ରାୟଗଡ଼ା ଅଫିସ,୧୯।୧: ବିଶାଖାପାଟନମ୍ରୁ ରାୟଗଡ଼ା ଅଭିମୁଖେ ଶେଖ୍ ୟାସୋଦିନ୍ ନାମକ ଜଣେ ବ୍ୟକ୍ତି ରବିବାର ସକାଳେ ସମତା ଏକ୍ସପ୍ରେସରେ ତାଙ୍କର ଜଣେ ବନ୍ଧୁଙ୍କ ବିବାହ ଉତ୍ସବରେ ଯୋଗ ଦେବା ପାଇଁ ଆସୁଥିଲେ। ତାଙ୍କ ବନ୍ଧୁ ତାଙ୍କୁ କିଛି ଟଙ୍କା ଧାରସୂତ୍ରରେ ମାଗିଥିବାରୁ ସେ ୪ ଲକ୍ଷ ୫୦ ହଜାର ଟଙ୍କା ଧରି ଆସିଥିବା ବ୍ୟାଗ୍ଟିକୁ ଅନ୍ୟମନସ୍କ ହୋଇ ଟ୍ରେନରେ ବି-୪ ସିଟ୍ ନଂ ୨୭ରେ ରଖି ଚାଲି ଯାଇଥିଲେ। କିନ୍ତୁ ଷ୍ଟେଶନରେ ଓହ୍ଲାଇବା ପରେ ବ୍ୟାଗ୍ ଛାଡ଼ିଦେଇଥିବା ମନେ ପଡ଼ିବାରୁ ସେ ସଙ୍ଗେ ସଙ୍ଗେ ଆର୍ପିଏଫ୍ଙ୍କୁ ଅଭିଯୋଗ କରିଥିଲେ। ଆର୍ପିଏଫ୍ ଅଧିକାରୀ, ଆରପିଏଫ୍ ଆଇଆଇସିଡି. ଏନ୍ ତ୍ରିଲୋକ ଏହି ଘଟଣା ସମ୍ପର୍କରେ ଜାଣିବା ପରେ ୨ ଜଣ କନଷ୍ଟେବଳଙ୍କୁ ତଦନ୍ତ ପାଇଁ ନିର୍ଦ୍ଦେଶ ଦେଇଥିଲେ। ତେବେ ସିଙ୍ଗାପୁର ଷ୍ଟେଶନ ଓ ଥେରୁବାଲି ମଧ୍ୟରେ ଉକ୍ତ ବ୍ୟାଗ୍ଟିକୁ ଉଦ୍ଧାର କରି ଶେଖ୍ ୟାସୋଦିନ୍ଙ୍କୁ ଫେରସ୍ତ କରିଥିଲେ।
