ନୂଆଦିଲ୍ଲୀ,୧୩ା୬(ପି.ଟି.): ଦିଲ୍ଲୀ ମେଡିକାଲ ଓ୍ବାର୍ଡଗୁଡ଼ିକର ଦୟନୀୟ ସ୍ଥିତିକୁ ନେଇ ସୁପ୍ରିମକୋର୍ଟ ଶୁକ୍ରବାର ଦିଲ୍ଲୀ ସରକାରଙ୍କ ଉପରେ ଜୋର୍ଦାର ବର୍ଷିଛନ୍ତି। ଦିଲ୍ଲୀ ହସ୍ପିଟାଲରେ କରୋନା ରୋଗୀଙ୍କୁ ପ୍ରାଣୀଙ୍କ ଠାରୁ ହୀନ ବ୍ୟବହାର କରାଯାଉଛି। ରୋଗୀଙ୍କ ମୃତ୍ୟୁ ଘଟିଲେ ମୃତଦେହ ଲବି ଓ ପ୍ରତୀକ୍ଷାଞ୍ଚଳରେ ରଖାଯିବା ସହ ଅଳିଆ ଗଦାରେ ଫିଙ୍ଗିଦିଆଯାଉଥିବା ଖବର ପ୍ରକାଶ ପାଇବା ପରେ ସର୍ବୋଚ୍ଚ ଅଦାଲତ ଉଦ୍ବେଗ ପ୍ରକାଶ କରିଛନ୍ତି। ଦିଲ୍ଲୀ ହସ୍ପିଟାଲଗୁଡ଼ିକର ସ୍ଥିତି ଅତି ନିକୃଷ୍ଟ, ଭୟଙ୍କର ତଥା ଦୁଃଖଦାୟକ ବୋଲି ଖଣ୍ଡପୀଠ କହିବା ସହ ଶବ ପରିଚାଳନାରେ ବିଫଳତା ଲାଗି ଅରବିନ୍ଦ କେଜ୍ରିଓ୍ବାଲଙ୍କ ସରକାରଙ୍କୁ ଭର୍ତ୍ସନା କରିଛନ୍ତି। କରୋନା ରୋଗୀଙ୍କ ଚିକିତ୍ସା ଏବଂ ଶବ ପରିଚାଳନାରେ ତ୍ରୁଟିକୁ ନେଇ ସୁପ୍ରିମକୋର୍ଟ ନିଜଆଡ଼ୁ ମାମଲା ରୁଜୁ କରି କେନ୍ଦ୍ର ଓ ବିଭିନ୍ନ ରାଜ୍ୟ ସରକାରଙ୍କୁ ଜବାବ ମାଗିଛନ୍ତି। ହସ୍ପିଟାଲଗୁଡ଼ିକ ମୃତଦେହ ରଖିବାରେ ଉପଯୁକ୍ତ ଧ୍ୟାନ ଦେଉନାହାନ୍ତି। ରୋଗୀଙ୍କ ମୃତ୍ୟୁ ସମ୍ପର୍କରେ ମଧ୍ୟ ସେମାନଙ୍କ ପରିବାର ସଦସ୍ୟଙ୍କୁ ସୂଚନା ଦିଆଯାଉନାହିଁ। ଫଳରେ ସେମାନେ ମୃତକଙ୍କ ଶେଷକୃତ୍ୟରେ ଯୋଗଦେଇପାରୁନାହାନ୍ତି ବୋଲି ସର୍ବୋଚ୍ଚ ଅଦାଲତ କହିଛନ୍ତି।
ଏଥିସହିତ ଦିଲ୍ଲୀରେ ଖୁବ୍ କମ୍ କୋଭିଡ୍-୧୯ ପରୀକ୍ଷା ହେଉଥିବାରୁ ଜଷ୍ଟିସ୍ ଅଶୋକ ଭୂଷଣ, ଏସ୍.କେ. କୌଲ ଏବଂ ଏମ୍.ଆର୍. ଶାହାଙ୍କୁ ନେଇ ଗଠିତ ଖଣ୍ଡପୀଠ ଦିଲ୍ଲୀ ସରକାରଙ୍କୁ ପ୍ରଶ୍ନ କରିଥିଲେ। ପୂର୍ବରୁ ଦିଲ୍ଲୀରେ ଦିନକୁ ୭୦୦୦ କୋଭିଡ୍ ପରୀକ୍ଷା ହେଉଥିବାବେଳେ ଏବେ ତାହା ୫୦୦୦କୁ ହ୍ରାସ ପାଇଛି। ଅନ୍ୟପକ୍ଷରେ ମୁମ୍ବାଇ ଓ ଚେନ୍ନାଇରେ କୋଭିଡ୍ ପରୀକ୍ଷା ବୃଦ୍ଧି ପାଇଛି। କରୋନା ଚିକିତ୍ସା ଓ ଶବ ପରିଚାଳନା ନେଇ ସୁପ୍ରିମକୋର୍ଟ ମହାରାଷ୍ଟ୍ର, ପଶ୍ଚିମବଙ୍ଗ ଓ ତାମିଲନାଡୁ ସରକାରଙ୍କୁ ମଧ୍ୟ ନୋଟିସ ଜାରି କରିଛନ୍ତି। କେନ୍ଦ୍ର ସରକାରଙ୍କ ମାର୍ଗଦର୍ଶିକାର ପାଳନ ହେଉନାହିଁ। ରୋଗୀ ପରିଚାଳନା ବ୍ୟବସ୍ଥା, ହସ୍ପିଟାଲ ଷ୍ଟାଫ୍ ଏବଂ ରୋଗୀ ଯତ୍ନ ସମ୍ପର୍କିତ ଷ୍ଟାଟସ୍ ରିପୋର୍ଟ ଦାଖଲ କରିବା ପାଇଁ ଉପରୋକ୍ତ ରାଜ୍ୟର ମୁଖ୍ୟ ସଚିବମାନଙ୍କୁ ନିର୍ଦ୍ଦେଶ ଦିଆଯାଇଛି।
