ବରଗଡ଼ ଅଫିସ୍,୩୧।୩-କରୋନା ପ୍ରତିହତ ପାଇଁ ଲକ୍ ଡାଉନ୍ କଟକଣା ଲାଗୁ ହେବା ପରେ ବିଭିନ୍ନ ସ୍ଥାନରେ ଲୋକେ ଫସି ରହିଛନ୍ତି । ତେବେ ଏଭଳି ସ୍ଥିତିରେ ମୁଖ୍ୟତଃ ଗରିବ, ଅସହାୟ ଲୋକେ ଅଡ଼ୁଆରେ ପଡ଼ିଛନ୍ତି । ସେମାନଙ୍କୁ ଭଲଭାବେ ମୁଠାଏ ଖାଇବାକୁ ମିଳୁ ନାହିଁ । ବରଗଡ଼ ସହରର ଆଶାକିରଣ ନିକଟ ଆଇସ୍ ଫ୍ୟାକ୍ଟ୍ରି ପାଖରେ ୫ଜଣ ଏବଂ ସମ୍ବଲପୁର ଜିଲା ଗୋଲଗୁଣ୍ଡା ନିକଟ ଇଟା ଫ୍ୟାକ୍ଟ୍ରି ଓ ସ୍କ୍ରାପ୍ ଦୋକାନରେ ୩୬ଜଣ ଶ୍ରମିକ ନିଜ ପିଲାଛୁଆଙ୍କ ସହିତ ଫସି ରହିଥିବା ସୂଚନା ମିଳିଛି । ଆଶାକିରଣ ପାଖରେ ଫସି ରହିଥିବା ଶ୍ରମିକମାନେ ଝାରବନ୍ଧ ବ୍ଲକ ଜଟେଶିରା ଅଞ୍ଚଳର ହୋଇଥିବାବେଳେ ଗୋଲଗୁଣ୍ଡାରେ ଫସିଥିବା ଶ୍ରମିକମାନେ ସୁନ୍ଦରଗଡ଼ ଓ ଉତ୍ତରପ୍ରଦେଶ ଅଞ୍ଚଳର ବୋଲି ଜଣାପଡ଼ିଛି । ଏହି ସୂଚନା ପାଇବା ପରେ ବରଗଡ଼ର ସାମାଜିକ କର୍ମୀ ରଞ୍ଜିତା ପ୍ରିୟଦର୍ଶିନୀ ସେମାନଙ୍କୁ ଖାଦ୍ୟ ଯୋଗାଣ ସହିତ ଅନ୍ୟ ବିହିତ ପଦକ୍ଷେପ ନେବା ପାଇଁ ଯଥାକ୍ରମେ ବରଗଡ଼ ଜିଲାପାଳ ଜ୍ୟୋତିରଞ୍ଜନ ପ୍ରଧାନ ଏବଂ ଆଇଜି ଅମିତାଭ ଠାକୁରଙ୍କୁ ଜଣାଇଥିବା ସୂଚନା ଦେଇଛନ୍ତି।
