ଭୁବନେଶ୍ୱର,୨।୪(ବ୍ୟୁରୋ): ପୂର୍ବତଟ ରେଳପଥ ୨୦୧୯-୨୦ ଆର୍ଥିକ ବର୍ଷରେ ୨୦୦.୮୫ ମିଲିଅନ୍ ଟନ୍ ମାଲ୍ ପରିବହନ କରି ରେକର୍ଡ଼ କରିଛି। ପୂର୍ବ ଆର୍ଥିକବର୍ଷ ଅର୍ଥାତ୍ ୨୦୧୮-୧୯ରେ ପରିହବନ ହୋଇଥିବା ୧୯୧.୭୬ ମିଲିୟନ ଟନ୍ଠାରୁ ଏହା ୪.୭୩ ପ୍ରତିଶତ ଅଧିକ ରହିଛି। ସେହିଭଳି ୨୦୧୯-୨୦ବର୍ଷରେ ମାଲ୍ ପରିବହନ କ୍ଷେତ୍ରରେ ପୂର୍ବତଟ ରେଳପଥ ୨୦,୧୨୫ କୋଟି ଟଙ୍କା ଆୟ କରିଛି। ପୂର୍ବ ଆର୍ଥିକବର୍ଷରେ ହୋଇଥିବା ୧୮,୧୮୦ କୋଟିଠାରୁ ଏହା ୧୧ ପ୍ରତିଶତ ଅଧିକ ବୋଲି କୁହାଯାଇଛି। ପ୍ରଳୟଙ୍କରୀ ବାତ୍ୟା ‘ଫନୀ’ ସମୟରେ ବିପୁଳ କ୍ଷୟକ୍ଷତି, ମାଲ୍ ପରିବହନ ଓ ଟ୍ରେନ୍ ପରିଚାଳନାରେ ବିଭିନ୍ନ ବାଧାବିଘ୍ନ ସତ୍ତ୍ୱେ ପୂର୍ବତଟ ରେଳପଥ ଏହି ମାଇଲ୍ଷ୍ଟୋନ୍ ଛିଡ଼ା କରିପାରିଛି। ବାତ୍ୟା ପରେ ତୁରନ୍ତ ରେଳ ସେବାକୁ ସ୍ବାଭାବିକ କରାଯାଇଥିଲେ ମଧ୍ୟ ଏହି ରେଳପଥକୁ ୬୦୦ କୋଟି କ୍ଷତି ସହିବାକୁ ପଡ଼ିଥିଲା। ମାଲ୍ ପରିବହନକାରୀ ଅଞ୍ଚଳରେ ନକ୍ସଲ କାର୍ଯ୍ୟକଳାପ, ରେଳ ଟ୍ରାକ୍ ଉପରେ ମାଟି, ପଥର ଅତଡ଼ା ଖସିବା ଓ ଶ୍ରମିକ ଆନ୍ଦୋଳନ ଭଳି ବହୁ ବାଧା ଉପୁଜିଥିଲା। ମାତ୍ର ପରିବହନ ଉପରେ ଗୁରୁତ୍ୱ, ନୂତନ ପଦକ୍ଷେପ ଗ୍ରହଣ ଓ ରେଳ ମନ୍ତ୍ରଣାଳୟର ଗୁରୁତ୍ୱପୂର୍ଣ୍ଣ ପଦକ୍ଷେପ ଦ୍ୱାରା ମାଲ୍ ପରିବହନରେ ଏପରି ରେକର୍ଡ ହୋଇଥିବା ପୂର୍ବତଟ ରେଳପଥ ପକ୍ଷରୁ କୁହାଯାଇଛି।
ଅନ୍ୟପକ୍ଷରେ ୨୦୧୯-୨୦ ଆର୍ଥିକ ବର୍ଷରେ ଦକ୍ଷିଣ-ପୂର୍ବ ରେଳପଥ ୧୭୧.୧୧ ମିଲିଅନ ଟନ୍, ଦକ୍ଷିଣ-ପୂର୍ବ-କେନ୍ଦ୍ରୀୟ ରେଳପଥ ୧୬୯ ମିଲିଅନ ଟନ ଓ ପୂର୍ବ-କେନ୍ଦ୍ରୀୟ ରେଳପଥ ୧୪୮ ମିଲିଅନ୍ ଟନ୍ ମାଲ୍ ପରିବହନ କରିଛି। ସେହିଭଳି ଏହି କ୍ଷେତ୍ରରେ ଦକ୍ଷିଣ ପୂର୍ବ ରେଳପଥ ୧୪,୪୫୯.୫ କୋଟି, ଦକ୍ଷିଣ-ପୂର୍ବ-କେନ୍ଦ୍ରୀୟ ରେଳପଥ ୧୯,୮୩୫ କୋଟିି ଏବଂ ପୂର୍ବ-କେନ୍ଦ୍ରୀୟ ରେଳପଥ ୧୫,୧୧୭.୮ କୋଟି ଟଙ୍କା ଆୟ କରିଛି।
ତେବେ ମାଲ ପରିବହନରେ ଏହି ସଫଳତା ନିମନ୍ତେ ୩ ରେଳ ମଣ୍ଡଳର କର୍ମଚାରୀଙ୍କୁ ସମସ୍ତ ଶ୍ରେୟ ପ୍ରଦାନ କରିଛି ପୂର୍ବତଟ ରେଳପଥ। ଏହାସହ ସମସ୍ତ ସହଯୋଗୀ ଷ୍ଟେକ୍ ହୋଲ୍ଡର୍ ତଥା କୋଲିଆରି, ବନ୍ଦର, ଇସ୍ପାତ କାରଖାନା, ସିମେଣ୍ଟ. ଆଲୁମିନା ପ୍ଲାଣ୍ଟ୍, ପେଟ୍ରୋଲିୟମ୍ କମ୍ପାନୀ ଏବଂ ଭାରତର ଖାଦ୍ୟ ନିଗମମାନଙ୍କୁ ସହଯୋଗ ନିମନ୍ତେ କୃତଜ୍ଞତା ଜଣାଇଛି। ଓଡ଼ିଶା, ଆନ୍ଧ୍ରପ୍ରଦେଶ ଓ ଛତିଶଗଡ଼ ରାଜ୍ୟ ସରକାରଙ୍କ ନିରବଚ୍ଛିନ୍ନ ସହଯୋଗ ପାଇଁ ମଧ୍ୟ ଧନ୍ୟବାଦ ଦେଇଛି ପୂର୍ବତଟ ରେଳପଥ।
