ଭୁବନେଶ୍ୱର,୨।୨(ବ୍ୟୁରୋ): ସବୁ ସମୟରେ ଓଡିଶା କେନ୍ଦ୍ର ସରକାରଙ୍କ ବୈମାତୃକ ମନୋଭାବର ଶିକାର ହୋଇ ଆସୁଛି। ଶନିବାର କେନ୍ଦ୍ର ସରକାରଙ୍କ ଦ୍ୱାରା ଆଗତ ୨୦୨୦-୨୧ ଆର୍ଥିକବର୍ଷର ବଜେଟରେ ମଧ୍ୟ ଏହାର ଝଲକ ଦେଖିବାକୁ ମିଳିଛି। କେବଳ କେନ୍ଦ୍ରୀୟ ଅନୁଦାନ ନୁହେଁ, ସଂସ୍କୃତି ଓ ପର୍ଯ୍ୟଟନ, ପାନୀୟ ଜଳ ଯୋଗାଣ, ଆଦିବାସୀଙ୍କ ବିକାଶ ଭଳି କ୍ଷେତ୍ରକୁ ମଧ୍ୟ ଅବହେଳା କରାଯାଉଛି। ରାଜ୍ୟରେ ବହୁ ପୁରାତନ ପ୍ରତ୍ନତତ୍ତ୍ୱ ସ୍ଥଳ ରହିଥିବା ବେଳେ କେନ୍ଦ୍ର ସରକାରଙ୍କ ଆଇକନିକ ପ୍ରତ୍ନତତ୍ତ୍ୱ ସାଇଟ୍ରେ ଓଡିଶା ସ୍ଥାନ ପାଇନାହିଁ। ଶନିବାର ଅର୍ଥମନ୍ତ୍ରୀ ନିର୍ମଳା ସୀତାରାମନ ବଜେଟ ଅଭିଭାଷଣ ରଖିବା ବେଳେ ଦେଶରେ ନୂତନ ୫ଟି ପ୍ରତ୍ନତତ୍ତ୍ୱ ସ୍ଥଳକୁ ଆଇକନିକ ସାଇଟ୍ ଭାବେ ବିକାଶ କରିବାକୁ ଘୋଷଣା କରିଛନ୍ତି। ସେହି ସ୍ଥାନଗୁଡିକ ହେଲା ହରିୟାଣାର ରାଖିଗରହି, ଉତ୍ତର ପ୍ରଦେଶର ହସ୍ତିନାପୁର, ଆସାମର ଶିଭାଗଡ, ଗୁଜରାଟର ଢୋଲଭିରା ଏବଂ ତାମିଲନାଡୁର ଆଦିଚାନାଲୁର। ଓଡିଶାର ରତ୍ନଗିରି, ଲଳିତଗିରି, ଧଉଳିଗିରି, ଉଦୟଗିରି ଭଳି ପ୍ରତ୍ନତତ୍ତ୍ୱ ସ୍ଥଳ ଥିବା ବେଳେ କେନ୍ଦ୍ର ବଜେଟରେ ଏହାକୁ ସ୍ଥାନିତ କରାଯାଇ ନାହିଁ। କେବଳ ସେତିକି ନୁହେଁ, ଆଦିବାସୀ ବହୁଳ ଓଡିଶାକୁ ମଧ୍ୟ କେନ୍ଦ୍ର ସରକାର ଅଣଦେଖା କରିଛନ୍ତି। ଝାଡଖଣ୍ଡଠାରେ ଏକ ଆଦିବାସୀ ମ୍ୟୁଜିୟମ କରିବାକୁ ବଜେଟରେ ବ୍ୟୟ ବରାଦ କରାଯାଇଛି। ଏହାକୁ ନେଇ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ମଧ୍ୟ ଅସନ୍ତୋଷ ବ୍ୟକ୍ତ କରିଛନ୍ତି।
ଅନ୍ୟପକ୍ଷରେ ରାଜ୍ୟରେ କେନ୍ଦ୍ର ପ୍ରବର୍ତ୍ତିତ ଯୋଜନାରେ ଚାଲୁ ରହିଥିବା ବିିଭିନ୍ନ ସ୍କିମ୍ରେ ଏହି ବଜେଟରେ ସେପରି କୌଣସି ଆଖିଦୃଶିଆ ବ୍ୟୟ ବରାଦ ହୋଇନାହିଁ। କେନ୍ଦ୍ରୀୟ ଯୋଜନାରେ ଅଂଶଧନ କାଟ କରିବା ଏବଂ ୮ଟି ଯୋଜନାକୁ ବନ୍ଦ କରିବା ଯୋଗୁ ରାଜ୍ୟ ଉପରେ ଆର୍ଥିକ ଚାପ ବଢି ଚାଲିଛି। ତେବେ ଏହି ନୂତନ ବଜେଟରେ କେନ୍ଦ୍ର ପ୍ରବର୍ତ୍ତିତ ଯୋଜନାଗୁଡିକ ପାଇଁ ବ୍ୟୟ ବରାଦ ହୋଇ ନାହିଁ। ଏହାଛଡା ରାଜ୍ୟଗୁଡିକର ଅଂଶଧନ କେନ୍ଦ୍ରୀୟ ଟିକସକୁ ପ୍ରାୟ ୫୯ ହଜାର କୋଟି ଟଙ୍କାକୁ ହ୍ରାସ କରାଯାଇଥିବାରୁ ଓଡିଶା ଏ ବାବଦରେ ପ୍ରାୟ ୩ ହଜାର କୋଟି ହରାଇବା ନେଇ ଆଶଙ୍କା ପ୍ରକାଶ ପାଇଛି। ପାନୀୟ ଜଳ ଯୋଗାଣ କେନ୍ଦ୍ରର ଗୁରୁତ୍ୱପୂର୍ଣ୍ଣ ଦାୟିତ୍ୱ। ଏଥିପାଇଁ ପ୍ରସ୍ତାବିତ ୩.୬ ଲକ୍ଷ କୋଟି ବ୍ୟୟ ବରାଦ କରାଯିବା ପରିବର୍ତ୍ତେ ମାତ୍ର ୧୧,୫୦୦ କୋଟି ଟଙ୍କା ବ୍ୟବସ୍ଥା ହୋଇଛି। ଓଡିଶା ପାନୀୟ ଜଳ ଯୋଗାଣ କ୍ଷେତ୍ରରେ ୩୬୦୦ କୋଟି ଟଙ୍କା ଖର୍ଚ୍ଚ କରି ସାରିଲାଣି। ବଜେଟରେ ଏଥିପାଇଁ ପର୍ଯ୍ୟାପ୍ତ ଅର୍ଥ ବରାଦ କରାଯାଇ ନ ଥିବାରୁ ରାଜ୍ୟ ଉପରେ ଚାପ ବଢିବା ସମ୍ଭାବନା ରହିଛି।
