କାବୁଲ,୭।୬(ପି.ଟି.): ଆଫ୍ଗାନିସ୍ତାନର କେତେଜଣ ତାରକା କ୍ରିକେଟର ଟ୍ରେନିଂ ତଥା ଅଭ୍ୟାସ ଆରମ୍ଭ କରିଛନ୍ତି। ସ୍ଥାନୀୟ କାବୁଲ କ୍ରିକେଟ ଷ୍ଟାଡିୟମରେ ରସିଦ ଖାନ୍, ମହମ୍ମଦ ନବିଙ୍କ ସମେତ ଆଉ କେତେଜଣ କ୍ରିକେଟର ଅଭ୍ୟାସ କରିଛନ୍ତି ବୋଲି ଆଫଗାନିସ୍ତାନ କ୍ରିକେଟ ବୋର୍ଡ (ଏସିବି) ସୂଚନା ଦେଇଛି। ଖେଳାଳିମାନେ ଏକମାସ ଧରି ଏହି ଟ୍ରେନିଂ କ୍ୟାମ୍ପରେ ଅଭ୍ୟାସ କରିବେ। ଏହି କ୍ୟାମ୍ପ୍ରେ ବ୍ୟାଟିଂ, ବୋଲିଂ ଓ ଦଳର ମୋଟାମୋଟି ପ୍ରଦର୍ଶନ ଉପରେ ଫୋକସ୍ କରାଯିବ। ଅନ୍ତର୍ଜାତୀୟ କ୍ରିକେଟ କାଉନସିଲ (ଆଇସିସି), ବିଶ୍ୱ ସ୍ବାସ୍ଥ୍ୟ ସଂଗଠନ (ଡବ୍ଲ୍ୟୁଏଚ୍ଓ) ଓ ଆଫଗାନ ସ୍ବାସ୍ଥ୍ୟ ମନ୍ତ୍ରଣାଳୟର ନିର୍ଦ୍ଦେଶନାମା ଓ ସହଯୋଗରେ ଏହି ଟ୍ରେନିଂ କ୍ୟାମ୍ପ ଆୟୋଜନ ହୋଇଛି।
ଶନିବାର ଏସିବି ମୁଖ୍ୟାଳୟରେ କୋଭିଡ-୧୯ ଖେଳାଳିମାନଙ୍କ ସଚେତନତା ନେଇ ଏକ ବୈଠକ ବସିଥିଲା। କ୍ୟାମ୍ପ ଚାଲୁଥିବା ବେଳେ କିପରି ଖେଳାଳିମାନେ କୋଭିଡ-୧୯ ସଂକ୍ରମଣଠାରୁ ଦୂରେଇ ରହିବେ ସେ ନେଇ ସତର୍କ କରାଇଦିଆଯାଇଥିଲା। ଆଗକୁ ଆୟୋଜନ ହେବାକୁଥିବା ଟି୨୦ ବିଶ୍ୱକପ୍ରେ ଆଫଗାନିସ୍ତାନ ଅଂଶଗ୍ରହଣ କରିବାର କାର୍ଯ୍ୟକ୍ରମ ରହିଛି। ସେହିପରି ନଭେମ୍ବର ୨୧ ତାରିଖରେ ପର୍ଥରେ ଆରମ୍ଭ ହେବାକୁ ଥିବା ଅଷ୍ଟ୍ରେଲିଆ ବିପକ୍ଷରେ ଆଫଗାନିସ୍ତାନ ଏକମାତ୍ର ଟେଷ୍ଟ ମଧ୍ୟ ଖେଳିବାର କାର୍ଯ୍ୟକ୍ରମ ରହିଛି। ଅଭ୍ୟାସ ଶିବିରରେ ସାମିଲଥିବା ଅନ୍ୟ ତାରକା କ୍ରିକେଟରମାନେ ହେଲେ ଅଧିନାୟକ ଅସଗର ଆଫଗାନ, ନାଜିବୁଲ୍ଲା ଜଡ୍ରାନ, ଗୁଲବଦିନ ନାଇବ, ଶପୁର ଜଡ୍ରାନ, ସମ୍ମିଲଲ୍ଲା ସେନଓ୍ବାରୀ, ମହମ୍ମଦ ସାହଜାଦ।
