ଅନୁଗୋଳ ଅଫିସ, ୧୮।୪ – ଶୁକ୍ରବାର ଥିଲା ପ୍ରବାଦ ପୁରୁଷ ବିଜୁବାବୁଙ୍କ ଶ୍ରାଦ୍ଧ ଦିବସ। କରୋନା କଟକଣା ପାଇଁ ଅନୁଗୋଳ ବିଜେଡି ପକ୍ଷରୁ ଏହାକୁ ପାଳନ କରାଯାଇ ନାହିଁ। ହେଲେ ଏହି ଅବସରରେ ଦଳ ପକ୍ଷରୁ ଏକ ରକ୍ତଦାନ ଶିବିରର ଆୟୋଜନ କରାଯାଇଥିଲେ ହେଁ ଏଥିରେ ସାମାଜିକ ଦୂରତ୍ୱକୁ ଗୁରୁତ୍ୱ ଦିଆଯାଇ ନ ଥିବା ସାଧାରଣରେ ଅଭିଯୋଗ ହେଉଛି। ବିଶେଷକରି ଅନୁଗୋଳ ବିଧାୟକ ତଥା ବିଧାନସଭାର ଉପବାଚସ୍ପତି ରଜନୀକାନ୍ତ ସିଂହଙ୍କ ସହ ଦଳର ବହୁ ବରିଷ୍ଠ କର୍ମୀ ଉପସ୍ଥିତ ଥିଲେ ମଧ୍ୟ ସାମାଜିକ ଦୂରତ୍ୱ ରକ୍ଷା ନିୟମର ଏପରି ଉଲ୍ଲଂଘନକୁ ସହରବାସୀ ନାପସନ୍ଦ କରିଛନ୍ତି।
ଶିବିରରେ ଉପସ୍ଥିତ ବିଧାୟକ ସିଂହ ମୁହଁରେ ମାସ୍କ ବାନ୍ଧିଥିଲେ। ତାଙ୍କ ପରି ଅନ୍ୟ କେତେଜଣ ମଧ୍ୟ ମାସ୍କ ପରିଧାନ ନିର୍ଦ୍ଦେଶର ପାଳନ କରିଥିଲେ। ହେଲେ ସାମାଜିକ ଦୂରତା ରକ୍ଷା ନିୟମ ନ ମାନି ଦଳୀୟ ନେତା, କର୍ମୀଙ୍କ ସହ ପାଖାପାଖି ଠିଆହେବା, ଫଟୋ ଉଠାଇବା ବିଧାୟକଙ୍କୁ ବିବାଦ ଘେରକୁ ଟାଣି ନେଇଛି। କରୋନା ସଂକ୍ରମଣରୁ ବର୍ତ୍ତିବା ପାଇଁ ବିଧାୟକ ଅନ୍ୟମାନଙ୍କୁ ସଚେତନ କରୁଥିବା ଓ କରୋନା ଯୋଦ୍ଧାଙ୍କୁ ସାବାସୀ ଦେଉଥିବା ବେଳେ ନିଜେ ସାମାଜିକ ଦୂରତା ରକ୍ଷା ନିୟମ ପାଳନ ନ କରିବା ସହରରେ ଚର୍ଚ୍ଚାର ବିଷୟ ହୋଇଛି। ତେବେ ଏ ନେଇ ବିଧାୟକ ସିଂହଙ୍କ ସହ ଯୋଗାଯୋଗ କରାଯିବାକୁ ଚେଷ୍ଟା କରାଯାଇଥିଲେ ମଧ୍ୟ ସେ ଫୋନ ରିସିଭ ନ କରିବାରୁ ତାଙ୍କ ମତାମତ ମିଳିପାରି ନାହିଁ।
