ଭୁବନେଶ୍ୱର,୧୧।୬ (ବ୍ୟୁରୋ): ଜଗନ୍ନାଥଙ୍କ ଚିତ୍ରଥିବା ଏକ କେଟିଲ୍ ବିକ୍ରିକୁ ନେଇ ଅଡ଼ୁଆରେ ପଡ଼ିଛି ଦେଶର ଆଗଧାଡ଼ିରେ ଥିବା ଅନ୍ୟତମ ଇ-କମର୍ସ ସଂସ୍ଥା ‘ଫ୍ଲିପ୍କାର୍ଟ’। ଫ୍ଲିପ୍କାର୍ଟର ହୋମ୍ ଡେକର୍ ସେକ୍ସନରେ ଶ୍ରୀଜଗନ୍ନାଥ, ବଳଭଦ୍ର ଏବଂ ଦେବୀ ସୁଭଦ୍ରାଙ୍କ ଚିତ୍ର ଥିବା ଏକ ଚା’ କେଟିଲକୁ ନେଇ ବିବାଦ ଦେଖାଦେଇଛି। ତେବେ ଏନେଇ ଟୁଇଟରରେ ପ୍ରତିବାଦ ପରେ ଫ୍ଲିପ୍କାର୍ଟ ସମ୍ପୃକ୍ତ କେଟିଲ୍କୁ ହଟାଇଦେଇଛି। ସାଗର ପ୍ରଧାନ ନାମକ ଜଣେ ଟୁଇଟର ବ୍ୟବହାରକାରୀ ପ୍ରଥମେ ଏହାର ପ୍ରତିବାଦ କରିବା ପରେ ଅନ୍ୟମାନେ ଏହା ଜଗନ୍ନାଥ ସଂସ୍କୃତି ବିରୋଧୀ ଏବଂ ଅପମାନଜନକ ବୋଲି କରି ନିନ୍ଦା କରିଥିଲେ। ଏଥିସହ ଫ୍ଲିପ୍କାର୍ଟ ବିରୋଧରେ ଅନ୍ଲାଇନ୍ କ୍ୟାମ୍ପେନ୍ ଆରମ୍ଭ ହେବାପରେ ଶେଷରେ ଉକ୍ତ ସଂସ୍ଥା ତାହାକୁ ହଟାଇ ଦେଇଛି।
ତେବେ ଏହା ପ୍ରଥମ ଘଟଣା ନୁହେଁ, ପୂର୍ବରୁ ମଧ୍ୟ କେତେକ ଇ-କମର୍ସ ପ୍ଲାଟ୍ଫର୍ମ ଭଗବାନଙ୍କ ଫଟୋ ଥିବା ଡୋର୍ମ୍ୟାଟ୍, ଜୋତା ଆଦି ବିକ୍ରିକରି ବିବାଦକୁ ଆସିଥିଲେ। ସେହିଭଳି କିଛିଦିନ ତଳେ ମହାପ୍ରଭୁ ଶ୍ରୀଜଗନ୍ନାଥଙ୍କୁ ବିକୃତ କରି କାର୍ଟୁନ ଚିତ୍ର ପ୍ରକାଶ କରିଥିବା ଏକ ସଂସ୍ଥା ବିରୋଧରେ ପୁରୀ ସିଂହଦ୍ୱାର ଥାନାରେ ଏତଲା ହୋଇଥିଲା। ଏବେ ଜଗନ୍ନାଥ, ବଳଭଦ୍ର ଓ ସୁଭଦ୍ରା ଅଣସର ଘରେ ଥିବାବେଳେ ଏହାକୁ କ୍ୱାରାଣ୍ଟାଇନ ବୋଲି ଦର୍ଶାଇ ‘ପତ୍ରିକା ଡଟ୍ କମ୍’ ନାମକ ସଂସ୍ଥା ପୋଷ୍ଟ କରିଥିବା କାର୍ଟୁନ ଚିତ୍ରକୁ ନେଇ ଯାତ୍ରା ଅଭିନେତା ପୀୟୂଷ ତ୍ରିପାଠୀ ଆପତ୍ତି କରିଥିଲେ। ଏଭଳି କାର୍ଟୁନ ଜଗନ୍ନାଥପ୍ରେମୀଙ୍କ ମନରେ ଆଘାତ ଦେବା ସହ ମହାପ୍ରଭୁ ଏବେ କ୍ୱାରାଣ୍ଟାଇନରେ ରହିଥିବା କୁହାଯିବା ଜଗନ୍ନାଥ ସଂସ୍କୃତି ପ୍ରତି ଅପମାନ ବୋଲି ସେ କହିଥିଲେ।
