ବିଶୋଇ,୨୩ା୫(ଡି.ଏନ୍.ଏ.)-କରୋନା ଯୋଗୁ ବର୍ତ୍ତମାନ ସାରା ଦେଶରେ ଲକ୍ଡାଉନ ପରିସ୍ଥିତି ଜାରି ହୋଇଥିବାବେଳେ ଏଥିରେ ନିଜର ପରିବାର ପୋଷଣ ନିମନ୍ତେ ବାହାର ରାଜ୍ୟକୁ ଯାଇଥିବା ପ୍ରବାସୀ ଓଡିଆଙ୍କୁ ବହୁ ଅସୁବିଧାର ସମ୍ମୁଖୀନ ହେବାକୁ ପଡୁଛି। ଲକ୍ଡାଉନ କାରଣରୁ ବାହାର ରାଜ୍ୟର ଅଧିକାଂଶ ଘରୋଇ କମ୍ପାନୀ ବନ୍ଦ ହେବା ଯୋଗୁ ପ୍ରବାସୀମାନେ କାମ ନ ପାଇ ଭୋକ ଉପାସରେ ଦିନ କାଟୁଛନ୍ତି। କାମକରି ପୂର୍ବରୁ ସଞ୍ଚୟ କରି ରଖିଥିବା କିଛି ଧନ ଖର୍ଚ୍ଚ କରି ଏବେ ଏହି ପ୍ରବାସୀମାନେ ଘରମୁହାଁ ହୋଇଛନ୍ତି। ସେମାନଙ୍କ ମଧ୍ୟରୁ କେତେକ ପ୍ରବାସୀ ଚାଲି ଚାଲି ଆସିବା ସହିତ କେତେକ ଟ୍ରେନ ଓ ଅନ୍ୟ କେତେକ ପ୍ରବାସୀ ନିଜ ଖର୍ଚ୍ଚରେ ବସ ଭଡ଼ା କରି ନିଜ ଘରକୁ ଫେରୁଛନ୍ତି। ତେବେ ଆର୍ଥିକ ଅନାଟନ କାରଣରୁ କେତେକ ପ୍ରବାସୀଙ୍କ ନିମନ୍ତେ ସାଇକେଲ ହିଁ ଏକ ମାତ୍ର ଭରସା ପାଲଟିଛି। ଏହିପରି ଏକ ଘଟଣା ମୟୂରଭଞ୍ଜ ଜିଲା ବିଶୋଇ ଅଞ୍ଚଳରେ ଘଟିଛି। ଏହି ବ୍ଲକର ଲୁହାକାନି ପଞ୍ଚାୟତର ଢିପୁସାହି, ଡୁମୁରିଆ ଓ ଭୋଳବେଡା ଗ୍ରାମର ଆଦିବାସୀ ସମ୍ପ୍ରଦାୟର ଜଣେ ଯୁବତୀ ଓ ୭ ଜଣ ଯୁବକଙ୍କୁ ମିଶାଇ ସମୁଦାୟ ୮ ଜଣ ଚେନ୍ନାଇର ବ୍ରାଣ୍ଡ ଷ୍ଟିଲ ନାମକ ଏକ ଘରୋଇ କମ୍ପାନୀରେ କାମ କରୁଥିଲେ। ତେବେ ଲକଡାଉନ ଯୋଗୁ କମ୍ପାନୀ ବନ୍ଦ ହେବା ଫଳରେ ସେମାନେ ସଞ୍ଚୟ ରଖିଥିବା ଟଙ୍କାରେ କିଛିଦିନ ଚଳିବା ପରେ ଅନ୍ୟ କିଛି ଉପାୟ ନ ପାଇ ପାଖରେ ବଳକା ଥିବା ଟଙ୍କାରେ ସାଇକେଲ କିଣି ଘରମୁହାଁ ହୋଇଥିଲେ। ଏହି ୮ ଜଣ ଗତ ୧୩ ତାରିଖରେ ଚେନ୍ନାଇରୁ ବାହାରି ଶୁକ୍ରବାର ସକାଳେ ନିଜ ଅଞ୍ଚଳରେ ପହଞ୍ଚି ଥିଲେ। ସେମାନେ ୧୦ ଦିନ ମଧ୍ୟରେ ୧୬୦୦ କି.ମି ଅତିକ୍ରମ କରିଥିଲେ। ଭିଟାମାଟିରେ ପହଞ୍ଚି ପ୍ରଥମେ ବିଶୋଇ ବ୍ଲକର ଖଡ଼ମବେଡାଠାରେ ଥିବା ଆଇସୋଲେଶନ ସେଣ୍ଟରରେ ନିଜ ନାମ ପଞ୍ଜୀକରଣ କରିଥିଲେ। ପରେ ପଞ୍ଚାୟତ ପକ୍ଷରୁ ସେମାନଙ୍କୁ ଲୁହାକାନି ପଞ୍ଚାୟତରେ ଥିବା ସଙ୍ଗରୋଧ କେନ୍ଦ୍ରରେ ରଖାଯାଇଥିଲା।
