କଟକ ଅଫିସ୍,୧୫ା୪
କରୋନା ମୁକାବିଲା ନେଇ ମଙ୍ଗଳବାର ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ରାଜ୍ୟର ବରିଷ୍ଠ ପ୍ରଶାସନିକ ଅଧିକାରୀଙ୍କ ସହ ଆଲୋଚନା କରିଥିଲେ। ସେ ଲକ୍ଡାଉନ୍ ସମୟରେ ବଢୁଥିବା ଘରୋଇ ହିଂସାକୁ ନେଇ ଚିନ୍ତା ପ୍ରକଟ କରିଥିଲେ । ଘରୋଇ ହିଂସା ରୋକିବା ଦିଗରେ ପଦକ୍ଷେପ ନେବା ପାଇଁ ରାଜ୍ୟ ପୋଲିସକୁ ନିର୍ଦ୍ଦେଶ ଦେଇଥିଲେ। ମୁଖ୍ୟମନ୍ତ୍ରୀଙ୍କଠାରୁ ନିର୍ଦ୍ଦେଶ ପାଇବା ପରେ ସକ୍ରିୟ ହୋଇଛି ରାଜ୍ୟ ପୋଲିସ। ମଙ୍ଗଳବାର ଏନେଇ ପୋଲିସ ମହାନିର୍ଦ୍ଦେଶକ(ଡିଜିପି) ଅଭୟ ଏକ ନିର୍ଦ୍ଦେଶନାମା ଜାରି କରିଛନ୍ତି। ଅଭିଯୋଗ ଦାଖଲ କରିବାକୁ ଥାନାକୁ ଆସିବାର ଆବଶ୍ୟକ ନାହିଁ। ପୋଲିସ ଅଧିକାରୀମାନେ ନିଜେ ଅଭିଯୋଗକାରୀଙ୍କ ଘରକୁ ଯାଇ ଏଫ୍ଆଇଆର୍ ଆଣିବାକୁ ସେ ନିର୍ଦ୍ଦେଶ ଦେଇଛନ୍ତି।
ରାଜ୍ୟ ପୋଲିସ ମୁଖ୍ୟାଳୟ ପକ୍ଷରୁ କୁହାଯାଇଛି, ଲକ୍ଡାଉନ୍ ସମୟରେ ଅନେକ ଦେଶ ଏବଂ ରାଜ୍ୟରେ ଘରୋଇ ହିଂସା ବଢ଼ୁଥିବା ଦେଖିବାକୁ ମିଳିଛି। ଓଡିଶାରେ ମଧ୍ୟ ଏଭଳି ସ୍ଥିତିର ସମ୍ଭାବନାକୁ ଏଡ଼ାଇ ଦିଆଯାଇ ନ ପାରେ। ମୁଖ୍ୟମନ୍ତ୍ରୀଙ୍କ ନିର୍ଦ୍ଦେଶ ପାଳନ କରିବାକୁ ଯାଇ ଡିଜିପି ଅଭୟ କେତେକ ନିର୍ଦ୍ଦେଶନାମା ଜାରି କରିଛନ୍ତି। ଘରୋଇ ହିଂସା ମାମଲାକୁ ପ୍ରଥମେ ଗୁରୁତ୍ୱ ଦିଆଯିବ। ଏପର୍ଯ୍ୟନ୍ତ ଏହିପରି ମାମଲାର ସେମିତି କିଛି ବୃଦ୍ଧି ଘଟିନାହିଁ। ତଥାପି ଏଥିପାଇଁ ସତର୍କ ରହିବାର ଆବଶ୍ୟକତା ରହିଛି। ରାଜ୍ୟର ବିଭିନ୍ନ ଥାନା ଓ ଜିଲାସ୍ତରରେ କାର୍ଯ୍ୟ କରୁଥିବା ୬ଶହରୁ ଅଧିକ ହେଲ୍ପଲାଇନ୍ ଏବଂ ଜିଲା ନିୟନ୍ତ୍ରଣ କକ୍ଷ ଟେଲିଫୋନ୍ ନମ୍ବରଗୁଡ଼ିକର ବ୍ୟାପକ ପ୍ରଚାର ଓ ସକ୍ରିୟ କରାଯିବ। ଫଳରେ ଏହାର ବହୁଳ ବ୍ୟବହାର ହୋଇପାରିବ। ଘରୋଇ ହିଂସାର ଶିକାର ହେଉଥିବା ବ୍ୟକ୍ତି ନିଜେ ଅଭିଯୋଗ ଦାଖଲ କରିବା ପାଇଁ ଥାନାକୁ ଯିବାର ଆବଶ୍ୟକତା ନାହିଁ। ଏନେଇ ଫୋନ୍କଲ୍ ପାଇବା ପରେ, ପୋଲିସ ଅଧିକାରୀମାନେ ନିଜେ ଅଭିଯୋଗକାରୀଙ୍କ ଘରେ ପହଞ୍ଚି ତାଙ୍କ ସହ ଆଲୋଚନା କରି ଏଫ୍ଆଇଆର୍ ସଂଗ୍ରହ କରିବେ। ତଦନ୍ତ ସହ ଆବଶ୍ୟକ ପଦକ୍ଷେପ ନିଆଯିବ। କେବଳ ଫୋନ୍କଲ୍ ନୁହଁ, ସେମାନେ ଚାହିଁଲେ ଓଡ଼ିଶା ପୋଲିସ ସିଟିଜେନ୍ ପୋର୍ଟାଲ୍ ଏବଂ ସହାୟତା ମୋବାଇଲ୍ ଆପ୍ ଜରିଆରେ ମଧ୍ୟ ପୋଲିସ ସହ ଯୋଗାଯୋଗ କରିପାରିବେ। ଲକ୍ଡାଉନ ସମୟରେ ଘରୋଇ ହିଂସା ସମ୍ପର୍କିତ ସମସ୍ତ ମାମଲାଗୁଡ଼ିକୁ ସବ୍-ଇନ୍ସପେକ୍ଟର କିମ୍ବା ତଦୂର୍ଦ୍ଧ୍ୱ ପାହ୍ୟାର ଅଧିକାରୀମାନେ ତଦନ୍ତ କରିବେ। ଘରୋଇ ହିଂସା ସମ୍ପର୍କିତ ସମସ୍ତ ମାମଲାର ତଦାରଖ ଡିଏସ୍ପି କିମ୍ବା ତଦୂର୍ଦ୍ଧ୍ୱ ପାହ୍ୟାର ଅଧିକାରୀଙ୍କ ଦ୍ୱାରା କରାଯିବ। ଜିଲା ପୋଲିସରେ କାର୍ଯ୍ୟରତ ମହିଳା ବିରୋଧୀ ହିଂସା ମାମଲାର ତଦନ୍ତକାରୀ ୟୁନିଟ୍(ଆଇୟୁସିଏଡବ୍ଲ୍ୟୁ) ଏହି ମାମଲାଗୁଡ଼ିକ ତଦାରଖ କରିବ ବୋଲି ଡିଜିପି ଅଭୟ ନିର୍ଦ୍ଦେଶ ଦେଇଛନ୍ତି।
