ନୂଆଦିଲ୍ଲୀ,୨୬ା୫(ବ୍ୟୁରୋ): ଏୟାର ଇଣ୍ଡିଆ ବିମାନର ଉଡ଼ାଣ ସମୟରେ ୩ଟିକିଆ ସିଟ୍ର ମଝି ସିଟ୍ରେ ବସି ଯାତ୍ରୀମାନେ ଯାଇପାରିବେ। ଏହି ଅନୁମତି କେବଳ ଆସନ୍ତା ୧୦ଦିନ ପାଇଁ ବୋଲି ସୁପ୍ରିମ୍କୋର୍ଟ ସୋମବାର ନିର୍ଦ୍ଦେଶ ଦେଇଛନ୍ତି। ଜୁନ୍ ୬ତାରିଖଠାରୁ ସାମାଜିକ ଦୂରତ୍ୱ ବଜାୟ ରଖିବା ଉଦ୍ଦେଶ୍ୟରେ ମଝି ସିଟ୍କୁ ଖାଲି ରଖାଯିବ। ଏଥିସହିତ ବିମାନ କମ୍ପାନୀ ପ୍ରୀତି ଛାଡ଼ି ଯାତ୍ରୀଙ୍କ ସ୍ବାସ୍ଥ୍ୟ ପ୍ରତି ଅଧିକ ଯତ୍ନବାନ ହେବାକୁ ସର୍ବୋଚ୍ଚ ଅଦାଲତ କେନ୍ଦ୍ର ସରକାରଙ୍କୁ କହିଛନ୍ତି। ଏପରି କି ବେସାମରିକ ବିମାନ ଚଳାଚଳ ମହାନିର୍ଦ୍ଦେଶାଳୟ(ଡିଜିସିଏ)ର ନିୟମାବଳୀ ବିରୋଧରେ ହୋଇଥିବା ଆବେଦନକୁ ତୁରନ୍ତ ଫଇସଲା କରିବାକୁ ସୁପ୍ରମକୋର୍ଟ ବମ୍ବେ ହାଇକୋର୍ଟଙ୍କୁ କହିଛନ୍ତି। ବମ୍ବେ ହାଇକୋର୍ଟଙ୍କ ନିର୍ଦ୍ଦେଶ ବିରୋଧରେ କେନ୍ଦ୍ର ସରକାର ଏବଂ ଏୟାର ଇଣ୍ଡିଆ ବିମାନ କର୍ତ୍ତୃପକ୍ଷଙ୍କ ପକ୍ଷରୁ ଆଗତ ଏକ ଆବେଦନର ଭିଡିଓ କନ୍ଫରେନ୍ସ ଜରିଆରେ ସୋମବାର ଶୁଣାଣି କରି ପ୍ରଧାନବିଚାରପତି ଏସ୍.ଏ. ବୋବ୍ଡେ, ବିଚାରପତି ଏ.ଏସ୍. ବୋପାନ୍ନା ଏବଂ ହୃଷୀକେଶ ରୟଙ୍କୁ ନେଇ ଗଠିତ ଖଣ୍ଡପୀଠ ଏହି ନିର୍ଦ୍ଦେଶ ଦେଇଛନ୍ତି।
ପ୍ରବାସୀ ଭାରତୀୟଙ୍କୁ ସ୍ବଦେଶ ଆଣୁଥିବାବେଳେ ଏୟାର ଇଣ୍ଡିଆ ଏବଂ ଡିଜିସିଏ କୋଭିଡ୍ -୧୯ ନିର୍ଦ୍ଦେଶାବଳୀକୁ ଉଲ୍ଲଂଘନ କରୁଥିବାନେଇ ଏୟାର ଇଣ୍ଡିଆର ପାଇଲଟ ଦେବେନ କାନାନି ବମ୍ବେ ହାଇକୋର୍ଟରେ ଏକ ଆବେଦନ କରିଥିଲେ। ଉକ୍ତ ଆବେଦନକୁ ଆଧାରକରି ଗତ ୨୨ତାରିଖରେ ବମ୍ବେ ହାଇକୋର୍ଟ ଏୟାର ଇଣ୍ଡିଆ ଏବଂ ଡିଜିସିଏକୁ ନୋଟିସ ଜାରି କରିବା ସହ ଏନେଇ ସତ୍ୟପାଠ ଦାଖଲ କରିବାକୁ କହିଥିଲେ। ଉକ୍ତ ଆବେଦନର ଶୁଣାଣିକୁ ଆସନ୍ତା ୨ତାରିଖକୁ ଧାର୍ଯ୍ୟ ରଖିବା ସହ ମଝି ସିଟ୍ରେ ଯାତ୍ରୀ ଯାଇପାରିବେ ନାହିଁ ବୋଲି ହାଇକୋର୍ଟ କହିଥିଲେ। ଆବେଦନକାରୀ ପାଇଲଟ କାନାନି ଦର୍ଶାଇଥିଲେ ଯେ, କୋଭିଡ୍-୧୯ ସଂକ୍ରମଣକୁ ଦୃଷ୍ଟିରେ ରଖି ବିଦେଶରେ ଫସିଥିବା ଭାରତୀୟଙ୍କୁ ବିମାନରେ ସ୍ବଦେଶ ଫେରାଇ ଆଣିବାବେଳେ କେତେକ ସର୍ତ୍ତ ପାଳନ କରିବା ପାଇଁ କେନ୍ଦ୍ରସରକାର ମାର୍ଚ୍ଚ ୨୩ରେ ଏକ ନିର୍ଦ୍ଦେଶନାମା ଜାରି କରିଥିଲେ। ସେତେବେଳେ ଯାତ୍ରୀଙ୍କ ମଧ୍ୟରେ ସାମାଜିକ ଦୂରତ୍ୱ ବଜାୟ ରଖିବାକୁ ବିମାନରେ ଥିବା ୩ଟିକିଆ ସିଟ୍ର ମଝି ସିଟ୍କୁ ଖାଲି ରଖିବାକୁ କୁହାଯାଇଥିଲା। ମାତ୍ର ଏହି ନିୟମକୁ ଏୟାର ଇଣ୍ଡିଆ କର୍ତ୍ତୃପକ୍ଷ ଉଲ୍ଲଂଘନ କରିଛନ୍ତି। ଏପରି କି ସାନ୍ଫ୍ରାନ୍ସିସ୍କୋରୁ ମୁମ୍ବାଇ ଆସୁଥିବା ବିମାନରେ ସବୁ ସିଟ୍ରେ ଯାତ୍ରୀମାନେ ବସିଥିବା କିଛି ଫଟୋ ମଧ୍ୟ ସେ କୋର୍ଟରେ ଦାଖଲ କରିଥିଲେ। ତେବେ ଏହି ଅଭିଯୋଗକୁ ଏୟାରଇଣ୍ଡିଆ ପକ୍ଷରୁ ଖଣ୍ଡନ କରାଯାଇଛି। ମାର୍ଚ୍ଚ ୨୩ରେ କେନ୍ଦ୍ରସରକାର ଜାରି କରିଥିବା ନିର୍ଦ୍ଦେଶନାମାକୁ ମେ’ ୨୨ରେ କୋହଳ କରାଯାଇଛି। ସରକାରଙ୍କ ନୂତନ ନିର୍ଦ୍ଦେଶନାମା ଅନୁଯାୟୀ ଦେଶ ମଧ୍ୟରେ ମେ’ ୨୫ରୁ ବିମାନ ସେବା ଯୋଗାଇବାକୁ ନିର୍ଦ୍ଦେଶ ହୋଇଥିବା ବିମାନ କର୍ତ୍ତୃପକ୍ଷ କହିଥିଲେ। ନୂଆ ନିର୍ଦ୍ଦେଶନାମା ଅନୁସାରେ ମଝି ସିଟ୍ ଖାଲି କରିବାକୁ କୁହାଯାଇ ନାହିଁ ବୋଲି ଏୟାର ଇଣ୍ଡିଆ ପକ୍ଷରୁ ହାଇକୋର୍ଟରେ କୁହାଯାଇଥିଲା।
