ ମତାମତ ଲାଗି କେନ୍ଦ୍ରରେ ନିୟୋଜିତ ମହିଲା ସ୍ବାସ୍ଥ୍ୟ କରମୀ ସୁଚିତ୍ରା ଡୁଙ୍ଗଡୁଙ୍ଗକୁଁ ଯୋଗାଯୋଗ କରାଯାଇଥିଲେ ବି ଯୋଗାଯୋଗ ସମ୍ଭବ ନାଇଁ ହେଇପାରି। ସେନ୍ତା ଇ ବାବ୍ଦେ ଜିଲା ମୁଖିଆ ଚିକିଛା ଅଧ୍କାରୀ ଦିଲୀପ ପଣ୍ଡାକୁଁ ପଚ୍ରାଲାରୁ ଇ ବାବ୍ଦେ ବିନିକା ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରର ଚିକିଛା ଅଧ୍କାରୀକୁଁ କହୁନ୍। ସେ ସମସିଆ ବାବ୍ଦେ ଲେଖିକରି ଦେଲେ ଆମେ ପଦକ୍ଷେପ ନେମୁ ବଲି ସେ କହିଥିଲେ। ଇ ବାବ୍ଦେ ବିନିକା ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରର ଚିକିଛା ଅଧ୍କାରୀ ଜୟନାରାୟଣ ପଧାନକୁଁ ପଚ୍ରାଲାରୁ ପାପୀ ଉପ ସ୍ବାସ୍ଥ୍ୟକେନ୍ଦ୍ରରେ ସ୍ବାସ୍ଥ୍ୟ କରମୀକଁର ରହିବାର ଲାଗି ସବୁ ବେବସ୍ତା ରହିଛେ। ହେଲେ କ୍ୱାର୍ଟର୍ସରେ ବିଦ୍ୟୁତ୍ ସଂଯୋଗ ନାଇଁ ହେଇ। କେନ୍ଦ୍ରରେ କେହି ନାଇଁ ରହିବାର ଲାଗି ପରିବେଶଟା ବି ଅସ୍କୁରା ହେଇଛେ। ଯେତେ ଜଲ୍ଦି ହେବା ଇ ଦିଗେ ପଦକ୍ଷେପ ନିଆଯିବା ବଲି ସେ କହିଥିଲେ।
