ଭୁବନ, ୮।୬(ଡି.ଏନ୍.ଏ.) ‘ସ୍ବଚ୍ଛ ଓଡ଼ିଶା, ସୁସ୍ଥ ଓଡ଼ିଶା’ ଗଠନ ଉଦ୍ଦେଶ୍ୟ ନେଇ ଶୁକ୍ରବାର ଭୁବନ ଏନ୍ଏସି ପକ୍ଷରୁ ସ୍ଥାନୀୟ ବାଜି ରାଉତ କଲ୍ୟାଣ ମଣ୍ଡପରେ ବର୍ଜ୍ୟବସ୍ତୁ ପରିଚାଳନା ସମ୍ପର୍କିତ ପ୍ରଶିକ୍ଷଣ ଶିବିର ଅନୁଷ୍ଠିତ ହୋଇଯାଇଛି। ଏନ୍ଏସି ଅନ୍ତର୍ଗତ ୧୫ଟି ଓ୍ବାର୍ଡର ପରିମଳ ବ୍ୟବସ୍ଥାରେ ସୁଧାର ଆଣିବାକୁ ସ୍ବୟଂ ସହାୟକ ଗୋଷ୍ଠୀ (ଏସ୍ଏଚ୍ଜି)ର ସହାୟତା ଲୋଡ଼ାଯାଇଥିଲା।
ରାଜ୍ୟ ସରକାର ଗୃହ ନିର୍ମାଣ ଏବଂ ନଗର ଉନ୍ନୟନ ବିଭାଗ ପକ୍ଷରୁ ଆୟୋଜିତ ଉକ୍ତ କାର୍ଯ୍ୟକ୍ରମରେ ନିର୍ବାହୀ ଅଧିକାରୀ ପ୍ରମୋଦ କୁମାର ବରାଳ ଅଧ୍ୟକ୍ଷତା କରିଥିଲେ। ପରିମଳ ବ୍ୟବସ୍ଥା ପରିଚାଳନା ଦାୟିତ୍ୱରେ ଥିବା ‘ନିପ୍ସ’ ସେବାସଂସ୍ଥାର ନିର୍ଦ୍ଦେଶକ ପରମେଶ୍ବର ଦାସ, କମ୍ୟୁନିଟି ସଂଯୋଜିକା ଜଲିତା ସାହୁ, ଜ୍ୟୋତିକୃଷ୍ଣ ପଣ୍ଡା, ଜି.ଗୀତିକା ସୁବୁଦ୍ଧି, ସଚ୍ଚିଦାନନ୍ଦ ସାହୁ ଉପସ୍ଥିତ ରହି ପରିମଳ ସଜାଡ଼ିବା ଦିଗରେ ଆବଶ୍ୟକ ପଦକ୍ଷେପ ସମ୍ପର୍କରେ ଆଲୋଚନା କରିଥିଲେ।
ଉଭୟ କେନ୍ଦ୍ର ଏବଂ ରାଜ୍ୟ ସରକାର ପରିବେଶ ସଫାସୁତରା ରଖିବା ଦିଗରେ କାର୍ଯ୍ୟ କରୁଛନ୍ତି। ଏଥିରେ ଲକ୍ଷାଧିକ ଟଙ୍କା ମଧ୍ୟ ଖର୍ଚ୍ଚ ହେଉଛି। ହେଲେ ଜନସାଧାରଣଙ୍କ ସଚେତନ ହେଉ ନ ଥିବାରୁ ସବୁ ଯୋଜନା ଫେଲ୍ ମାରୁଛି। ବ୍ୟାପକ ପ୍ରଚାର ସତ୍ତ୍ୱେ ଅଞ୍ଚଳବାସୀ ଡଷ୍ଟବିନ୍ ବ୍ୟବହାର କରୁନାହାନ୍ତି। ବର୍ଜ୍ୟବସ୍ତୁ ଖୋଲାସ୍ଥାନ, ଡ୍ରେନ୍ରେ ପକାଉଛନ୍ତି। ବର୍ଷା ହେଲେ ଉକ୍ତ ସାମଗ୍ରୀ ନାଳରେ ଭର୍ତ୍ତି ହୋଇ ପାଣି ନିଷ୍କାସନରେ ବାଧା ସୃଷ୍ଟି ହେଉଛି। ଓ୍ବାର୍ଡବାସୀ ସାମାନ୍ୟ ଉଦ୍ୟମ କଲେ ଭୁବନ ଏନ୍ଏସିରେ ସ୍ବଚ୍ଛତା ଫେରିବାରେ ବେଶି ଡେରି ହେବନି ବୋଲି ଅତିଥିମାନେ ପରାମର୍ଶ ଦେଇଥିଲେ।
ଅଞ୍ଚଳର ୨୦୦ରୁ ଊର୍ଦ୍ଧ୍ୱ ସ୍ବୟଂ ସହାୟକ ଗୋଷ୍ଠୀର ସଦସ୍ୟ ଉପସ୍ଥିତ ରହି ଆଲୋଚନାରେ ଭାଗ ନେଇଥିଲେ। ସଫେଇ କାର୍ଯ୍ୟରେ ନିୟୋଜିତ କର୍ମଚାରୀଙ୍କୁ ଗ୍ଲୋଭ୍ସ, ଜୋତା ପ୍ରଦାନ କରାଯାଇଥିଲା। ଏଥିସହ ସେମାନଙ୍କ ସ୍ବାସ୍ଥ୍ୟ ପରୀକ୍ଷା କରାଯାଇଥିଲା।
