ପାଲଲହଡ଼ା, ୧୦ା୨(ଡି.ଏନ.ଏ.) ଅନୁଗୋଳ ଜିଲା ପାଲଲହଡ଼ା ବ୍ଲକ ଡିମିରିଆ ପଞ୍ଚାୟତର ଧାନମଣ୍ଡିରେ ଧାନ ବିକ୍ରିରେ ଅସୁବିଧା ଉପୁଜିବାକୁ ନେଇ ରବିବାର ଚାଷୀଙ୍କ ମଧ୍ୟରେ ଉତ୍ତେଜନା ଦେଖାଦେଇଥିଲା। ତେବେ ପୋଲିସ ପହଞ୍ଚି ଚାଷୀଙ୍କୁ ବୁଝାଶୁଝା କରିବା ପରେ ପରିସ୍ଥିତି ଶାନ୍ତ ପଡିଥିଲା।
ମିଳିଥିବା ସୂଚନା ଅନୁଯାୟୀ, ଗତ ମାସ ୫ ତାରିଖରେ ଡିମିରିଆ ସମବାୟ ସମିତି ଅଧୀନରେ ଚାଲିଥିବା ମଣ୍ଡିରେ ୧୬ ଜଣ ଚାଷୀ ୧୦୯୬ ବସ୍ତା (୫୩୭.୪୬ କୁଇଣ୍ଟାଲ) ଧାନ ବିକ୍ରି କରିଥିଲେ। କିନ୍ତୁ ବାୟୋମେଟ୍ରିକ ମେଶିନ କାମ ନ କରିବାରୁ ସୋସାଇଟି ସମ୍ପାଦକ ୬ ତାରିଖରେ ଧାନ କିଣାଯାଇଥିବା କମ୍ପ୍ୟୁଟରରେ ଦର୍ଶାଇଥିଲେ। ୬ ତାରିଖ ନିଜିଗଡ଼ ସୋସାଇଟିରୁ ଧାନ କିଣାଯିବାର ପାଳି ଥିବାବେଳେ ଦୁଇଟି ସୋସାଇଟିରୁ ଏକସଙ୍ଗେ ଗୋଟିଏ ଟ୍ରକ୍ରେ କିଭଳି ଭାବେ ଧାନ କିଣାଗଲା ତାକୁ ନେଇ ଦ୍ୱନ୍ଦ୍ୱ ଉପୁଜିଥିଲା। ଫଳରେ ଡିମିରିଆ ସୋସାଇଟିର ୧୬ ହିତାଧିକାରୀ ଧାନ ବିକ୍ରିକରି ମଧ୍ୟ ଟଙ୍କା ପାଇ ନ ଥିଲେ। ଏହାକୁ ନେଇ ଚାଷୀମାନେ ଉତ୍ତ୍ୟକ୍ତ ହୋଇ ସୋସାଇଟି ଗୋଦାମରେ ତାଲା ପକାଇ ଦେଇଥିଲେ। ଏଥିଯୋଗୁ ୫ ତାରିଖ ପରର ଟୋକାନଧାରୀମାନେ ଧାନ ବିକି ପାରି ନ ଥିଲେ। ସେହିପରି ଗତ ୨୪ ତାରିଖରେ ଆସିଥିବା ଟୋକାନଧାରୀମାନେ ଧାନ ବିକି ପାରି ନ ଥିଲେ। ଗତ ୮ ତାରିଖ ଶନିବାରରେ ସେମାନଙ୍କ ଧାନ କିଣାର ଶେଷ ତାରିଖ ଥିବାରୁ ଲଗାଣ ବର୍ଷା ଫଳରେ ମଣ୍ଡି ଖୋଲିବାରେ ଅସୁବିଧା ହୋଇଥିଲା ଏବଂ ଟୋକାନଗୁଡିକ ଅକାମି ହୋଇଯାଇଥିଲା। ଏହାଜାଣି ରବିବାର ଚାଷୀମାନେ ଆସି ସୋସାଇଟିରେ ହୋହଲ୍ଲା କରିଥିଲେ। ଖବରପାଇ ପାଲଲହଡା ଥାନା ଅଧିକାରୀ କିଶୋର କୁମାର ସାମଲ ପହଞ୍ଚି ସମବାୟ ସମିତି ସମ୍ପାଦକ ଏବଂ ଚାଷୀଙ୍କ ସହ ଆଲୋଚନା କରିବା ପରେ ପରିସ୍ଥିତି ଶାନ୍ତ ପଡିଥିଲା ଓ ଧାନବିକ୍ରି ପ୍ରକ୍ରିୟା ଆରମ୍ଭ ହୋଇଥିଲା।
ଏ ସମ୍ପର୍କରେ ସୋସାଇଟି ସମ୍ପାଦକ ଅନିଲ କୁମାର ପ୍ରଧାନ କହିଛନ୍ତି, କମ୍ପ୍ୟୁଟରରେ ଅସୁବିଧା ହେବାରୁ ଏବଂ ଚାଷୀମାନେ ସୋସାଇଟିରେ ତାଲା ପକାଇଦେବରୁ ଧାନ କିଣାରେ ଅସୁବିଧା ହୋଇଥିଲା। ଏବେ ସବୁ ସମସ୍ୟାର ସମାଧାନ ହୋଇଯାଇଥିବା ସମ୍ପାଦକ ପ୍ରକାଶ କରିଛନ୍ତି।
