ନୂଆପଡ଼ା ଅଫିସ,୨ା୬- ନୂଆପଡ଼ା ଜିଲାବାସୀ କରୋନା ମହାମାରୀକୁ ନେଇ ଚିନ୍ତାରେ ଥିବା ବେଳେ ଛତିଶଗଡ ପଟୁ ପଙ୍ଗପାଳ ମାଡିଆସୁଥିବା ନେଇ ଚାଷୀ ଚିନ୍ତିତ ହୋଇପଡିଛନ୍ତି। ଚାଷୀଙ୍କ ସହ କୃଷି ବିଭାଗ ସୀମାନ୍ତରେ ଦୃଷ୍ଟି ରଖିଛି। ଇତିମଧ୍ୟରେ ଜିଲା କୃଷି ବିଭାଗ ତୁହାକୁ ତୁହା ବୈଠକ କରି ପଙ୍ଗପାଳ ଅଟକାଇବା ନେଇ ପ୍ରସ୍ତୁତି କରୁଛି । ବର୍ତ୍ତମାନ ଛତିଶଗଡ଼ ରାଜ୍ୟ କରୁଆଁ ଜିଲା ଭରତପୁରର ୩/୪ଟି ଗାଁରେ ପଙ୍ଗପାଳ ପହଞ୍ଚି ଥିବା କୁହାଯାଉଛି। ଯଦି ସେମାନେ ଓଡ଼ିଶା ମୁହାଁ ହୁଅନ୍ତି ତେବେ ପରିସ୍ଥିତି ସାଂଘାତିକ ହେବ ବୋଲି ଆଶଙ୍କା ପ୍ରକାଶ ପାଇଛି। ସମ୍ପ୍ରତି ଜିଲାର ସୀମାନ୍ତ ଅଞ୍ଚଳ ନୂଆପଡା, ଖଲନା, ସାରାବଙ୍ଗ, କେନ୍ଦୁବାହାରା, ପରକୋଡ, ବେଲଟୁକୁରୀ ଆଦି ଗାଁରେ ରବିଧାନ ଅମଳ ସରି ନ ଥିବାରୁ ଚାଷୀମାନେ ଚିନ୍ତାରେ ଅଛନ୍ତି। ପରସ୍ଥିତିକୁ ଦୃଷ୍ଟିରେ ରଖି ଜିଲା କୃଷି ଉପନିର୍ଦ୍ଦେଶକଙ୍କ ଅଧ୍ୟକ୍ଷତାରେ ମଙ୍ଗଳବାର ଏକ ଜରୁରିକାଳୀନ ବୈଠକ ବସିଥିଲା। ଏଥିରେ ପଙ୍ଗପାଳ ସମ୍ଭାବ୍ୟ ଆଗମନକୁ ନେଇ ସମ୍ପୃକ୍ତ ଅଞ୍ଚଳର ଚାଷୀମାନଙ୍କୁ ସତର୍କ କରିଦିଆଯାଇଛି । ବୈଠକରେ ସମସ୍ତ କୃଷି କର୍ମଚାରୀ,ଔଷଧ ଡିଲରମାନଙ୍କୁ ଆବଶ୍ୟକ ପରିମାଣର ଔଷଧ ରଖିବାକୁ ନିର୍ଦ୍ଦେଶ ଦିଆଯାଇଛି । ଏହି କୀଟମାନେ ପାଗ କୋହଲା ହେଲେ ଆଗକୁ ଆଗକୁ ଯାଇ ପାରି ନ ଥାନ୍ତି। ବର୍ତ୍ତମାନ ଓଡ଼ିଶାରେ ମଝିରେ ମଝିରେ ବର୍ଷା ହେଉଥିବାରୁ ଚାଷୀଙ୍କୁ ବେଶି ଭୟଭୀତ ହେବାର ନାହିଁ। ଏମାନଙ୍କୁ ମୁକାବିଲା କରିବାକୁ ଆମ ନିକଟରେ ଯଥେଷ୍ଟ ଦକ୍ଷତା ରହିଛି ବୋଲି ସହକାରୀ କୃଷି ଅଧିକାରୀ ହିମାଂଶୁ କୁମାର ମହାପାତ୍ର କହିଛନ୍ତି। ଏମାନଙ୍କ ଆଗମନ ଉପରେ ଟିକିଏ ସୁରାକ ପାଇଲେ ତତ୍କ୍ଷଣାତ କୃଷି କର୍ମଚାରୀଙ୍କୁ ସୂଚନା ଦେବାକୁ କୁହାଯାଇଛି । ଏହାକୁ ନେଇ ଏକ କଣ୍ଟ୍ରୋଲ ରୁମ୍ କରାଯାଇଛି । ଚାଷୀମାନେ ୨୪ଘଣ୍ଟା ମୋବାଇଲ ନମ୍ବର୯୪୩୯୨୬୪୬୯୫ରେ ଯୋଗାଯୋଗ କରିବାକୁ ଜିଲା କୃଷି ଉପନିର୍ଦ୍ଦେଶକ ଜାହିଦ ମହମ୍ମଦ କହିଛନ୍ତି।
