ଲଣ୍ଡନ,୩।୪(ଏଏଫ୍ପି)- ଚଳିତବର୍ଷ ଅର୍ଥାତ୍ ୨୦୨୦ରେ ଟେନିସ ଖେଳାଯାଇପାରିବ ନାହିଁ ବୋଲି ଓ୍ବିମ୍ବେଲଡନ ମୁଖ୍ୟ ରିଚାର୍ଡ ଲୁଇସ୍ ଆଶଙ୍କା ପ୍ରକାଶ କରିଛନ୍ତି। ଚଳିତବର୍ଷ ସମ୍ପୂର୍ଣ୍ଣ ରୂପେ ଟେନିସ ବାତିଲ ହେବାର ଯଥେଷ୍ଟ ସମ୍ଭାବନା ରହିଛି ବୋଲି ସେ ପୂର୍ବାନୁମାନ କରିଛନ୍ତି। ଗତମାସ ପ୍ରାରମ୍ଭରୁ ଟେନିସ୍କୁ ଲକ୍ଡାଉନ କରାଯାଇଛି। ଦ୍ୱିତୀୟ ବିଶ୍ୱଯୁଦ୍ଧ ପରେ ବୁଧବାର ପ୍ରଥମ ଥର ପାଇଁ ଓ୍ବିମ୍ବେଲଡ଼ନ ଟେନିସକୁ ବାତିଲ କରାଯାଇଥିଲା। ଏହାପୂର୍ବରୁ ବର୍ଷର ଦ୍ୱିତୀୟ ଗ୍ରାଣ୍ଡସ୍ଲାମ ଟୁର୍ନାମେଣ୍ଟ ଫ୍ରେଞ୍ଚ୍ ଓପନ୍କୁ ସେପ୍ଟେମ୍ବର- ଅକ୍ଟୋବରକୁ ଘୁଞ୍ଚାଇବାକୁ ନିଷ୍ପତ୍ତି ନିଆଯାଇଥିଲା। ତେଣୁ ଦୁଇଟି ବଡ଼ ଟୁର୍ନାମେଣ୍ଟ ବାତିଲ କରାଯାଇଥିବାରୁ ଟେନିସ ଆୟୋଜନ ନେଇ ଏବେ ଅନିଶ୍ଚିତତା ସୃଷ୍ଟି ହୋଇଛି। ତେଣୁ ଏବର୍ଷ ଆଉ ଟେନିସ ଆୟୋଜନ ହୋଇପାରିବ ନାହିଁ ବୋଲି ଅଲ ଇଂଲଣ୍ଡ କ୍ଲବ ମୁଖ୍ୟ ଲୁଇସ୍ କହିଛନ୍ତି। ଆଗକୁ କ’ଣ ହେବ ସେ ନେଇ ମଧ୍ୟ କହିବା କଷ୍ଟକର। ତେବେ ବର୍ଷର ଅନ୍ତିମ ତଥା ପରବର୍ତ୍ତୀ ଗ୍ରାଣ୍ଡସ୍ଲାମ ୟୁଏସ୍ ଓପନ୍ ଅଗଷ୍ଟ- ସେପ୍ଟେମ୍ବରରେ ଆୟୋଜନ ହେବ ଓ ନୂଆ ତାରିଖ ତଥା କାର୍ଯ୍ୟସୂଚୀରେ ଫ୍ରେଞ୍ଚ୍ ଓପନ ଆୟୋଜନ ହେବ ବୋଲି ସେ ଆଶାପ୍ରକାଶ କରିଛନ୍ତି।
ଅନ୍ୟପଟେ ବର୍ଷର ଶେଷ କ୍ୱାର୍ଟରରେ କ୍ରୀଡ଼ା ପ୍ରତ୍ୟାବର୍ତ୍ତନ କରିବ ବୋଲି ସ୍ପାନିଶ୍ ଟେନିସ ଫେଡେରେଶନ (ଆରଏଫ୍ଇଟି) ଅଧ୍ୟକ୍ଷ ମିଗୁଏଲ ଡିଆଜ କହିଛନ୍ତି। ବର୍ଷର ଶେଷ କ୍ୱାର୍ଟରରେ ଆମେ ଟେନିସ ଦେଖିବାକୁ ପାଇବୁ ବୋଲି ସେ ଆଶାପ୍ରକାଶ କରିଛନ୍ତି। ତେବେ ଦର୍ଶକ ଏଥିରେ ସାମିଲ ହେବା ନେଇ ସେ ନିଶ୍ଚିତ ନୁହଁ। ତେବେ କୋର୍ଟକୁ ନିଶ୍ଚିତ ଭାବେ ଟେନିସ ଫେରିବ ବୋଲି ଡିଆଜ କହିଛନ୍ତି।
