ଭୁବନେଶ୍ୱର,୨୧ା୪(ବ୍ୟୁରୋ): କରୋନା ସଂକ୍ରମଣରେ ବିଶ୍ୱ ଛଟପଟ। ସମଗ୍ର ଦେଶ ମଧ୍ୟ ଏହି ମହାମାରୀ ସହିତ ଲଢୁଛି। ଏହାକୁ ମୁକାବିଲା କରିବାରେ ଡାକ୍ତର, ନର୍ସ ଓ ପାରାମେଡିକାଲ କର୍ମଚାରୀମାନେ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଛନ୍ତିି। ସେମାନେ ଜୀବନକୁ ବିପନ୍ନ କରି କରୋନା ରୋଗୀଙ୍କ ସେବାରେ ନିଜକୁ ନିୟୋଜିତ କରିଛନ୍ତିି। ସେମାନଙ୍କୁ ଅନେକ ସମୟରେ ମରଣାନ୍ତକ ଆକ୍ରମଣର ଶିକାର ହେବାକୁ ପଡୁଛି। ଦେଶର ବିଭିନ୍ନ ଭାଗରେ ନମୁନା ସଂଗ୍ରହ କରିବାକୁ ଗଲାବେଳେ ଲୋକାମାନେ ଆକ୍ରମଣ କରୁଛନ୍ତି। ରୋଗୀଙ୍କ ପାଇଁ ଜୀବନକୁ ବାଜି ଲଗାଇ ଦେଇଥିବା ଡାକ୍ତର ଓ ସ୍ବାସ୍ଥ୍ୟକର୍ମୀକୁ ସୁରକ୍ଷା ଯୋଗାଇ ଦେବାକୁ କେନ୍ଦ୍ର ସରକାର ଏ ପର୍ଯ୍ୟନ୍ତ ସେପରି କୌଣସି କଠୋର ଆଇନ କାର୍ଯ୍ୟକାରୀ କରି ନାହାନ୍ତି। ଅନ୍ୟ ରାଜ୍ୟରେ କାର୍ଯ୍ୟରତ ଡାକ୍ତରମାନଙ୍କର ଜୀବନ ବିପନ୍ନ ହୋଇଛି। ହିଂସାକାରୀଙ୍କୁ ଦମନ କରିବାକୁ କେନ୍ଦ୍ର ସରକାର ଓଡିଶା ଭଳି କଠୋର ଆଇନ ଆଣିବାକୁ ବିଭିନ୍ନ ମହଲରୁ ଦାବି ହେଉଛି।
କରୋନା ମୁକାବିଲା କରିବା ପାଇଁ ଲକ୍ଡାଉନଠାରୁ ଆରମ୍ଭ କରି କୋଭିଡ ୧୯ ମୁକାବିଲା ଲାଗି ହସ୍ପିଟାଲ ନିର୍ମାଣ କରିବା କ୍ଷେତ୍ରରେ ଓଡିଶା ଅନ୍ୟ ରାଜ୍ୟଠାରୁ ଆଗରେ ଥିବା ବେଳେ ଡାକ୍ତରଙ୍କ ସୁରକ୍ଷାକୁ ନେଇ ଉଦାହରଣ ପାଲଟିଛି। ରାଜ୍ୟରେ ଡାକ୍ତରଙ୍କ ଉପରେ ବିଭିନ୍ନ ସମୟରେ ରୋଗୀ ସମ୍ପର୍କୀୟ ଆକ୍ରମଣ କରିବା ଯୋଗୁ ସେମାନଙ୍କ ସୁରକ୍ଷାକୁ ନେଇ ଚିନ୍ତା ବଢିଯାଇଥିଲା। ଏପରିକି ସୁରକ୍ଷା ନ ଯୋଗାଇଲେ କାର୍ଯ୍ୟ କରିବେ ନାହିଁ ବୋଲି ସରକାରଙ୍କ ପାଖରେ ଦାବି କରିଥିଲେ। ସରକାର ଡାକ୍ତର, ନର୍ସ ଓ ପାରାମେଡିକାଲ କର୍ମଚାରୀଙ୍କୁ ସୁରକ୍ଷା ଦେବା ସହ ଡାକ୍ତରଖାନା ସମ୍ପତ୍ତି ନଷ୍ଟ କରୁଥିବା ଲୋକଙ୍କୁ ସାବାଡ କରିବାକୁ ଓଡିଶା ସ୍ବାସ୍ଥ୍ୟସେବା କର୍ମଚାରୀ ଓ ଡାକ୍ତରଖାନା ଆଇନ(ଓଡିଶା ମେଡିକେୟାର ସର୍ଭିସ ପର୍ସନ ଆଣ୍ଡ ମେଡିକେୟାର ଇନ୍ଷ୍ଟିଚ୍ୟୁଶନ(ପ୍ରିିଭେନଶନ ଅଫ୍ ଭାଓଲେନ୍ସ ଆଣ୍ଡ ଡ୍ୟାମେଜ ଅଫ୍ ପ୍ରପର୍ଟି ଆକ୍ଟ)୨୦୦୮ ଆଣଛନ୍ତିି। ଏହା ବିଧାନସଭାରେ ପାରିତ ହେବା ସହ ରାଜ୍ୟପାଳଙ୍କ ଅନୁମୋଦନ ପରେ ୨୦୦୯ ଫେବୃୟାରୀ ୧୩ ରୁ ରାଜ୍ୟରେ କାର୍ଯ୍ୟକାରୀ ହେଉଛି। ଏଥିରେ ଗଣ୍ଡଗୋଳକାରୀଙ୍କୁ କଠୋର ଦଣ୍ଡ ଦେବାର ବ୍ୟବସ୍ଥା କରାଯାଇଛି। ଯଦି ସ୍ବାସ୍ଥ୍ୟସେବାରେ ନିୟୋଜିତ ଥିବା କୌଣସି ବ୍ୟକ୍ତିଙ୍କୁ ଆକ୍ରମଣ କରି କିମ୍ବା ସ୍ବାସ୍ଥ୍ୟକେନ୍ଦ୍ରର କ୍ଷତି କରିବେ ଉକ୍ତ ଆଇନର ସେକ୍ସନ-୩ ଅନୁଯାୟୀ ଏହାକୁ ଏକ ଦଣ୍ଡନୀୟ ଅପରାଧ ଭାବେ ବିବେଚନା କରାଯିବା। ଅଭିଯୁକ୍ତଙ୍କୁ ୩ ବର୍ଷ ଜେଲ ଦଣ୍ଡ ସହିତ ୫୦ ହଜାର ଟଙ୍କା ଜରିମାନା ସହ ଜାମିନ ମିଳିବ ନାହିଁ। ଏଥିସହିତ ଡାକ୍ତରଖାନାର କ୍ଷତି ହୋଇଥିବା ସମ୍ପତ୍ତିର ମଧ୍ୟ କ୍ଷତିପୂରଣ ଦେବାକୁ ପଡିବ। ଡାକ୍ତରଖାନା ଉପକରଣ ଭାଙ୍ଗିଥିଲେ ସମୁଦାୟ କ୍ରୟ ମୂଲ୍ୟ ଦେବାକୁ ଆଇନରେ ବ୍ୟବସ୍ଥାରେ କରାଯାଇଛି। ଓଡିଶା ଆଇନକୁ ପାଥେୟ କରି କେନ୍ଦ୍ର ସରକାର ସମଗ୍ର ଦେଶ ପାଇଁ ଡାକ୍ତର ଓ ମେଡିକାଲଗୁଡିକର ସୁରକ୍ଷା ପାଇଁ ଆଇନ୍ ଲାଗୁ କରିବା ନେଇ ବିଭିନ୍ନ ମହଲରୁ ଦାବି ହେଉଛି।
