ମାଟ୍ରିକ ପରୀକ୍ଷାରେ ୫୦%ରୁ କମ୍‌ ସଫଳତା
8:48 amJune 11, 2019June 11, 2020 / 21

ଅନୁଗୋଳ ଅଫିସ, ୧୧।୬ମାଧ୍ୟମିକ ଶିକ୍ଷା ପରିଷଦ (ବୋର୍ଡ) ପକ୍ଷରୁ ୨୦୧୯ରେ ଅନୁଷ୍ଠିତ ମାଟ୍ରିକ ପରୀକ୍ଷାରେ ୫୦ ପ୍ରତିଶତରୁ କମ୍‌ ସଫଳତା ପାଇଥିବା ବିଦ୍ୟାଳୟଗୁଡିକୁ ସ୍କୁଲ ଓ ଗଣଶିକ୍ଷା ବିଭାଗ ପକ୍ଷରୁ କାରଣ ଦର୍ଶାଅ ନୋଟିସ୍‌ ଜାରି କରାଯାଇଛି। ଏହି କ୍ରମରେ ଅନୁଗୋଳରେ ୩୧ଟି ବିଦ୍ୟାଳୟକୁ ନୋଟିସ ପଠାଯାଇଛି। ଆସନ୍ତା ୧୭ ତାରିଖ ମଧ୍ୟରେ ଜବାବ ରଖିବାକୁ ବିଦ୍ୟାଳୟଗୁଡ଼ିକର ପ୍ରଧାନ ଶିକ୍ଷୟିତ୍ରୀ ଓ ଶିକ୍ଷକମାନଙ୍କୁ ନିର୍ଦ୍ଦେଶ ଦିଆଯାଇଛି। ନୋଟିସ୍‌ର ଜବାବ ନ ରଖିଲେ ବିଦ୍ୟାଳୟଗୁଡ଼ିକରେ ନୂତନ ନାମ ଲେଖା ପ୍ରକ୍ରିୟା ହୋଇପାରିବ ନାହିଁ ବୋଲି ଜିଲା ଶିକ୍ଷା ଅଧିକାରୀ ସଚ୍ଚିଦାନନ୍ଦ ବେହେରା ସୂଚନା ଦେଇଛନ୍ତି।
ଅନୁଗୋଳ ଜିଲାରେ ମୋଟ ୨୪୬ଟି ବିଦ୍ୟାଳୟର ଛାତ୍ରୀଛାତ୍ର ବୋର୍ଡ ପରୀକ୍ଷା ଦେଇଥିଲେ। ସେଗୁଡ଼ିକ ମଧ୍ୟରୁ ଜିଲାର ୫ଟି ବିଦ୍ୟାଳୟ ଶତପ୍ରତିଶତ ସଫତଳା ପାଇ ପୁରସ୍କୃତ ହୋଇଛି। ଜିଲାର ୩୧ଟି ବିଦ୍ୟାଳୟ ୫୦ ପ୍ରତିଶତରୁ କମ ଫଳାଫଳ କରିଥିବା ଜଣାପଡିଛି। ଅନୁଗୋଳ ବ୍ଲକର ୬, ଆଠମଲ୍ଲିକର ୭, କିଶୋରନଗରର ୩, ଛେଣ୍ଡିପଦାର ୬, ବଅଁରପାଳର ୩, ତାଳଚେରର ୫ ଓ ପାଲଲହଡ଼ାର ଗୋଟିଏ ବିଦ୍ୟାଳୟ ଏଥିରେ ସାମିଲ ହୋଇଛନ୍ତି। ଏହି ବିଦ୍ୟାଳୟଗୁଡିକୁ ଜିଲା ଶିକ୍ଷା ଅଧିକାରୀ କାର୍ଯ୍ୟାଳୟ ପକ୍ଷରୁ ଚିଠି ନଂ ୬୦୧୬ରେ ସୋମବାର ଚିଠି କରାଯାଇଥିବା ସୂଚନା ମିଳିଛି। ଛାତ୍ରୀଛାତ୍ରମାନଙ୍କୁ କାହିଁକି ପରୀକ୍ଷାରେ କମ୍‌ ସଫଳତା ମିଳିଲା ଏହାର ଉତ୍ତର ଦେବାପାଇଁ ଚିଠିରେ କୁହାଯାଇଛି। ଶିକ୍ଷକମାନେ ଠିକ ଭାବେ ପାଠ ପଢ଼ାଉଥିଲେ କି ନାହିଁ ତାହାର ମଧ୍ୟ କାରଣ ଖୋଜା ଚାଲିଛି। ଏପରି କି ପ୍ରତି ସ୍କୁଲ ସେମାନଙ୍କର ଉତ୍ତର ନ୍ୟାୟିକ ଓ ସନ୍ତୋଷଜନକ ଭାବେ ଦେବାକୁ ଚିଠିରେ ଉଲ୍ଲେଖ ରହିଛି। ନିର୍ଦ୍ଧାରିତ ତାରିଖ ମଧ୍ୟରେ ଉତ୍ତର ନ ରଖିଲେ ବିଦ୍ୟାଳୟଗୁଡ଼ିକରେ ନାମଲେଖା ବନ୍ଦ କରାଯିବା ସହ ସମସ୍ତ ଶିକ୍ଷୟିତ୍ରୀ ଓ ଶିକ୍ଷକଙ୍କ ଦରମା ମଧ୍ୟ ବନ୍ଦ କରାଯିବ ବୋଲି ଚିଠିରେ ଉଲ୍ଲେଖ ରହିଛି।