ଅନୁଗୋଳ ଅଫିସ, ୨।୬ – ଦିନଟିଏ ପରେ ସାବିତ୍ରୀ ଓଷା। ଆଗକୁ ମଧ୍ୟ ରଜ। ତେଣୁ ଅନୁଗୋଳ ସହରକୁ ଭଳିକି ଭଳି ଫଳ ଆସୁଥିବା ବେଳେ ଏସବୁ କିଣିବାକୁ ଗ୍ରାହକଙ୍କ ଭିଡ଼ ମଧ୍ୟ ବଢ଼ୁଛି। ବିଶେଷକରି ସୋମବାର ସାବିତ୍ରୀ ପାଇଁ ଗ୍ରାହକମାନେ ଫଳ କିଣିବା ଆରମ୍ଭ କରିଦେଇଛନ୍ତି। ବଢ଼ୁଥିବା ଚାହିଦାକୁ ଦେଖି ବେପାରୀମାନେ ମଧ୍ୟ ଦର ବଢ଼ାଇଛନ୍ତି। ବଜାରରେ ଏବେ ୧୦ରୁ ୧୪ ପ୍ରକାରର ଆମ୍ବ ଉପଲବ୍ଧ ହେଉଥିବା ବେଳେ ଦେଶୀ ଆମ୍ବ ଦର ୫୦ ଟଙ୍କାରୁ ଅଧିକ ରହିଛି। ସେହିପରି ବାଇଗଣପଲି ଦର ୫୦ରୁ ୬୦, ସୁନ୍ଦରୀ ଆମ୍ବର ଦର ୪୦, ତୋଟାପଲ୍ଲି କେଜି ପ୍ରତି ୩୦, ଆଖୁରସ ଓ ମୁମ୍ବାଇ ଗ୍ରୀନ ଆମ୍ବ ମୂଲ୍ୟ ୫୦ ରହିଛି। ଲିଚୁ କିଲୋଗ୍ରାମ ପିଛା ଦର ୧୨୦ ଥିବାବେଳେ ଜାମୁଡୋଳ ୫୦ରୁ ୬୦ ଟଙ୍କାରେ ବିକ୍ରି ହେଉଛି। ପୂର୍ବରୁ ଆସିଥିବା ତାଳସଜ ଦର ରହିଛି ୩ଟାକୁ ୧୦ ଟଙ୍କା। ତରଭୁଜ ଦର କିଲୋଗ୍ରାମ ପିଛା ୨୦ ଟଙ୍କା ଥିବାବେଳେ ବେଲ ଗୋଟା ପ୍ରତି ୧୫ରୁ ୨୦ ଟଙ୍କା ରହିଛି।
ଅନୁଗୋଳ ସହରର ବସ୍ଷ୍ଟାଣ୍ଡ, ତହସିଲ ଛକ, ବଜାର ଛକ ଆଦି ଅଞ୍ଚଳରେ ପସରା ମେଲାଇଛନ୍ତି ଫଳ ବେପାରୀ। ସ୍ଥାୟୀ ବେପାରୀମାନେ ବହୁ ପରିମାଣର ଫଳ ଆଣିଥିବା ବେଳେ ଉଠା ଦୋକାନୀମାନେ ଗୋଟିଏ କି ଦୁଇ ପ୍ରକାରର ଫଳ ସହରରେ ବୁଲି ବୁଲି ବେପାର କରୁଛନ୍ତି। ଆମ୍ବ, ଲିଚୁ ପଡ଼ୋଶୀ ଆନ୍ଧ୍ରପ୍ରଦେଶ, କୋଲକାତା, ବିହାର, ଝାଡ଼ଖଣ୍ଡରୁ ଆସୁଥିବାବେଳେ ଜାମୁଡ଼ୋଳ ସ୍ଥାନୀୟ ଅଞ୍ଚଳରୁ ଆସୁଛି ବୋଲି ବେପାରୀମାନେ କହିଛନ୍ତି। ବଜାରକୁ ଆସିଥିବା ଆମ୍ବ ମଧ୍ୟରୁ ବମ୍ବେ ଗ୍ରିନ, ଆମ୍ରପଲି, ଗୁଲାବ ଖାସ, ହେମସାଗର, ଲାଟ ସୁନ୍ଦରି, ଲେଙ୍ଗଡ଼ା, ବାଇଗଣପଲି, ରାଜା ବାଇଗଣପଲି, ହାତୀମୁଣ୍ଡା, ଦଶେରୀ, ମଲ୍ଲିକା, ଗୁଲାବଖାସ ଓ ଦେଶୀ ଆମ୍ବର ଚାହିଦା ରହିଛି। ବର୍ତ୍ତମାନ ନୂଆକରି ଆସୁଥିବା ଫଳରେ ବେପାରୀ ବେଶ୍ ଦୁଇ ପଇସା ଲାଭ କରୁଛନ୍ତି ବୋଲି ବସ୍ଷ୍ଟାଣ୍ଡ ଠାରେ ବେପାର କରୁଥିବା ସନ୍ଦୀପ କହିଛନ୍ତି। ତାଙ୍କ ଘର ୟୁପି ହୋଇଥିବାବେଳେ ସେ ଦୀର୍ଘ ୧୦ ବର୍ଷ ହେବ ଏଠାରେ ବେପାର କରୁଛନ୍ତି। ବିଭିନ୍ନ ଋତୁ ଅନୁଯାୟୀ ଆସୁଥିବା ଫଳ ସେ ବିକ୍ରି କରୁଛନ୍ତି। ତେବେ ସାବିତ୍ରୀ ଓ ରଜ ବେଳେ ସବୁଠାରୁ ଅଧିକ ଅର୍ଥ ରୋଜଗାର ହେଉଥିବା ସନ୍ଦୀପ କହିଛନ୍ତି।
