ସିଡନୀ,୨୭।୩(ଏଏଫ୍ପି): କୋଭିଡ-୧୯ ସଂକ୍ରମଣରୁ ରକ୍ଷା ପାଇବା ପାଇଁ ଫୁଟବଲ ଫେଡେରେଶନ ଅଫ୍ ଅଷ୍ଟ୍ରେଲିଆ (ଏଫ୍ଏଫ୍ଏ) ତା’ର କର୍ମଚାରୀଙ୍କୁ ଘରକୁ ବିଦା କରିଛି। ଫେଡେରେଶନର ୭୦ ପ୍ରତିଶତ କର୍ମଚାରୀଙ୍କୁ ଘରକୁ ଯିବାକୁ ପଡିଛି। କରୋନା ଭାଇରସ୍ କାରଣରୁ ସାରା ଦେଶରେ ଫୁଟବଲ ଇଭେଣ୍ଟ ପୂରା ଠପ୍ ହୋଇଛି। ଫଳରେ ଫେଡେରେଶନ ଆର୍ଥିକ କ୍ଷତି ସହିବା ନିଶ୍ଚିତ ହୋଇଯାଇଛି। ନ୍ୟାଶନାଲ ରେଜିଷ୍ଟ୍ରେଶନ ଫି, ବ୍ରଡକାଷ୍ଟ ମନୀ, ସ୍ପୋନ୍ସରଶିପ୍ ଓ ଟିକେଟ ବିକ୍ରି ଏମିତି ସବୁକିଛି ବାଧାପ୍ରାପ୍ତ ହୋଇଛି ବୋଲି ଏଫ୍ଏଫ୍ଏ ମୁଖ୍ୟ କାର୍ଯ୍ୟନିର୍ବାହୀ ଜେମ୍ସ ଜନସନ କହିଛନ୍ତି। ତେଣୁ ଫେଡେରେଶନକୁ କ୍ରିୟାଶୀଳ ରଖିବା ପାଇଁ ଅନିଚ୍ଛା ସତ୍ତ୍ୱେ ଆମ ଏହି କଷ୍ଟକର ନିଷ୍ପତ୍ତି ନେବାକୁ ହେଲା ବୋଲି ସେ ସ୍ପଷ୍ଟ କରିଛନ୍ତି।
ଏଫ୍ଏଫ୍ଏରେ ପାଖାପାଖି ୧୦୦ ଜଣ କର୍ମଚାରୀ କାର୍ଯ୍ୟ କରୁଛନ୍ତି। ଆଉ କେତେଜଣ ପାର୍ଟ ଟାଇମ୍ କାର୍ଯ୍ୟ କରୁଛନ୍ତି। ତେବେ ଖେଳାଳିଙ୍କ ପାଉଣା କାଟିବା ନେଇ ଫେଡେରେଶନ ତରଫରୁ କିଛି କୁହାଯାଇନାହିଁ। ତେବେ ଫେଡେରେଶନର ଏହି ନିଷ୍ପତ୍ତି ସାମୟିକ ବୋଲି ଜନ୍ସନ କହିଛନ୍ତି। ଫୁଟବଲ ଅଷ୍ଟ୍ରେଲିଆରେ ସର୍ବାଧିକ ଲୋକପ୍ରିୟ କ୍ରୀଡ଼ା ହୋଇ ନ ଥିଲେ ମଧ୍ୟ ୨୦ ଲକ୍ଷ ଲୋକେ ଫୁଟବଲ ଖେଳିଥାନ୍ତି।
୪୮୦ ଜଣ ଚୁକ୍ତିବଦ୍ଧ ଖେଳାଳିଙ୍କ ପାଉଣା ୫୦ ପ୍ରତିଶତ କାଟି ଦିଆଯିବ ବୋଲି ବିଶ୍ୱସ୍ତ ସୂତ୍ରରୁ ଜଣାଯାଇଛି। ଏମାନଙ୍କ ମଧ୍ୟରେ କେତେକ ଫୁଟବଲର ଗୋଟିଏ ସେସନରେ ୧ ମିଲିୟନ ଅଷ୍ଟ୍ରେଲିଆନ ଡଲାର ଅର୍ଥ ଉପାର୍ଜନ କରିଥାନ୍ତି। ରଗ୍ବୀ ଅଷ୍ଟ୍ରେଲିଆ ମଧ୍ୟ ଅନୁରୂପ ଭାବେ ଆର୍ଥତ୍କ ବିପର୍ଯ୍ୟୟର ସମ୍ମୁଖୀନ ହୋଇଛି।
