ଆଇଟିଡିଏ କାର୍ଯ୍ୟାଳୟରେ ତାଲା ପକା ଘଟଣା: ଏମ୍‌ପି ଓ ବିଧାୟକଙ୍କ ନାଁରେ ମାମଲା
7:22 amJanuary 10, 2020 / 21

ରାଇରଙ୍ଗପୁର,୧୦ା୧(ଡି.ଏନ୍‌.ଏ.): ମୟୂରଭଞ୍ଜ ଜିଲା ରାଇରଙ୍ଗପୁର ଆଇଟିଡିଏ କାର୍ଯ୍ୟାଳୟର ପ୍ରକଳ୍ପ ପ୍ରଶାସକ (ପିଏ)ଙ୍କ କାର୍ଯ୍ୟକଳାପରେ ଅସନ୍ତୋଷ ପ୍ରକାଶ କରି ମୟୂରଭଞ୍ଜ ଏମ୍‌ପି ଇଂ.ବିଶ୍ୱେଶ୍ୱର ଟୁଡୁ ଏବଂ ରାଇରଙ୍ଗପୁର ବିଧାୟକ ନବ ଚରଣ ମାଝୀଙ୍କ ଉପସ୍ଥିତିରେ ଗୁରୁବାର ସମର୍ଥକଗଣ କାର୍ଯ୍ୟାଳୟ ମୁଖ୍ୟ ଫାଟକରେ ତାଲା ପକାଇ ଥିଲେ। ଏନେଇ ଆଇଟିଡିଏ ପିଏ ଅନନ୍ତ ନାରାୟଣ ସିଂ ଲାଗୁରୀଙ୍କ ଅଭିଯୋଗ କ୍ରମେ ଟାଉନଥାନା ପୋଲିସ ଏମ୍‌ପି ଓ ବିଧାୟକଙ୍କ ସହ ତାଙ୍କର କେତେକ ସମର୍ଥକଙ୍କ ନାମରେ ଏକ ମାମଲା(ନଂ.୮/୨୦) ରୁଜୁ କରି ଘଟଣାର ତଦନ୍ତ ଜାରି ରଖିଛି।
ସୂଚନା ଅନୁଯାୟୀ, ଏମ୍‌ପି ଟୁଡୁ ଏବଂ ମାଝୀଙ୍କ ନେତୃତ୍ୱରେ କେତେକ ଜିଲାପରିଷଦ ସଦସ୍ୟ ଓ ଯୁବକର୍ମୀ ଆଇଟିଡିଏ କାର୍ଯ୍ୟାଳୟ ପିଏଙ୍କ ଅଫିସ ଚାମ୍ବରକୁ ଯାଇ ରାଇରଙ୍ଗପୁର ସବ୍‌ଡିଭିଜନ୍‌ର ବିଭିନ୍ନ ଉନ୍ନୟନ କାର୍ଯ୍ୟ ଉପରେ ଆଲୋଚନା କରିଥିଲେ। ୨୦୧୮-୧୯ ଆର୍ଥିକ ବର୍ଷରେ ରାଇରଙ୍ଗପୁର ସବ୍‌ଡିଭିଜନର ବିଭିନ୍ନ ବ୍ଲକ୍‌ ଅଞ୍ଚଳରେ ଉନ୍ନୟନ କାର୍ଯ୍ୟ ସମ୍ପର୍କରେ ତଥ୍ୟ ମାଗିବା ବେଳେ ସେ ଅସହଯୋଗ କରି ବିଶୋଇ ଅଞ୍ଚଳକୁ ଯିବାକୁ ବାହାରିଥିଲେ। ଏଥିରେ ଏମପି ଟୁଡୁ ଓ ତାଙ୍କ ସମର୍ଥକ କ୍ଷୋଭ ପ୍ରକାଶ କରିଥିଲେ। ଏହା ପରେ ଉପସ୍ଥିତ ସମସ୍ତ କର୍ମଚାରୀଙ୍କୁ କାର୍ଯ୍ୟାଳୟରୁ ବାହାର କରି ତାଲା ପକାଇଥିଲେ। ଖବର ପାଇ ରାଇରଙ୍ଗପୁର ସର୍କଲ ଏସ୍‌ଡିପିଓ ସ୍ନେହାଶିଷ ସାହୁ ଏବଂ ସ୍ଥାନୀୟ ଟାଉନ୍‌ଥାନା ଅଧିକାରୀ ରେଣୁବାଳା ସାହୁ ସଦଳବଳ ଘଟଣାସ୍ଥଳରେ ପହଞ୍ଚି ତଦନ୍ତ କରିଥିଲେ। ପରେ ରାଇରଙ୍ଗପୁର ଉପଜିଲାପାଳ ଧର୍ମାନନ୍ଦ ବେହେରା, ଆଇଟିଡିଏ ପିଏ ସିଂ ଲାଗୁରୀଙ୍କ ଉପସ୍ଥିତିରେ ପୋଲିସ ଆଇଟିଡିଏ କାର୍ଯ୍ୟାଳୟ ଗ୍ରିଲ୍‌ ଭାଙ୍ଗିବା ପରେ ଲାଗୁରୀ ଓ ଅନ୍ୟ କର୍ମଚାରୀ କାର୍ଯ୍ୟାଳୟକୁ ପଶିଥିଲେ। ଏନେଇ ପୋଲିସ ମାମଲା ରୁଜୁ କରିବା ସମ୍ପର୍କରେ ବିଧାୟକ ମାଝୀଙ୍କୁ ପଚାରିବାରୁ ସେ ତାଲା ପକାଇବା ଘଟଣାକୁ ସ୍ବୀକାର କରିଥିଲେ ମଧ୍ୟ ତାଙ୍କ ନାମରେ ମିଥ୍ୟା ମାମଲା ରୁଜୁ କରାଯାଇଥିବା କହିଛନ୍ତି।