କାମାକ୍ଷାନଗର, ୧୯।୫(ଡି.ଏନ.ଏ.) – ସାମାଜିକ ଦୂରତ୍ୱ, ମାସ୍କ, ସଙ୍ଗରୋଧ କରୋନା ପ୍ରତିରୋଧ ଲାଗି ସବୁଠୁ ବଡ଼ ଉପାୟ ବୋଲି କୁହାଯାଉଛି। ଦେଶରେ କୋଭିଡ୍-୧୯ ଆତଙ୍କ ଦେଖାଦେବା ପରେ ଏହାକୁ ନେଇ ସରକାରୀ, ବେସରକାରୀସ୍ତରରେ ବ୍ୟାପକ ପ୍ରଚାର ଚାଲିଛି। ହେଲେ କାମାକ୍ଷାନଗର ଏନ୍ଏସିରେ ଲକ୍ଡାଉନ୍ ନିୟମକୁ ବାଏଁବାଏଁ ଉଡ଼ାଇ ଦେଉଛନ୍ତି ଲୋକେ। ସାମାଜିକ ଦୂରତ୍ୱ ନିୟମକୁ ଫାଙ୍କି ବିନା ମାସ୍କରେ ଗାଡ଼ିଧରି ବୁଲୁଛନ୍ତି ଅମାନିଆ। ଏନ୍ଏସି ପ୍ରଶାସନର କୋହଳ ନୀତି ଯୋଗୁ ସହରରେ ଏପରି ଅବ୍ୟବସ୍ଥା ଦେଖାଦେଇଥିବା ବୁଦ୍ଧିଜୀବୀମାନେ ଅଭିଯୋଗ କରିଛନ୍ତି। ଅନ୍ୟପଟେ ଅଭିଯୋଗପରେ ତହସିଲଦାର ସଞ୍ଜୟ କୁମାର ରାଉତଙ୍କ ନେତୃତ୍ୱରେ ପୋଲିସ ପକ୍ଷରୁ ବଜାରରେ ଚଢ଼ାଉ କରି ଜରିମାନା ଆଦାୟ କରାଯିବା ସହ ଦୋକାନୀଙ୍କୁ ତାଗିଦ୍ କରାଯାଇଛି।
କାମାକ୍ଷାନଗର ଏନ୍ଏସି କର୍ତ୍ତୃପକ୍ଷଙ୍କ ପକ୍ଷରୁ ଦୈନିକ ବଜାରର ଉଭୟ ପାର୍ଶ୍ୱ ରାସ୍ତାକୁ ବାଉଁଶ ବାଡ଼ ଦେଇ ବନ୍ଦ କରାଯାଇଛି। ରାସ୍ତାକଡ଼ରେ ବାଇକ୍, ସାଇକେଲ ରଖି ଲୋକମାନେ ବଜାରକୁ ଯାଇ ସାମଗ୍ରୀ କିଣୁଛନ୍ତି। ହେଲେ ଥରେ ବଜାରକୁ ଗଲେ ସେମାନେ ଦୀର୍ଘ ସମୟ ଯାଏ ରହୁଛନ୍ତି। ମାସ୍କ ନ ପିନ୍ଧି ମନଇଚ୍ଛା ବୁଲୁଛନ୍ତି। ସାମାଜିକ ଦୂରତ୍ୱ ନିୟମକୁ ମାନୁନାହାନ୍ତି। ଦୋକାନୀମାନେ ମଧ୍ୟ ଗ୍ରାହକଙ୍କୁ ସଚେତନ କରୁନାହାନ୍ତି। ଏପରି ପରିସ୍ଥିତିରେ କରୋନା ସଂକ୍ରମଣ ଭୟ ରହୁଛି। ପୂର୍ବରୁ ବଜାରରେ ଭିଡ଼ ନିୟନ୍ତ୍ରଣ କରିବାକୁ ପୋଲିସ ମୁତୟନ ରହୁଥିଲେ। ଏବେ କଟକଣା ସାମାନ୍ୟ କୋହଳ ପରେ ଏହାର ଠିକ୍ ପରିଚାଳନା ହେଉନାହିଁ। ଫଳରେ ଏପରି ଅବ୍ୟବସ୍ଥା ହେଉଥିବା ଜଣାପଡ଼ିଛି।
ଏ ନେଇ ନିର୍ବାହୀ ଅଧିକାରୀ ଇଂ.ବିରଜା ପ୍ରସାଦ ରଥ କୁହନ୍ତି, ବାରମ୍ବାର ସଚେତନ କରାଯିବା ସତ୍ତ୍ୱେ କେତେଜଣ ଲୋକ ମାନୁନାହାନ୍ତି। ଦୋକାନରେ ବ୍ୟବସାୟ ସମୟରେ ମାସ୍କ ପିନ୍ଧିବା ଏବଂ ସାମାଜିକ ଦୂରତ୍ୱ ନିୟମକୁ କଡ଼ାକଡ଼ି ପାଳନ କରିବାକୁ ସୋମବାର ଦୋକାନୀଙ୍କୁ ସଚେତନ କରାଯାଇଛି। ନିୟମ ଭଙ୍ଗ କରି ବ୍ୟବସାୟ କରୁଥିବା ୧୨ ଦୋକାନରୁ ୨୪୦୦ଶହ ଟଙ୍କା ଜରିମାନା ଆଦାୟ କରାଯାଇଛି। ୨ଟି ଦୋକାନରେ ତାଲା ପକାଯାଇଛି। ନିୟମ ନ ମାନିଲେ ଦୋକାନ ସିଲ୍ କରାଯିବ ବୋଲି ଚେତାବନୀ ଦିଆଯାଇଥିବା ନିର୍ବାହୀ ଅଧିକାରୀ ସୂଚନା ଦେଇଛନ୍ତି।
