ବିଶ୍ୱର ଅଧିକାଂଶ ସ୍ଥାନରେ ସୂର୍ଯ୍ୟକିରଣ ପଡ଼ିଥାଏ। ସୂର୍ଯ୍ୟ ହେଉଛନ୍ତି ଶକ୍ତିର ଉତ୍ସ। ଏଥିରୁ ଆଲୋକ ମିଳିଥାଏ। ମାତ୍ର ଏମିତି ଏକ ସହର ଅଛି, ଯେଉଁଠି ଆଦୌ ସୂର୍ଯ୍ୟ କିରଣ ପଡ଼ି ନ ଥାଏ। ଆଶ୍ଚର୍ଯ୍ୟ ଲାଗୁଥିଲେ ମଧ୍ୟ ସତ। ଏପରି ଏକ ସ୍ଥାନ ହେଉଛି ନର୍ଓ୍ବେର ଟ୍ରୋମ୍ସୋ ସହର। ଏହା ଆର୍କଟିକ୍ ସର୍କଲର ଉତ୍ତରରେ ରହିଛି। ଯେଉଁଠାରେ ପ୍ରତିବର୍ଷ ନଭେମ୍ବରରୁ ଜାନୁୟାରୀ ପର୍ଯ୍ୟନ୍ତ ସୂର୍ଯ୍ୟ ଆଦୌ ଦେଖାଯାନ୍ତି ନାହିଁ। କାହିଁ କେଉଁକାଳରୁ ଏଠାକାର ଲୋକେ ଏପରି ଅନ୍ଧାର ସ୍ଥାନରେ ବସବାସ କରିଆସୁଥିଲେ। ମାତ୍ର ବୈଜ୍ଞାନିକମାନେ ଏବେ ଏହି ସମସ୍ୟା ଦୂର କରିଛନ୍ତି। ଏଠାରେ ବୈଷୟିକ ବୈଜ୍ଞାନିକମାନେ ସୂର୍ଯ୍ୟ ଦର୍ପଣ ପ୍ରୟୋଗ କରି ଏହି ସମସ୍ୟାର ସମାଧାନ କରିବାରେ ସଫଳ ହୋଇଛନ୍ତି। ସୂର୍ଯ୍ୟକିରଣ ଆସୁଥିବା ଦିଗରେ ପର୍ବତ ଉପରେ ଏକ ବିରାଟ ସୂର୍ଯ୍ୟ ଦର୍ପଣ ରଖାଯାଇଛି। ଯାହା ସୂର୍ଯ୍ୟ କିରଣକୁ ପ୍ରତିଫଳିତ କରି ପାହାଡ଼ର ପାଦଦେଶକୁ ଆଲୋକିତ କରୁଛି। ଏଠାରେ ଥିବା ଇଞ୍ଜିନିୟର ସାମ୍ ଆଇଡି ଏ ସମ୍ପର୍କରେ ଧାରଣା ଦେଇଥିଲେ। ଯାହା ମାର୍ଟିନ୍ ଆଣ୍ଡରସନ୍ଙ୍କ ଦ୍ୱାରା ସମ୍ପନ୍ନ ହୋଇଥିଲା। ମାର୍ଟିନ୍ ସ୍ଥାନୀୟ ଅଧିକାରୀଙ୍କ ସହଯୋଗରେ ୮ ଲକ୍ଷ ଡଲାର ମୂଲ୍ୟର ଦର୍ପଣ ଲଗାଇଛନ୍ତି। ଏହା ପୂର୍ବରୁ ଲୋକେ କେବୁଲ କାର୍ ମାଧ୍ୟମରେ ସୂର୍ଯ୍ୟକିରଣ ଦେଖିବାକୁ ଯାଉଥିଲେ। ପ୍ରାୟ ୫୩୮ ବର୍ଗ ଫୁଟ କ୍ଷେତ୍ରରେ ଏହି ଦର୍ପଣ ଲଗାଯାଇଛି। ଏହି ଦର୍ପଣ ସହରର ୨୧୫୦ ବର୍ଗଫୁଟ କ୍ଷେତ୍ରକୁ ଆଲୋକ ପ୍ରଦାନ କରୁଛି।
