ବ୍ରହ୍ମପୁର ଅଫିସ,୧୨ା୩: ଗଞ୍ଜାମ ସାଙ୍ଗଠନିକ ଜିଲା ଭାଜପା ପକ୍ଷରୁ ବୁଧବାର ବ୍ରହ୍ମପୁରସ୍ଥ ଦକ୍ଷିଣାଞ୍ଚଳ ଆରଡିସିଙ୍କ ଅଫିସ ଆଗରେ ବିକ୍ଷୋଭ କରାଯାଇଥିଲା। ଜିଲାର ପ୍ରମୁଖ ସହର ରେଶମ ନଗରୀ ପ୍ରତି ସରକାରୀ ଅବହେଳାର ପ୍ରତିବାଦ ଏବଂ କଟକ ଶ୍ରୀରାମଚନ୍ଦ୍ର ଭଞ୍ଜ ମେଡିକାଲ କଲେଜ ଓ ହସ୍ପିଟାଲକୁ ବିଶ୍ୱସ୍ତରୀୟ ଚିକିତ୍ସାଳୟରେ ପରିଣତ କରିବା ପାଇଁ ମୁଖ୍ୟମନ୍ତ୍ରୀ ବହୁ କୋଟି ଟଙ୍କା ବିନିଯୋଗରେ ଯୋଜନା କରିଛନ୍ତି। ତେବେ ଦକ୍ଷିଣ ଓଡ଼ିଶାର ଏକମାତ୍ର ରେଫରାଲ ହସ୍ପିଟାଲ ଏମ୍କେସିଜି ପ୍ରତି ଅଣଦେଖା କରିଥିବାର ପ୍ରତିବାଦ ଏବଂ କଟକ ଭଳି ବ୍ରହ୍ମପୁର ବଡ଼ ଡ଼ାକ୍ତରଖାନାର ବହୁମୁଖୀ ବିକାଶ ନେଇ ଏହି ଆନ୍ଦୋଳନ ସୂତ୍ରପାତ ହୋଇଥିଲା।
ଭାଜପାର ବରିଷ୍ଠ ନେତା ତଥା ପୂର୍ବତନ ଜିଲା ସଭାପତି କାହ୍ନୁ ଚରଣ ପତିଙ୍କ ନେତୃତ୍ୱରେ ଶତାଧିକ ଦଳୀୟ କର୍ମୀ ଆରଡିସିଙ୍କ ଅଫିସ ଆଗରେ ଏକାଠି ହୋଇଥିଲେ। ବିଭିନ୍ନ କ୍ଷେତ୍ରରେ ଗଞ୍ଜାମ ଜିଲା ପ୍ରତି ସରକାରୀ ଅବହେଳା ବିରୋଧରେ ନାରାବାଜି କରିଥିଲେ। ବ୍ରହ୍ମପୁର ମହାନଗର ନିଗମ (ବିଏମ୍ସି)ର ପ୍ରସ୍ତାବିତ ଲଗାମଛଡ଼ା ହୋଲଡିଂ ଟିକସ ବୃଦ୍ଧି କାର୍ଯ୍ୟକାରୀ ନ କରିବା ଏବଂ ଷ୍ଟାଣ୍ଡପୋଷ୍ଟ ପାଇପ ପାଣି ପାଇଁ ନିଗମ ହୋଲଡିଂ ଟିକସ ସହ ଆଦାୟ କରୁଥିବା ଜଳକର ବନ୍ଦ ପାଇଁ ଦାବି କରାଯାଇଥିଲା। ମୁଖ୍ୟମନ୍ତ୍ରୀଙ୍କ ଉଦ୍ଦେଶ୍ୟରେ ବିଭିନ୍ନ ଦାବି ସମ୍ବଳିତ ସ୍ମାରକପତ୍ର ଆରଡିସିଙ୍କୁ ପ୍ରଦାନ କରାଯାଇଥିଲା।
ରାଜ୍ୟର ଅନ୍ୟ ମହାନଗର ନିଗମ ଅପେକ୍ଷା ବ୍ରହ୍ମପୁରରେ କେବଳ ହୋଲଡିଂ ନୁହେଁ ସମସ୍ତ ଟିକସ ମାତ୍ରାଧିକ ବୃଦ୍ଧି ପାଇଥିବା ଦର୍ଶାଯାଇଛି। ଜମି କିଣା ବିକାରେ ମଧ୍ୟ ବେଞ୍ଚ ମାର୍କ ଭାଲ୍ୟୁଏସନ ବଢ଼ାଇ ଲୋକଙ୍କୁ ଶୋଷଣ କରାଯାଉଛି। ସେହିପରି ନିର୍ବାଚନ ବେଳେ ବ୍ରହ୍ମପୁର ବିକାଶ ମୋର ଦାୟିତ୍ୱ ବୋଲି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଘୋଷଣା କରୁଛନ୍ତି। କିନ୍ତୁ ଭୋଟ ସରିବା ପରେ ପ୍ରତିଶ୍ରୁତି ଭୂଲି ମହାନଗରବାସୀଙ୍କୁ ପ୍ରତାରଣା କରୁଥିବା ଭାଜପା ସମାଲୋଚନା କରିଛି। ବିଏମ୍ସି ସଫେଇ ଟିକସ ବନ୍ଦ ପାଇଁ ମଧ୍ୟ ଦାବି କରାଯାଇଛି। ଉପରୋକ୍ତ ସମସ୍ୟାର ତୁରନ୍ତ ସମାଧାନ କରା ନ ଗଲେ ଆନ୍ଦୋଳନ ଚେତାବନୀ ଦିଆଯାଇଥିଲା।
ବିକ୍ଷୋଭ ସମାବେଶରେ ଜିଲା ସଂଗଠନ କାର୍ଯ୍ୟକର୍ତ୍ତା ସୁନୀଲ କୁମାର ସାହୁ, ଗୋପୀନାଥ ପଣ୍ଡା, ପ୍ରଭାତ ଷଡ଼ଙ୍ଗୀ, ରାଜେଶ ସାହୁ, ଶରତ ସାହୁ, ପ୍ରଶାନ୍ତ କର, ଜିଲା ପରିଷଦ ସଭ୍ୟ ଏଲ. ମୋହନ ଦାସଙ୍କ ସମେତ ରାମ କୁମାର ପାତ୍ର, ମହିଳା ମୋର୍ଚ୍ଚା ନେତ୍ରୀ ଏସ୍. ରାଣୀ, ସୁବାସିନୀ ପଟ୍ଟନାୟକ, ନମିତାରାଣୀ ପଣ୍ଡା, ସୁନିଲ ପାତ୍ର, ସିଦ୍ଧାନ୍ତ ଗଂଗଦେବ, ଶିବ ଶଙ୍କର ନାୟକ ଓ ମଦନ ପାତ୍ର ପ୍ରମୁଖ ସାମିଲ ହୋଇଥିଲେ।
