ଖୋର୍ଦ୍ଧା ଅଫିସ,୭ା୫: ମହାମାରୀ କରୋନା (କୋଭିଡ-୧୯)କୁ ପ୍ରତିହତ କରିବା ଲାଗି ଦେଶରେ ତୃତୀୟ ପର୍ଯ୍ୟାୟ ଲକ୍ଡାଉନ ଜାରି ରହିଛି। ଅତ୍ୟାବଶ୍ୟକ ସାମଗ୍ରୀ ଦୋକାନ ଖୋଲା ରହୁଥିବା ବେଳେ ମଦ ଦୋକାନ ବନ୍ଦ ଲାଗି ପ୍ରଶାସନ ପକ୍ଷରୁ ନିର୍ଦ୍ଦେଶ ରହିଛି। ଅନ୍ୟପକ୍ଷରେ ଖୋର୍ଦ୍ଧାରେ ଚୋରା ମଦ ଓ ଗଞ୍ଜେଇ ବେପାର ବଢ଼ି ଚାଲିଛି। ଅବକାରୀ ଓ ପୋଲିସର ଛତ୍ରଛାୟା ତଳେ ଏହି ବେପାର ଚାଲିଥିବା ସାଧାରଣରେ ଚର୍ଚ୍ଚା ହେଉଛି।
ସୂଚନାଥାଉ କି, ଲକ୍ଡାଉନ ଜାରି ରହିଥିବା ବେଳେ ଗତ ଏପ୍ରିଲ ୨୪ ତାରିଖରେ କୌଣସି ସୁତ୍ରରୁ ଖବରପାଇ ଏସ୍ପି ଅଜୟ ପ୍ରତାପ ସ୍ବାଇଁ ଟିମ୍ ସହ ଟାଉନ(ଆଦର୍ଶ) ଥାନା ଅନ୍ତର୍ଗତ ପଲ୍ଲା ତୋଟାପଡା ସ୍ଥିତ ଏକ ବନ୍ଦ କୋଠରୀର ତାଲା ଭାଙ୍ଗି ୭୦ଲକ୍ଷରୁ ଊର୍ଦ୍ଧ୍ୱ ଟଙ୍କାର ୩୧ଶହ ପେଟି ବିଦେଶୀ ମଦ ଜବତ କରିଥିଲେ। ସେହିପରି ଗତ ଫେବୃୟାରୀ ୬ ତାରିଖରେ ଅବକାରୀ ପୋଲିସ ଖୋର୍ଦ୍ଧା ଉପକଣ୍ଠ ମୁକୁନ୍ଦପ୍ରସାଦ ଅଞ୍ଚଳରୁ ୮ଲକ୍ଷ ଟଙ୍କା ମୂଲ୍ୟର ୧୬୦କେଜି ଗଞ୍ଜେଇ ଜବତ କରିବା ସହ ୩ଜଣଙ୍କୁ ଗିରଫ କରିଥିଲେ। ମାର୍ଚ୍ଚ ୧୯ରେ ତୋଟାପଡା ଛକ ନିକଟରୁ ଅବକାରୀ ଗୁଇନ୍ଦା ବିଭାଗର ଏକ ସ୍ବତନ୍ତ୍ର ଟିମ ଚଢ଼ାଉ କରି ଜଣକୁ ଗିରଫ କରିବା ସହ ତାଙ୍କ ଠାରୁ ୨ଲକ୍ଷରୁ ଊର୍ଦ୍ଧ୍ୱ ଟଙ୍କାର ୨୩କେଜି ଗଞ୍ଜେଇ ବସ୍ତା ଜବତ କରିଥିଲେ। ଖୋର୍ଦ୍ଧା ଅବକାରୀ ଏପ୍ରିଲ୨୪ ରେ ବେଗୁନିଆ ବ୍ଲକ ରାସୋଲ ଗ୍ରାମରେ ଚାଲିଥିବା ଏକ ନକଲି ମଦ ଦୋକାନକୁ ଠାବ କରିବା ସହ ଜଣେ ମହିଳାଙ୍କୁ ଗିରଫ କରିଥିବା ବେଳେ ତାଙ୍କ ଠାରୁ ଏକ କାର ଏବଂ ୧୭ଲକ୍ଷ ୬୦ହଜାର ଟଙ୍କା ଏବଂ କାର ଜବତ ହୋଇଥିଲା। ଗତ ମଙ୍ଗଳବାର ବୋଲଗଡ ଥାନା ଅସରଳା ଗ୍ରାମରେ ଅବକାରୀ ବିଭାଗ ଚଢ଼ାଉ କରି ୭୫କେଜି ଗଞ୍ଜେଇ ଜବତ କରିବା ସହ ଜଣେ ମହିଳାଙ୍କୁ ଗିରଫ କରିଛି। ତାଙ୍କ ନିକଟରୁୁ ୨ଲକ୍ଷ ୬୦ହଜାର ଟଙ୍କା ଓ ଏକ କାର ଜବତ କରାଯାଇଛି। ମାର୍ଚ୍ଚ ୨୩ରୁ ଏ ପର୍ଯ୍ୟନ୍ତ ଖୋର୍ଦ୍ଧା ପୋଲିସ ପକ୍ଷରୁ ଏ ନେଇ ୪୧ଟି ମାମଲା ରୁଜୁ ହୋଇଥିବା ବେଳେ ବିପୁଳ ପରିମାଣର ମଦ ଜବତ କରାଯାଇଛି। ଏ ସମ୍ପର୍କରେ ଏସ୍ପି ସ୍ବାଇଁ କହିଛନ୍ତି, ଲକ୍ଡାଉନ ସମୟରେ ଜିଲାର ସମସ୍ତ ଥାନା ଅଞ୍ଚଳରେ ଚଢ଼ାଉ ଜାରି ରହିଛି। ଚୋରା ମଦ କାରବାର ଘଟଣାରେ ବିଭିନ୍ନ ଥାନାରେ ମାମଲା ରୁଜୁ ହୋଇଛି। ରାତ୍ରି ପାଟ୍ରୋଲିଂକୁ କଡ଼ାକଡ଼ି କରାଯିବ। ଚୋରା ମଦ କାରବାରକୁ ପ୍ରୋତ୍ସାହନ ଦିଆଯିବ ନାହିଁ।
